ഹോട്ടൽ താമസക്കാരിൽ വർധന
text_fieldsദോഹ: ജൂലൈ മുതൽ സെപ്റ്റംബർ വരെയുള്ള കാലയളവിൽ ഹോട്ടൽ താമസക്കാരുടെ എണ്ണത്തിൽ 62 ശതമാനം വർധന രേഖപ്പെടുത്തിയതായി ഖത്തർ ടൂറിസം. 2020 സെപ്റ്റംബറിനെ അപേക്ഷിച്ച് ഈ വർഷം മൂന്നാം പാദത്തിൽ ഹോട്ടൽ താമസക്കാരുടെ എണ്ണത്തിൽ നാല് ശതമാനം വർധന രേഖപ്പെടുത്തിയതായി ഖത്തർ ടൂറിസം പുറത്തുവിട്ട റിപ്പോർട്ടിൽ വ്യക്തമാക്കുന്നു.
2020 സെപ്റ്റംബറിൽ 28,201 ഹോട്ടൽ മുറികളാണുണ്ടായിരുന്നത്. ഈ വർഷം മൂന്നാം പാദത്തിൽ അത് 29,222 ആയി വർധിച്ചെന്ന് റിപ്പോർട്ടിൽ ചൂണ്ടിക്കാട്ടി. ഡീലക്സ്, സ്റ്റാൻഡേഡ് ഹോട്ടൽ അപ്പാർട്മെൻറുകളിൽ ഒമ്പത് ശതമാനം വർധനയാണ് രേഖപ്പെടുത്തിയത്. ഫോർ സ്റ്റാർ, ഫൈവ് സ്റ്റാർ ഹോട്ടലുകളിൽ അഞ്ചു ശതമാനം വർധനയും വൺ, ടു, ത്രീ സ്റ്റാർ ഹോട്ടലുകളിൽ 12 ശതമാനം കുറവും ഉണ്ടായതായി റിപ്പോർട്ടിൽ പറയുന്നു.
ക്വാറൻറീൻ ആവശ്യങ്ങൾക്കൊഴികെയുള്ള ഹോട്ടൽ താമസ വിതരണ മേഖലയിൽ 14 ശതമാനം വർധനയുണ്ടായിട്ടുണ്ട്. 2021 മാർച്ച് മുതൽ ഹോട്ടൽ താമസ നിരക്കിൽ വലിയ വർധനയാണ് ഉണ്ടായിത്തുടങ്ങിയിരിക്കുന്നത്. കഴിഞ്ഞ വർഷം സെപ്റ്റംബറിൽ 54 ശതമാനം മാത്രമായിരുന്ന ഹോട്ടൽ താമസ നിരക്കിൽ എട്ട് ശതമാനം വർധനയുണ്ടായതായി ഖത്തർ ടൂറിസം റിപ്പോർട്ടിൽ പറയുന്നു.
ഹോട്ടൽ റൂമുകളുടെ ശരാശരി നിരക്കിൽ 13 ശതമാനവും ലഭ്യമായ ഓരോ മുറികളുടെയും വരുമാനത്തിൽ 29 ശതമാനവും മുൻ വർഷത്തെ അപേക്ഷിച്ച് വർധനവുണ്ടായിട്ടുണ്ട്. രാജ്യത്തെത്തുന്ന സന്ദർശകർക്ക് കോവിഡ് സുരക്ഷ ഉറപ്പാക്കുന്നതിനായി ഹോട്ടലുകൾക്ക് നൽകുന്ന ക്ലീൻ സർട്ടിഫിക്കേഷൻ പ്രോഗ്രാം, ഒരു മാസം നീണ്ട ഷോപ്പ് ഖത്തർ തുടങ്ങി ഹോസ്പിറ്റാലിറ്റി മേഖലക്ക് ഉണർവുണ്ടാക്കുന്ന വ്യത്യസ്ത പരിപാടികൾ സജീവമായതോടെയാണ് ഹോസ്പിറ്റാലിറ്റി, ഹോട്ടൽ മേഖലകൾ കോവിഡ് പ്രതിസന്ധികളെ മറികടന്നത്. ഫിഫ അറബ് കപ്പ്, രാജ്യാന്തര ഭക്ഷ്യമേള തുടങ്ങിയവയോടനുബന്ധിച്ച് സന്ദർശകരുടെ എണ്ണത്തിൽ വർധനയുണ്ടായിട്ടുണ്ട്.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.