ഖത്തർ ഫൗണ്ടേഷൻ യാഥാർഥ്യമായതെങ്ങനെ; മനസ്സു തുറന്ന് ശൈഖ മൗസ

ദോഹ: 'അങ്ങനെ ഖത്തർ ഫൗണ്ടേഷനിലൂടെ രാജ്യത്തി​െൻറ ഭാവി നിർമിക്കപ്പെടുകയായിരുന്നു...' ഒരു കാഴ്ചപ്പാടിൽനിന്ന്​ ഖത്തർ ഫൗണ്ടേഷൻ യാഥാർഥ്യമായത് സംബന്ധിച്ച് ചെയർപേഴ്സൻ ശൈഖ മൗസ ബിൻത് നാസർ അൽ മിസ്​നദ് പറഞ്ഞവസാനിപ്പിച്ചത് ഇപ്രകാരമായിരുന്നു. ഖത്തർ ഫൗണ്ടേഷ​െൻറ 25ാം വാർഷികത്തോടനുബന്ധിച്ച് ഖത്തർ ടി.വിയിൽ നടന്ന പ്രത്യേക പാനൽ ചർച്ചയിൽ സംസാരിക്കുകയായിരുന്നു അവർ. 1995ൽ അന്നത്തെ അമീർ ശൈഖ് ഹമദ് ബിൻ ഖലീഫ ആൽഥാനിയുടെ പൂർണ പിന്തുണയോടെ ഖത്തർ ഫൗണ്ടേഷൻ സ്​ഥാപിതമായത് മുതൽ ഇന്ന് ഖത്തർ ഫൗണ്ടേഷ​െൻറ പ്രാധാന്യം വരെയുള്ള കാര്യങ്ങളും നാഴികക്കല്ലുകളും ശൈഖ മൗസ ബിൻത് നാസർ വിശദീകരിച്ചു. 26 വർഷം മുമ്പ് ഖത്തർ ഫൗണ്ടേഷൻ സ്​ഥാപിക്കുന്നതിൽ മുന്നിൽ നടന്ന മുതിർന്ന വ്യക്തിത്വങ്ങളും ചർച്ചയിലുണ്ടായിരുന്നു. ഖത്തർ ഫൗണ്ടേഷൻ സ്​ഥാപിക്കുന്നതുമായി ബന്ധപ്പെട്ട പദ്ധതികളും വെല്ലുവിളികളും ലക്ഷ്യങ്ങളും ഇക്കാലയളവു വരെയുള്ള പ്രധാന നാഴികക്കല്ലുകളും അവർ പറഞ്ഞുവെച്ചു. വിജയകരമായി മുന്നേറിക്കൊണ്ടിരിക്കുന്ന ഖത്തർ ഫൗണ്ടേഷൻ പദ്ധതിയുടെ വേരുകൾ ഏറെ ആഴത്തിലാണ് സ്​ഥിതി ചെയ്യുന്നത്​. കടുത്ത വെല്ലുവിളികളും വഴിത്തിരിവുകളും ഉണ്ടായിരിക്കത്തന്നെ 25 വർഷം മുമ്പ് ഖത്തർ ഫൗണ്ടേഷൻ അതിെൻറ യാത്ര ആരംഭിക്കുകയായിരുന്നു -ശൈഖ മൗസ പറഞ്ഞു. 2005ൽ എജുക്കേഷൻ സിറ്റി ഔദ്യോഗികമായി പ്രവർത്തനമാരംഭിച്ചപ്പോൾ ഖത്തറി​െൻറ ഭാവി എജുക്കേഷൻ സിറ്റിയിലായിരിക്കുമെന്നായിരുന്നു വാഗ്ദാനം നൽകിയിരുന്നത്.

അതെ, ഖത്തർ ഫൗണ്ടേഷൻ രാജ്യത്തി​െൻറ ഭാവി നിർമിച്ചിരിക്കുന്നു -അവർ വികാരാധീനയായി. ഖത്തർ ഫൗണ്ടേഷ​െൻറ പദ്ധതികളിലോ കേന്ദ്രങ്ങളിലോ സംരംഭങ്ങളിലോ അത് പ്രത്യേക ഭൂപ്രദേശത്ത് മാത്രമായിരിക്കണമെന്ന് ഒരിക്കൽപോലും ചിന്തിച്ചിട്ടില്ല. ഖത്തർ ആസ്​ഥാനമായി അറബ്-ഇസ്​ലാമിക നവോഥാന പദ്ധതിയായാണ് ഞങ്ങൾ അവതരിപ്പിച്ചത്. അക്കാദമിക, ഗവേഷണ, സാമൂഹിക ലക്ഷ്യത്തിലൂന്നി അറബ് ലോകത്ത് സുസ്​ഥിര വികസനവും പുരോഗതിയും ലക്ഷ്യംവെച്ചാണ് ഖത്തർ ഫൗണ്ടേഷൻ സ്​ഥാപിച്ചത്. ഫൗണ്ടേഷനിലെ ഖത്തർ അക്കാദമിയാണ് ഇവിട​െത്ത ആദ്യ സ്​ഥാപനം. 1996ൽ ഖത്തർ അക്കാദമി പ്രവർത്തനമാരംഭിക്കുമ്പോൾ അതിന് രണ്ടു മാനങ്ങളാണുണ്ടായിരുന്നത്. കുട്ടികളുടെ വിദ്യാഭ്യാസത്തിൽ ആശങ്കയും ആകുലതകളുമുള്ള ഒരു മാതാവിെൻറ റോളാണതിന്​ ആദ്യം. രണ്ടാമത്തേത് അത് ദേശീയതലത്തിലായിരുന്നു. സമൂഹത്തിെൻറ വളർച്ചയിലും പുരോഗതിയിലും അത് പ്രതിഫലിച്ചിരിക്കുന്നു.

ആ സമയങ്ങളിൽ വിദ്യാഭ്യാസരംഗം ദേശീയതലത്തിൽ തന്നെ വെല്ലുവിളികൾ നിറഞ്ഞതായിരുന്നു. ഉന്നത, ഗുണമേന്മയുള്ള വിദ്യാഭ്യാസ സംവിധാനത്തിലൂടെ ഇതിന് കാതലായ മാറ്റം വരുത്തേണ്ടിയിരുന്നു. അങ്ങനെയാണ് ഖത്തർ ഫൗണ്ടേഷനെന്ന ചിന്തയിലേക്കെത്തിയത്. ഖത്തർ അക്കാദമി വളർന്നെങ്കിലും ഉന്നത വിദ്യാഭ്യാസവും ശാസ്​ത്രീയ ഗവേഷണങ്ങൾക്കുമായി ഖത്തർ ഫൗണ്ടേഷൻ കൂടുതൽ വികസിക്കേണ്ടതുണ്ടായിരുന്നു. കേവലം ഒരു സർവകലാശാല എന്നതായിരുന്നു ആദ്യം ലക്ഷ്യമിട്ടിരുന്നത്. എന്നാൽ, നിരവധി സമൂഹങ്ങളുടെ പുരോഗതിയിൽ ഇങ്ങനെ ഒരു സർവകലാശാല എന്ന സങ്കൽപം എത്രത്തോളം സ്വാധീനം ചെലുത്തുമെന്ന ചിന്തയിൽ നിന്നും അത് പിന്തിരിപ്പിച്ചു. അങ്ങനെയാണ് അന്താരാഷ്​ട്ര സർവകലാശാലകളെ ഖത്തറിലേക്ക് ആകർഷിക്കുന്നതിനുള്ള പദ്ധതികൾ തയാറാക്കുന്നത്. ഒന്നിെൻറ ഒടുക്കം മറ്റൊന്നിെൻറ തുടക്കം എന്നാണല്ലോ. അന്താരാഷ്​ട്ര സർവകലാശാലകളുമായുള്ള ചർച്ചകളിലും വിശകലനങ്ങളിലും ഏറെ വെല്ലുവിളിയായിരുന്നത് തങ്ങളുടെ വിദ്യാർഥികളുടെ അക്കാദമിക യോഗ്യതയായിരുന്നു. എന്നാൽ, ഖത്തറിലും അറബ് ലോകത്തെയും മാനവ വിഭവശേഷിയിൽ അശേഷം സംശയമില്ലാത്തതിൽ നല്ല ആത്മവിശ്വാസത്തിലായിരുന്നു. മികച്ച അവസരങ്ങളും കൃത്യമായ വിദ്യാഭ്യാസ പരിസ്​ഥിതിയും മുന്നോട്ടു വെച്ചാൽ ഇവിടെയുള്ള യുവതലമുറ ഉയരങ്ങൾ കീഴടക്കുമെന്ന ഉറച്ച വിശ്വാസം, ഇന്ന് ലോകം നേരിൽ കണ്ടുകൊണ്ടിരിക്കുകയാണ്. ഖത്തർ ഫൗണ്ടേഷനിൽനിന്ന് ശാസ്​ത്രജ്ഞന്മാരെയും ഗവേഷകരെയും നൂതന ആശയങ്ങൾ രൂപപ്പെടുത്തുന്നവരെയും സൃഷ്​ടിച്ചെടുക്കുകയെന്നത് മറ്റൊരു വെല്ലുവിളിയായിരുന്നു. മനുഷ്യജീവിതം തുടരുന്നിടത്തോളം ശാസ്​ത്രീയ ഗവേഷണങ്ങളും തുടരുമെന്നതാണ് ഇതിന് പ്രചോദിപ്പിച്ചത്. അറബ് മേഖലയും ലോകവും ഇന്ന് അതിനും സാക്ഷികളായിരിക്കുകയാണ്- ശൈഖ മൗസ വിശദീകരിച്ചു. ഖത്തർ ഫൗണ്ടേഷ​െൻറ സംസ്​ഥാപനത്തിൽ മുഖ്യപങ്കുവഹിച്ച മുൻ സാമ്പത്തിക, ധനകാര്യ മന്ത്രി യൂസുഫ് ഹുസൈൻ കമാൽ, ഇബ്റാഹിം അൽ ഇബ്റാഹിം, ഡോ. ശൈഖ അബ്​ദുല്ല അൽ മിസ്​നദ്, ഡോ. സൈഫ് അൽ ഹാജിരി, എൻജിനീയർ അബ്​ദുൽ റിദാ അബ്​ദുറഹ്മാൻ തുടങ്ങിയവരും ചർച്ചയിൽ പങ്കെടുത്തു സംസാരിച്ചു.