ഭക്ഷ്യസുരക്ഷയിൽ അറബ്​ ലോകത്ത്​ ഒന്നാമതെത്തി ഖത്തർ

ദോഹ: നിയമവിരുദ്ധ ഉപരോധത്തിന്​ ഇടയിലും ഭക്ഷ്യസുരക്ഷയുടെ കാര്യത്തിൽ അറബ്​ ലോകത്ത്​ ഒന്നാം സ്ഥാനം കരസ്ഥമാക ്കി ഖത്തർ. ലോക തലത്തിൽ 22ാം സ്ഥാനം നേടുന്നതിന്​ ഖത്തറിന്​ സാധിച്ചു. ദ ഇക്കണോമിസ്​റ്റ്​ ഇൻറലിജൻസ്​ യൂനിറ്റ്​ പുറത്തിറക്കിയ 2018ലെ ആഗോള ഭക്ഷ്യ സുരക്ഷ സൂചികയിലാണ്​ ഖത്തർ മികച്ച നേട്ടം കൊയ്​തത്​. 2017 ജൂൺ അഞ്ച്​ മുതൽ ചില അയൽ രാജ്യങ്ങൾ അടക്കം ഏർപ്പെടുത്തിയ ഉപരോധം ഭക്ഷ്യസുരക്ഷ രംഗത്ത്​ ഖത്തറിനെ ബാധിച്ചില്ലെന്നതിനും കൂടി തെളിവാണ്​ ഭക്ഷ്യസുരക്ഷ സൂചിക.
113 രാജ്യങ്ങളിലെ ഭക്ഷ്യവസ്​തുക്കളുടെ ഗുണനിലവാരം, ലഭ്യത, താങ്ങാനാവുന്ന ചെലവ്​ എന്നിവ പരിഗണിച്ചാണ്​ സൂചിക തയാറാക്കിയത്​. സിങ്കപ്പൂർ ഒന്നും അയർലൻറ്​ രണ്ടും ​അമേരിക്ക മൂന്നും സ്ഥാനം കരസ്ഥമാക്കി. അറബ്​ മേഖലയിലെ രാജ്യങ്ങൾക്ക്​ പുറമെ നിരവധി ഏഷ്യൻ, യൂറോപ്യൻ, ലാറ്റിനമേരിക്കൻ രാഷ്​​ട്രങ്ങളും ഭക്ഷ്യ സുരക്ഷയിൽ ഖത്തറിന്​ പിന്നിലാണ്​.
ഉപരോധം ആരംഭിച്ചതിന്​ ശേഷം തദ്ദേശീയമായി ഉൽപാദനം വർധിപ്പിക്കുകയും പാൽ, ഫ്രഷ്​ കോഴിയിറച്ചി തുടങ്ങിയവയിൽ സ്വയംപര്യാപ്​തത കൈവരിച്ച ഖത്തർ, പച്ചക്കറിയുടെയും ഇൗത്തപ്പഴത്തി​​​െൻറയും മറ്റും ഉൽപാദനത്തിൽ ഗണ്യമായ വർധനയും നേടി. ഇതോടൊപ്പം മറ്റ്​ രാജ്യങ്ങളിൽ നിന്ന്​ ഭക്ഷ്യവസ്​തുക്കൾ എത്തിക്കാനും രാജ്യത്തെ വിപണിയെ വിലക്കയറ്റത്തിൽ നിന്ന്​ രക്ഷിക്കാനും സാധിച്ചു. ഉപരോധത്തിന്​ ശേഷം കന്നുകാലി വളർത്തൽ, മത്സ്യ കൃഷി തുടങ്ങിയവയിലും വലിയ തോതിൽ മുന്നേറ്റമുണ്ടായി. ഇതെല്ലാമാണ്​ ഖത്തറിനെ ഭക്ഷ്യസുരക്ഷയിൽ അറബ്​ ലോകത്ത്​ ഒന്നാം സ്ഥാനത്ത്​ എത്തിക്കാൻ സഹായിച്ചത്​.