കതാറയിൽ ജലകായിക ഇനങ്ങൾക്ക് നിരക്ക് കുറച്ചു

ദോഹ: കതാറയിൽ ജലകായിക ഇനങ്ങളുടെ നിരക്ക് 50 ശതമാനം കുറച്ചു. ബോട്ട് റൈഡ്, കാറ്റമറാൻ റൈഡ്, വാട്ടർ സ്​കീയിങ്, പാരാസെയ്​ലിങ് തുടങ്ങിയ മോട്ടോറൈസ്​ഡ് പ്രവർത്തനങ്ങൾക്കും സീ പെഡൽ ബോട്ട്, കയാക് തുടങ്ങിയ നോൺ മോട്ടോറൈസ്​ഡ് ആക്ടിവിറ്റികൾക്കുമാണ് നിരക്കുകളിൽ 50 ശതമാനം കുറച്ചിരിക്കുന്നത്.

പുതിയ നിരക്കുകൾപ്രകാരം ബോട്ട് റൈഡിന് 30 മിനിറ്റ്​ നേരത്തേക്ക് 60 റിയാലും കാറ്റമറാൻ റൈഡിന് 100 റിയാലുമായിരിക്കും ചാർജ് ഈടാക്കുക. 30 മിനിറ്റ്​ നേരത്തേക്ക് വാട്ടർ സ്​കീയിങ്ങിന് 75 റിയാലും പാരാസെയ്​ലിങ്ങിന് 50 റിയാലുമായിരിക്കും പുതിയ നിരക്കുകൾ. നോൺ മോട്ടോറൈസ്​്ഡ് ആക്ടിവിറ്റികൾക്ക് 25 റിയാലാണ് നിരക്ക്.

കാലാവസ്​ഥയെ ആശ്രയിച്ചായിരിക്കും ജലകായിക പ്രവർത്തനങ്ങൾക്കുള്ള അനുമതി ലഭിക്കുക. ഏതു തരം വാട്ടർ സ്​പോർട്​സ്​​ ആക്ടിവിറ്റികൾക്കും ലൈഫ് ജാക്കറ്റ് ധരിക്കൽ നിർബന്ധമാണ്​. 16 വയസ്സിന് താഴെയുള്ളവർ നിർബന്ധമായും രക്ഷിതാക്കളുടെ കൂടെയായിരിക്കണം എത്തേണ്ടത്​. എന്നാൽ, ഇവക്ക് മുൻകൂട്ടി ബുക്കിങ്​ ആവശ്യമില്ലെന്ന് കതാറ അറിയിച്ചു. വൈകീട്ട് 3.30 മുതൽ രാത്രി 11 വരെയായിരിക്കും പ്രവർത്തനസമയം. ടിക്കറ്റ് എടുത്താൽ ഗേറ്റ് നമ്പർ ഒന്നിലൂടെയോ എട്ടിലൂടെയോ പ്രവേശിക്കാം.

മുതിർന്നവർ നിർബന്ധമായും ഇഹ്തിറാസ്​ ആപ്​ സ്​റ്റാറ്റസ്​ കാണിച്ചിരിക്കണം. വാട്ടർ സ്​പോർട്​സ്​​ വിഭാഗത്തിലേക്ക് പ്രവേശിക്കുന്നതിന് 18 വയസ്സിനു മുകളിലുള്ളവർക്ക് 10 റിയാലാണ് ചാർജ് ഈടാക്കുന്നത്.