ഫിഫ റാങ്കിംഗ്: ഖത്തർ  89ാം സ്​ഥാനത്ത് തന്നെ

ദോഹ: അന്താരാഷ്​ട്ര ഫുട്ബോൾ ഫെഡറേഷ(ഫിഫ)​െൻറ പുതിയ റാങ്കിംഗിൽ സ്​ഥാനം ചലനം സംഭവിക്കാതെ ഖത്തർ. കഴിഞ്ഞ മാസത്തെ 89ാം റാങ്ക് തന്നെയാണ് മെറൂണുകളുടെ സ്​ഥാനം. ചരിത്രത്തിലാദ്യമായി നൂറിൽ താഴെ റാങ്കിലെത്തുകയും ലോകകപ്പ് യോഗ്യതാ മത്സരങ്ങളിലെ മികച്ച പ്രകടനത്തി​െൻറ ബലത്തിൽ അത് 84 വരെയെത്തിയിരുന്നു. എന്നാൽ പിന്നീട് വന്ന വമ്പൻമാരുമൊത്തുള്ള പോരാട്ടങ്ങളിൽ തുടർച്ചയായ വീഴ്ചകൾ റാങ്കിംഗിലും പരിക്കേൽപിച്ചു. ഫിഫ കഴിഞ്ഞ മാസം പുറത്തിറക്കിയ റാങ്കിംഗിൽ അഞ്ച് സ്​ഥാനങ്ങൾ പിറകോട്ടടിച്ച് 89ലാണ് ഖത്തറെത്തിയിരുന്നത്. 

കഴിഞ്ഞ ദിവസം പുറത്തിറക്കിയ പുതിയ റാങ്കിംഗിലും നില മെച്ചപ്പെടുത്താനാകെ ഖത്തർ അതേ സ്​ഥാനത്ത് തന്നെയാണ്. സൗഹൃദ മത്സരങ്ങളിലും യോഗ്യതാ മത്സരങ്ങളിലും തകർപ്പൻ ജയവുമായി മുന്നേറുന്ന ബ്രസീൽ റാങ്കിംഗിലെ ഒന്നാം സ്​ഥാനം തന്നെ നിലനിർത്തി. അർജൻറീന, ജർമ്മനി എന്നിവരാണ് യഥാക്രമം രണ്ടും മൂന്നും സ്​ഥാനങ്ങളിൽ.  അതേസമയം, ഫിഫ റാങ്കിംഗിൽ ഒരു സ്​ഥാനം കൂടി മുന്നോട്ട് കയറിയ ഇന്ത്യ 21 വർഷങ്ങൾക്ക് ശേഷം ആദ്യമായി ആദ്യ നൂറിലെത്തി ചരിത്രം കുറിച്ചിട്ടുണ്ട്. ലോക ഫുട്ബോൾ ഭൂപടത്തിലെ വമ്പൻമാരായ ഹോളണ്ട് 32ാം സ്​ഥാനത്താണ് എത്തിനിൽക്കുന്നത്.