ഫിഫ ലോകകപ്പ്

ദോഹ: നാളുകൾ എണ്ണിയെണ്ണി ​വിശ്വമേളയിലേക്കുള്ള ദൂരം കുറഞ്ഞുവരുന്നു. കാൽപന്തുകളിയുടെ മഹാമേളയിലേക്ക്​ ഇനി 300 ദിവസത്തെ കാത്തിരിപ്പു മാത്രം. ​ദോഹ കോർണിഷിൽ കളിപ്രേമികളുടെ തീർഥാടന കേന്ദ്രമായി മാറിയ ഡിജിറ്റൽ ക്ലോക്ക്​ ടവറിൽ ഇന്ന്​ കാത്തിരിപ്പ്​ ദിനങ്ങളുടെ 300 ആയി.

​നവംബർ 21ന്​ തുടങ്ങുന്ന ലോകകപ്പിന്‍റെ അടിസ്ഥാന സൗകര്യങ്ങളെല്ലാം ഒരു വർഷം മുമ്പേ ഒരുക്കി ലോകത്തിന്​ മുന്നിൽ സജ്ജമായ ഖത്തർ, ഇപ്പോൾ ടിക്കറ്റ്​ വിൽപനക്കും തുടക്കം കുറിച്ചു. ജനുവരി 19നായിരുന്നു ഫിഫ വെബ്​സൈറ്റ്​ വഴി ആദ്യഘട്ട ടിക്കറ്റ്​ വിൽപന ആരംഭിച്ചത്​. ഫെബ്രുവരി എട്ടുവരെ നീളുന്ന ടിക്കറ്റ്​ ബുക്കിങ്​ നടപടി​ക്രമങ്ങൾക്ക്​ ലോകമെങ്ങുമുള്ള ഫുട്​ബാൾ ആരാധകരിൽനിന്നും ആവേശകരമായ പിന്തുണയാണ്​ ലഭിച്ചത്​.

കഴിഞ്ഞ ബുധനാഴ്ച ആരംഭിച്ച ടിക്കറ്റ്​ ബുക്കിങ്​ 24 മണിക്കൂറിനുള്ളിൽ 12 ലക്ഷം പേരാണ്​ ബുക്ക്​ ചെയ്തത്​. തുടർന്നുള്ള ദിവസങ്ങളിലും വലിയ തോതിൽ ബുക്കിങ്​ തുടരുകയാണ്​. പുതിയ ബുക്കിങ്​ കണക്കുകൾ വരും ദിവസങ്ങളിൽ പുറത്തുവരും. ഏറ്റവും കുറഞ്ഞ നിരക്കിലും ​കാണികൾക്ക്​ ഗാലറിയിലെത്തി കളി കാണാനുള്ള വാഗ്​ദാനവു മായാണ്​ ഫിഫ ടിക്കറ്റ്​ വിൽപനയുടെ നടപടിക്രമങ്ങൾക്ക്​ തുടക്കമിട്ടത്​. മാർച്ച്​ എട്ടിനു​ ശേഷം റാൻഡം അടിസ്ഥാനത്തിൽ നടക്കുന്ന നറുക്കെടുപ്പിലൂടെയാവും ടിക്കറ്റിന്​ അർഹരെ കണ്ടെത്തുന്നത്​.

നിലവിൽ ഏറ്റവും കൂടുതൽപേർ ഖത്തറിൽനിന്നാണ്​ ടിക്കറ്റ്​ ബുക്ക്​ ചെയ്തത്​. അർജന്‍റീന, മെക്സികോ, അമേരിക്ക, യു.എ.ഇ, ഇംഗ്ലണ്ട്​, ഇന്ത്യ, സൗദി അറേബ്യ, ബ്രസീൽ, ഫ്രാൻസ്​ തുടങ്ങിയ രാജ്യങ്ങളിൽനിന്നാണ്​ ശേഷം ഏറ്റവും കൂടുതൽ ബുക്കിങ്ങുകൾ.

ഇനി ആ​രൊക്കെ​?

ഒരു വർഷ കൗണ്ട്​ ഡൗണിനും, ഫിഫ അറബ്​ കപ്പിന്‍റെ ആരവങ്ങൾക്കും പിന്നാലെയായിരുന്നു കോവിഡ്​ മൂന്നാം തരംഗത്തിന്‍റെ വരവ്​. ലോകകപ്പിന്‍റെ ആവേശങ്ങൾക്ക്​ ഇതൊരു തിരിച്ചടിയായെങ്കിലും കോവിഡ്​ വെല്ലുവിളി അടങ്ങുന്ന പശ്ചാത്തലത്തിൽ ഖത്തർ വീണ്ടും ഉണരാൻ ഒരുങ്ങുകയാണ്​. ഒപ്പം ലോകകപ്പ്​ യോഗ്യത റൗണ്ടിന്‍റെ തുടർമത്സരങ്ങൾക്ക്​ രണ്ടു ദിനം കഴിഞ്ഞാൽ തുടക്കമാവും. നിലവിൽ ആതിഥേയർ ഉൾപ്പെടെ 13 ടീമുകളാണ്​ ഖത്തറിലേക്ക്​ ടിക്കറ്റുറപ്പിച്ചത്​. ശേഷിക്കുന്ന 19 ടീമുകൾ ആരൊക്കെ​യെന്ന്​ ഇനിയും തെളിയാനുണ്ട്​. മാർച്ച്​ 30നു​ മുമ്പായി ഇവരിൽ 17 ടീമുകളുടെയും ചിത്രം തെളിയും. മറ്റു ​രണ്ടു ടീമുകൾ ജൂണിൽ നടക്കുന്ന ഇന്‍റർകോണ്ടിനെന്‍റൽ ​​​േപ്ല ഓഫ്​ മത്സരങ്ങളിലൂടെ ഖത്തറിലേക്കുള്ള വരവ്​ ഉറപ്പിക്കും. ഏപ്രിൽ ഒന്നിന്​ ദോഹയിൽ നടക്കുന്ന ഫിഫ വാർഷിക ജനറൽ ബോഡി യോഗ​ത്തിനു പിന്നാലെ ലോകകപ്പ്​ മത്സരങ്ങളുടെ നറുക്കെടുപ്പ്​ നടക്കും.

യൂറോപ്പിൽ ഗ്രൂപ്​ റൗണ്ട്​ അവസാനിച്ചപ്പോൾ 10 ടീമുകളാണ്​ ഖത്തറിലേക്ക്​ യോഗ്യത നേടിയത്​. രണ്ടാം റൗണ്ട്​ മത്സരങ്ങൾ മാർച്ച്​ 24നു​ നടക്കും. 29നാണ്​ ഈ റൗണ്ടിന്‍റെ ഫൈനൽ. വിജയികളാവുന്ന നാല്​ ടീമുകൾക്ക്​ കൂടി ​യൂറോപ്പിൽനിന്നും ഖത്തറിലേക്ക്​ യോഗ്യത നേടാം.

ലാറ്റിനമേരിക്കയിലെ യോഗ്യത റൗണ്ടിലെ ശേഷിക്കുന്ന മത്സരങ്ങൾ ജനുവരി 27 അർധരാത്രിയോടെ തുടക്കമാവും. നിലവിൽ അർജന്‍റീന, ബ്രസീൽ ടീമുകളാണ്​ യോഗ്യത നേടിയത്​. മാർച്ച്​ 29 വരെ നീണ്ടു നിൽക്കുന്ന കാലയളവിൽ നാല്​ മത്സരങ്ങളാണ്​ ഒരോ ടീമിനും ബാക്കിയുള്ളത്​. രണ്ട്​ ടീമുകൾക്ക്​ കൂടി നേരിട്ട്​ ഖത്തറിലേക്ക്​ യോഗ്യത നേടാം. ഒരു ടീമിന്​ ഇന്‍റർ ​കോണ്ടിനെന്‍റൽ ​േപ്ലഓഫിലും കളിക്കാം. ആഫ്രിക്കൻ മൂന്നാം റൗണ്ടും മാർച്ചിൽ നടക്കും. കോൺകകാഫ്​ മൂന്നാം റൗണ്ട്​ മത്സരങ്ങൾ ജനുവരി 27ന്​ പുനരാരംഭിക്കും.