ഹലാൽ ഖത്തർ ഫെസ്റ്റ്​ 21 മുതൽ

ദോഹ: അറേബ്യൻ കുതിര മഹോത്സവത്തിനു പിന്നാലെ കതാറ കൾചറൽ വില്ലേജ്​ പത്താമത്​ ഹലാൽ ഫെസ്റ്റിനെ വരവേൽക്കാൻ ഒരുങ്ങുന്നു. ഫെബ്രുവരി 21 മുതൽ 26 വരെയാണ്​ ഖത്തറിന്‍റെ സംസ്കാരവും പാരമ്പര്യവും അടയാളപ്പെടുത്തുന്ന ഹലാൽ ഫെസ്റ്റിന്​ വേദിയാവുന്നത്​.

ആറു ദിവസം നീണ്ടുനിൽക്കുന്ന ഫെസ്റ്റ്​ കതാറ കൾചറൽ വില്ലേജിന്‍റെ ​തെക്കുഭാഗത്തായി അരങ്ങേറും. രാവിലെ ഒമ്പത്​ മുതൽ രാത്രി ഒമ്പതുവരെയാണ്​ ഖത്തറിലെ സ്വദേശിക​ളും വിദേശികളുമായവരെ ആകർഷിക്കുന്ന ഹലാൽ ഫെസ്റ്റ്​ നടക്കുന്നത്​. കഴിഞ്ഞ സീസണിൽ കോവിഡ്​ കാരണം റദ്ദാക്കിയിരുന്നു. ഒരു വർഷത്തെ ഇടവേളക്കുശേഷം വീണ്ടും ആരംഭിക്കുമ്പോൾ കോവിഡിന്‍റെ ഭീതി ഏറെ അകന്ന ആശ്വാസത്തിലുമാണ്​ ജനങ്ങൾ.

മരുഭൂമിയിലെ പഴയകാലം ജീവിതം അടയാളപ്പെടുത്തുന്ന ഫെസ്റ്റിൽ ആടുകളും ചെമ്മരിയാടുകളുമാണ്​​ താരങ്ങൾ. ആടുകളെയും ഒട്ടകങ്ങളെയും വളര്‍ത്തിയിരുന്ന മരുഭൂമിയിലെ പഴയകാല ജീവിതവും മൃഗവ്യാപാരവും പുതുതലമുറയിലേക്കു പകര്‍ന്നുനല്‍കുകയാണ്​ വർഷങ്ങളായി ആഘോഷപൂർവം നടത്തപ്പെടുന്ന മേളയുടെ ലക്ഷ്യം.

ഖത്തറിലെ വിവിധ കേന്ദ്രങ്ങളിൽ നിന്നുള്ള വരുടെ പങ്കാളിത്തത്തിനുപുറമെ, വിവിധ ജി.സി.സി രാജ്യങ്ങളിൽ നിന്നുള്ള സംഘങ്ങളും പ്രദർശനത്തിനെത്തും. വളർത്തുമൃഗങ്ങളുടെ പ്രദർശനവും പ്രധാന ആകർഷക ഘടകമാണ്​.

കന്നുകാലി ഉൽപാദനം മെച്ചപ്പെടുത്തുന്നതിനും അനുബന്ധ വ്യവസായങ്ങൾ വികസിപ്പിക്കുന്നതിനും ബ്രീഡർമാർക്ക് മികച്ച കന്നുകാലികളെയും ചെമ്മരിയാടുകളെയും പ്രദർശിപ്പിക്കാനും സ്വന്തമാക്കാനും ഹലാൽ ഖത്തർ ഫെസ്റ്റിവൽ വഴി കഴിയുമെന്ന്​ കതാറ അറിയിച്ചു. വിവിധ ഇനങ്ങളിൽപെട്ട ആടുകളുടെ പ്രദര്‍ശനത്തിനുപുറമെ, അൽമസൈന​ എന്നപേരില്‍ ആടുകള്‍ക്കും ചെമ്മരിയാടുകള്‍ക്കുമായുള്ള സൗന്ദര്യ മത്സരം, അൽ മസാദ്​ എന്ന പേരിൽ ചെമ്മരിയാടുകളുടെയും ആടുകളുടെയും ലേലം എന്നിവയും നടക്കും. സിറിയൻ, അറബ്​ ഇനങ്ങളിൽപെട്ട ചെമ്മരിയാടുകളുടെ പ്രദർശനമാണ്​ മറ്റൊരു ആകർഷകം.

മുൻവർഷങ്ങളിൽ കരകൗശല പ്രദർശനങ്ങൾ, പരമ്പരാഗത ഭക്ഷ്യമേളകൾ എന്നിവയും നടന്നിരുന്നു.