ഇന്നുമുതൽ കോവിഡ്​ നിയന്ത്രണങ്ങളിൽ കൂടുതൽ ഇളവ്​: മെട്രോയും കർവയും 30 ശതമാനം ശേഷിയിൽതന്നെ

ദോഹ: രാജ്യത്ത്​ വെള്ളി മുതൽ കോവിഡ്​ നിയന്ത്രണങ്ങളിൽ കൂടുതൽ ഇളവുകൾ. എന്നാൽ ദോഹ മെട്രോ, കർവ ബസുകൾ പോലുള്ള പൊതുഗതാഗത സംവിധാനങ്ങൾ 30 ശതമാനം ശേഷിയിൽ പ്രവർത്തിക്കുന്നത്​ തുടരും. കഴിഞ്ഞ ദിവസം ചേർന്ന മന്ത്രിസഭ യോഗത്തിലാണ്​ തീരുമാനം. ഇതുപ്രകാരം പൊതുഗതാഗത സംവിധാനങ്ങളെല്ലാം 30 ശതമാനം ശേഷിയിൽ പ്രവർത്തിക്കുന്നത്​ തുടരുമെന്ന്​ ഗതാഗത വാർത്താവിനിമയ മന്ത്രാലയം അറിയിച്ചു.

എല്ലാവിധ കോവിഡ്​ ചട്ടങ്ങളും പാലിച്ചായിരിക്കണം ഇത്​. ആഴ്​ചയിൽ എല്ലാദിവസവും ഇവ പ്രവർത്തിക്കും. എല്ലാവരും ഇഹ്​തിറാസ്​ ആപിൽ പച്ച സ്​റ്റാറ്റസ്​ കാണിക്കണം. മാസ്​ക്​ ധരിക്കൽ നിർബന്ധമാണ്​. മെട്രോസ്​റ്റേഷനുകളിലും ഗേറ്റുകളിലും പുകവലി നിരോധിച്ചിട്ടുണ്ട്​. സ്​റ്റേഷനുകൾക്കുള്ളിലും ട്രെയിനുകൾക്കുള്ളിലും ഭക്ഷണസാധനങ്ങൾ കഴിക്കുന്നത്​ നിരോധിച്ചിട്ടുണ്ട്​.

സര്‍ക്കാര്‍–സ്വകാര്യ സ്ഥാപനങ്ങളില്‍ വെള്ളിയാഴ്ച മുതൽ 80 ശതമാനം പേർക്കും ജോലിക്കെത്താം. മാളുകളിലും സൂഖുകളിലും കുട്ടികൾക്കും പ്രവേശനം അനുവദിച്ചിട്ടുണ്ട്​. 40 പേർ പങ്കെടുക്കുന്ന വിവാഹ ചടങ്ങുകൾ നടത്താം. എന്നാൽ, ചടങ്ങിൽ പ​ങ്കെടുക്കുന്നവരിൽ 75 ശതമാനം പേര്‍ വാക്സിനെടുത്തവരായിരിക്കണം. സൂഖുകൾക്കും മൊത്ത മാർക്കറ്റുകൾക്കും ആഴ്​ചയിൽ എല്ലാദിവസവും 50 ശതമാനം ശേഷിയിൽ തുറന്നുപ്രവർത്തിക്കാം. 12 വയസ്സിന്​ താഴെയുള്ള കുട്ടികൾക്കും പ്രവേശനം നൽകാം.

പള്ളികളിൽ ജുമുഅ അടക്കമുള്ള നമസ്​കാരങ്ങൾക്ക്​ ഏഴു​ വയസ്സിൽ താഴെയുള്ള കുട്ടികൾക്ക്​ പ്രവേശനം ഉണ്ടായിരിക്കില്ല.റസ്​റ്റാറൻറുകളിലും കഫേകളിലും ഭക്ഷണം നൽകുന്നത്​ തുറസ്സായ സ്​ഥലങ്ങളിലാണെങ്കിൽ മുനിസിപ്പല്‍ മന്ത്രാലയത്തി​െൻറ ക്ലീന്‍ സര്‍ട്ടിഫിക്കറ്റോടെ 50 ശതമാനം ശേഷിയിൽ പ്രവർത്തിക്കാം. അകത്താണെങ്കില്‍ 30 ശതമാനം ശേഷിയിലും പ്രവര്‍ത്തിക്കാം.

വാണിജ്യ മന്ത്രാലയത്തി​െൻറ അനുമതി മാത്രമേ ഉള്ളൂവെങ്കില്‍ തുറന്നയിടങ്ങളില്‍ 30 ശതമാനം പേർക്കും ഇന്‍ഡോറില്‍ 15 ശതമാനം പേർക്കുമാണ്​ പ്രവേശനാനുമതി. എല്ലാ ഉപഭോക്താക്കളും വാക്സിനെടുത്തവരായിരിക്കണം.ബാര്‍ബര്‍ ഷോപ്പുകളും ബ്യൂട്ടിപാര്‍ലറുകളും 30 ശതമാനം ശേഷിയില്‍ പ്രവര്‍ത്തിക്കാം. ജോലിക്കാരും ഉപഭോക്താക്കളും വാക്സിനെടുത്തവരായിരിക്കണം.