ഫാൽകൻ മേളയിലെ ഇന്ത്യൻ ആർട്ട്​

ദോഹ: കതാറ കൾച്ചറൽ ​വില്ലേജിലെ രാജ്യാന്തര ഫാൽകൻ ഫെസ്​റ്റിൽ കാഴ്​ചക്കാരെ ആകർഷിക്കുന്ന പ്രധാന ഇനമാണ്​ തത്സമയ പെയിൻറിങ്​. ആയിരക്കണക്കിന്​ സന്ദർശകർ ദിവസേനയെത്തുന്ന പ്രദർശന വേദിയിൽ കാഴ്​ചക്കാരുടെ മുന്നിൽനിന്ന്​ ജീവസ്സുറ്റ ഫാൽകനുകളെ, കാൻവാസിൽ തത്സമയം കോറിയിടുന്ന ചിത്രകാരന്മാരിലെ മലയാളി സാന്നിധ്യമാണ്​ കോഴിക്കോട്​ നടുവട്ടം സ്വദേശിയായ സകീർ ഹുസൈനും വടകര സ്വദേശിയായ രജീഷ്​ രവിയും.

കഴിഞ്ഞ ഒമ്പതു വർഷമായി കതാറ കൾച്ചറൽ വില്ലേജിൽ ഡിസൈനറായി ജോലിചെയ്യുന്ന സകീർ മികച്ചൊരു കലാകാരൻ എന്ന നിലയിൽ ഇതിനകം തന്നെ ഖത്തറിൽ ശ്രദ്ധേയനാണ്​. വർഷങ്ങളായി ഫാൽകൻ ഫെസ്​റ്റിൽ ആർട്ട്​ വർക്കുകളുമായി ഒപ്പമുണ്ട്. ഫാൽകൻ പ്രദർശനവേദിയിൽ സകീർ തീർത്ത പെയിൻറിങ്ങുകൾക്ക്​ ഇതിനകം തന്നെ ആവശ്യക്കാരെത്തിക്കഴിഞ്ഞു. സൂഖ്​ വഖിഫ്​ ആർട്​സ്​ സെൻററിലെ ​കലാകാരനായ രജീഷ്​​ രവിയും വൈവിധ്യങ്ങളായ ഫാൽകൻ പെയിൻറിങ്ങുമായി പ്രദർശന വേദിയിൽ സജീവമായുണ്ട്​. തലശ്ശേരി സ്​കൂൾ ഓഫ്​ ഫൈൻആർട്​സിൽനിന്ന്​ ബിരുദം നേടിയ രജീഷ്​​ 13 വർഷമായി ഖത്തറിൽ കലാരംഗത്തുണ്ട്​.

'വലിയ താൽപര്യത്തോടെയാണ്​ സന്ദർശകരെത്തുന്നത്​. ലൈവ്​ പെയിൻറിങ്ങിനെ നോക്കി നിന്നും അന്വേഷിച്ചും അവർ നന്നായി ആസ്വദിക്കുന്നു​. വലിയൊരു മേളയുടെ ഭാഗമാവുന്നത്​ നല്ലൊരു അനുഭവമാണ്​' -രജീഷ്​ രവി പറയുന്നു. ചെന്നൈ സ്വദേശിയായ അർജുൻ സുവരാജാണ്​ മറ്റൊരു ഇന്ത്യൻ കലാകാരൻ. കേൾക്കാനും സംസാരിക്കാനും കഴിയാത്ത അർജുൻ, പക്ഷേ ത‍െൻറ കൈവിരലുകളും ചായക്കൂട്ടുകളും വഴി കാഴ്​ചക്കാരോട്​ ഗംഭീരമായി തന്നെ സംദിക്കുന്നു. നേരത്തെ പൂർത്തിയാക്കിയ പിതൃഅമീർ ഹമദ്​ ബിൻ ഖലീഫ ആൽഥാനിയുടെ ശ്രദ്ധേയമായൊരു പെയിൻറിങ്ങിന്​ അരികിലിരുന്നാണ്​ അർജുൻ പുതിയ ഫാൽകൻ സൃഷ്​ടി പൂർത്തിയാക്കുന്നത്​. കൂട്ടായി മാതാപിതാക്കളായ രാജേഷ്​ ബാബുവും ശോഭാ രാജേഷും വേദിയിൽ തന്നെയുണ്ട്​. ഇന്ത്യൻ കലാകാരന്മാർക്ക്​ പുറമെ ഖത്തറിൽനിന്നുള്ളവരും വിദേശികളുമെല്ലാം തത്സമയം പെയിൻറിങ്ങുമായി മേളയുടെ ശ്രദ്ധയാകർഷിക്കുന്നു.