Begin typing your search above and press return to search.
exit_to_app
exit_to_app
Homechevron_rightGulfchevron_rightQatarchevron_rightഫിഫ ലോകകപ്പ്: സ്വാഗതം...

ഫിഫ ലോകകപ്പ്: സ്വാഗതം 'അലമാനിയ'

text_fields
bookmark_border
ഫിഫ ലോകകപ്പ്: സ്വാഗതം അലമാനിയ
cancel
camera_alt

യൂറോപ്യൻ യോഗ്യതാ റൗണ്ടിൽ കളിച്ച ജർമൻ ടീം

ദോഹ: അങ്ങനെ, അറബ്​ മണ്ണ്​ കാത്തുകാത്തിരിക്കുന്ന വിശ്വമേളയിലേക്ക്​ പോരാളികൾ കച്ചമുറുക്കിത്തുടങ്ങി. ഖത്തർ വേദിയാവുന്ന 2022 ഫിഫ ലോകകപ്പിൽ പന്തുതട്ടാൻ ആദ്യം യോഗ്യത നേടുന്ന ടീമായി ലോതർ മത്തേവൂസി​െൻറയും ഒളിവർ ഖാ​െൻറയും ഗെർഡ്​ മുള്ളറുടെയും പിന്മുറക്കാരായ അലമാനിയക്കാർ മാറി. സ്​പാനിഷിലെ ജർമനിയുടെ വിളിപ്പേരാണ്​ അലമാനിയ. 2014​ൽ ബ്രസീലി​െൻറ മണ്ണിൽ തകർത്താടിയ ജർമനിയെ ഓർമയില്ലേ. സ്വന്തം മണ്ണിൽ വിശ്വം കീഴടക്കാൻ മോഹിച്ച കാനറി​പ്പടയെ സെമിഫൈനലിൽ 7-1ന്​ കണ്ണീരണിയിച്ചും ഫൈനലിൽ ലയണൽ മെസ്സിയുടെ അർജൻറീനയുടെ മോഹങ്ങൾ കരിയിച്ചും (1-0) കപ്പുയർത്തിയ മാനുവൽ നോയറും ബാസ്​റ്റ്യൻ ​ൈഷ്വൻസ്​റ്റീഗറും ഫിലിപ്​ ലാമും അടങ്ങിയ ജർമനി. എന്നാൽ, ആ കിരീടവിജയത്തി​െൻറ പട്ടവുമായി 2018ൽ റഷ്യയിലെത്തിയ അലമാനിയക്കാർക്ക്​ നാണക്കേടായിരുന്നു കാത്തിരുന്നത്​. ഗ്രൂപ്​ റൗണ്ടിൽതന്നെ ടീം മടങ്ങിയപ്പോൾ ഒരു ജയം മാത്രമായിരുന്നു സമ്പാദ്യം. മെക്​സികോയോടും കൊറിയയോടും തോറ്റുമടങ്ങി. ആ ദുരന്തചിത്രം മറന്നുകൊണ്ട്​ ഖത്തറിലേക്ക്​ യോഗ്യത നേടുന്ന ആദ്യ ടീമായി ജർമനി മാറുന്നു. ബ്രസീലിൽ കപ്പുയർത്തിയ ടീമി​​െൻറ ന​ട്ടെല്ലായിരുന്ന മാനുവർ നോയറും തോമസ്​ മ്യൂളറും ഇന്നും പരിചയസമ്പത്തി​െൻറ കരുത്തുമായി അവർക്കൊപ്പമുണ്ട്​. ഒരുവർഷത്തിനപ്പുറം ഖത്തറിലേക്ക്​ വിമാനം കയറു​േമ്പാഴും അലമാനിയപ്പടയു​െട നെടുംതൂണായി ഇവരുണ്ടാവുമെന്നാണ്​ ആരാധക പ്രതീക്ഷകൾ. ജർമനിയുടെ 20ാം ലോകകപ്പ്​ പങ്കാളിത്തമാവും ഖത്തറിലേത്​.

15 വർഷത്തോളം ടീമിന്​ തന്ത്രമോതിയ യൊവാഹിം ലോയ്​വി​െൻറ പടിയിറക്കത്തിനുപിന്നാലെ പുതിയ പരിശീലകൻ ഹാൻസി ഫ്ലിക്കിന്​ കീഴിലാണ്​ ജർമനിയുടെ വരവ്​. യോഗ്യതാ റൗണ്ടിൽ ഗ്രൂപ്​ ​'ജെ'യിൽ കളിച്ച എട്ടിൽ ഏഴും ജയിച്ച്​ ഒന്നാം സ്​ഥാനക്കാരായ മുൻ ചാമ്പ്യന്മാരുടെ വരവിനും ഒരു ഗാംഭീര്യമുണ്ട്​. ഇനിയും രണ്ടു​ കളി കൂടി ബാക്കിയുണ്ട്​. 2022 നവംബർ 21നാണ്​ അറബ്​ മണ്ണിലെ ആദ്യ ലോകകപ്പിന്​ ഖത്തർ വേദിയാവുന്നത്​. ഒരുവർഷത്തെ കൗണ്ട്​ ഡൗൺ അടുത്തമാസം തുടങ്ങാനിരിക്കെ വേദികളെല്ലാം പൂർണ സജ്ജമാണ്​. ലോകകപ്പി​െൻറ വിളംബരമായ ഫിഫ അറബ്​ കപ്പിനായുള്ള ഒരുക്കത്തിലാണ്​ ഖത്തർ. നവംബർ 30ന്​ കിക്കോഫ്​ കുറിക്കുന്ന അറബ്​ ടീമുകളുടെ അങ്കം, ലോകകപ്പി​െൻറ വിളംബരം കൂടിയാക്കിമാറ്റാനുള്ള ഒരുക്കത്തിലാണ്​ സംഘാടകർ. ലോകകപ്പി​െൻറ എട്ടിൽ ആറ്​ സ്​റ്റേഡിയങ്ങളും അറബ്​ കപ്പിനും വേദിയാവുന്നുണ്ട്​.

ലോകകപ്പ് : സ്​റ്റേഡിയം മാനേജർമാർക്ക്​ പരിശീലനം ആരംഭിച്ചു

ദോഹ: അടുത്ത വർഷം നടക്കാനിരിക്കുന്ന ഫിഫ ലോകകപ്പ് ഫുട്ബാൾ ടൂർണമെൻറ് വേദികളുടെ സുരക്ഷാ ചുമതലയുള്ള മാനേജർമാർക്കുള്ള പരിശീലനത്തി‍െൻറ ആദ്യ ഘട്ടം ദോഹയിൽ ആരംഭിച്ചു. അറബ് ലോകത്തും മിഡിലീസ്​റ്റിലുമായി നടക്കുന്ന പ്രഥമ ഫിഫ ലോകകപ്പ് സ്​റ്റേഡിയങ്ങളുടെ സുരക്ഷക്ക് മേൽനോട്ടം വഹിക്കുന്ന 28 മാനേജർമാർക്കും അവരുടെ സഹായികൾക്കുമുള്ള പരിശീലനങ്ങൾക്കാണ് തുടക്കം കുറിച്ചിരിക്കുന്നത്. 2022 ലോകകപ്പ് ഖത്തർ സെക്യൂരിറ്റി ആൻഡ് സേഫ്റ്റി ഓപറേഷൻ കമ്മിറ്റിക്ക് (എസ്​.എസ്.ഒ.സി) കീഴിലുള്ള ക്വാളിഫിക്കേഷൻ ആൻഡ് ട്രെയിനിങ് യൂനിറ്റാണ് പരിശീലനം സംഘടിപ്പിക്കുന്നത്. സുപ്രീം കമ്മിറ്റി ഫോർ ഡെലിവറി ആൻഡ് ലെഗസിയിലെ സ്​പോർട്സ്​ ഫെസിലിറ്റീസ്​ സെക്യൂരിറ്റി വിഭാഗവുമായി സഹകരിച്ചാണ് പരിശീലനം.

സെക്യൂരിറ്റി സേഫ്റ്റി മാനേജർമാർക്കുള്ള പരിശീലന ആവശ്യങ്ങളെക്കുറിച്ച് ആഴത്തിലുള്ള പഠനത്തിന് ശേഷമാണ് കരിക്കുലം രൂപകൽപന ചെയ്തിരിക്കുന്നതെന്ന്​ എസ്.സി ഫെസിലിറ്റീസ്​ സെക്യൂരിറ്റി വിഭാഗം മേധാവി അബ്​ദുല്ല അൽ മുഹന്നദി പറഞ്ഞു. ലോകോത്തര നിലവാരത്തിലും സുരക്ഷ പ്രക്രിയകൾക്കായുള്ള അന്താരാഷ്​ട്ര മാനദണ്ഡങ്ങൾ പാലിച്ചും സ്​റ്റേഡിയം മാനേജർമാരുടെ ക്ഷമതയും കഴിവുകളും ഉയർത്തുകയാണ് പരിശീലനത്തിലൂടെ ലക്ഷ്യമിടുന്നത്​. പരിശീലനത്തി‍െൻറ പ്രാഥമിക ഘട്ടമാണ് ആരംഭിച്ചിരിക്കുന്നതെന്നും അൽ മുഹന്നദി വ്യക്തമാക്കി. സ്​റ്റേഡിയം മാനേജർമാർക്കുള്ള പരിശീലന കോഴ്സ്​ ഫിഫയുടെയും ബ്രിട്ടീഷ് ഇൻസ്​റ്റിറ്റ്യൂട്ട് ഓഫ് ലീഡർഷിപ് ആൻഡ് മാനേജ്​മെൻറി‍െൻറയും അംഗീകാരത്തോടെയാണ് സംഘടിപ്പിക്കുന്നത്​. ബ്രിട്ടൻ, യൂറോപ്യൻ യൂനിയൻ തുടങ്ങിയവയുടെ ലീഡർഷിപ്, സുരക്ഷ മാനദണ്ഡങ്ങൾ പാലിച്ചാണ് ഇവയെന്ന്​ ക്വാളിഫിക്കേഷൻ ആൻഡ് ട്രെയിനിങ് യൂനിറ്റ് തലവൻ ലെഫ്. കേണൽ ഫഹ്ദ് സഈദ് അൽ സുബൈഈ പറഞ്ഞു. പരിശീലന പരിപാടിയുടെ ആദ്യഘട്ടം ഒക്ടോബർ 21 വരെ നീണ്ടുനിൽക്കും. അഞ്ചാഴ്ച നീണ്ടുനിൽക്കുന്ന രണ്ടാംഘട്ടം അടുത്ത വർഷം നടക്കും.



Show Full Article
TAGS:alamania qatar 
News Summary - Fifa World cup: Welcome 'Alamania'
Next Story