ഗാർഹിക തൊഴിലാളിക​ൾക്ക്​ അനധികൃത താമസവും ജോലിയും; മൂന്നുപേർ പിടിയിൽ

ദോഹ: വീട്ടുജോലിക്കാരെ അനധികൃതമായി കടത്തുകയും താമസിപ്പിക്കുകയും നിയമവിരുദ്ധമായി ജോലി നൽകുകയും ചെയ്തുവെന്ന കേസിൽ മൂന്ന്​ ഏഷ്യക്കാർ അറസ്റ്റിൽ. ജനറൽ ഡയറക്​ടറേറ്റ്​ ഓഫ്​ പാസ്​പോർട്ടിലെ സെർച്ച്​ ആൻഡ്​ ഫോളോഅപ്​ വിഭാഗം (എസ്​.എഫ്​.ഡി) ആണ്​ മൂന്ന്​ പുരുഷന്മാരെ അറസ്റ്റ്​ ചെയ്തത്​. ഇവർക്കൊപ്പം ഗാർഹിക തൊഴിലാളികളായ 11 സ്​ത്രീകളെയും പിടികൂടി. വീട്ടുജോലിക്കാരുമായി ബന്ധപ്പെട്ട് സമൂഹമാധ്യമങ്ങളിലെ സംശയാസ്പദമായ പരസ്യത്തെത്തുടര്‍ന്ന് ബന്ധപ്പെട്ട സുരക്ഷാ വകുപ്പുകളുമായി ചേര്‍ന്ന്​ നടത്തിയ അന്വേഷണത്തിലാണ്, നിരവധി പേരെ അനധികൃതമായി താമസിപ്പിച്ചിരുന്നതായി കണ്ടെത്തിയത്​. ഇവർക്ക്​ നിയമവിരുദ്ധമായി വിവിധ സ്ഥലങ്ങളിൽ ജോലി നൽകുകയായിരുന്നു ലക്ഷ്യം. അറസ്റ്റിലായ മൂന്നുപേരും ഒരേ രാജ്യത്തു നിന്നുള്ളവരാണ്​.

ചോദ്യം ചെയ്യലില്‍, പ്രതികള്‍ കുറ്റം സമ്മതിച്ചു. വീട്ടുജോലിക്കാരെ എങ്ങനെ പാര്‍പ്പിക്കുന്നുവെന്നും സമൂഹ മാധ്യമങ്ങളിൽ നൽകുന്ന പരസ്യങ്ങൾ വഴി ഇവർക്ക്​ എങ്ങനെ ജോലിനൽകുന്നുവെന്നത്​ സംബന്ധിച്ചും പ്രതികള്‍ അന്വേഷണ ഉദ്യോഗസ്ഥരോട് വിശദമാക്കി. തുടര്‍ നിയമ നടപടികള്‍ക്കായി പ്രതികളെ പബ്ലിക്ക്​ പ്രോസിക്യൂഷന് റഫര്‍ ചെയ്തിട്ടുണ്ട്.