ക്വാറൻറീൻ ഹോട്ടലുകൾക്ക്​ ക്ഷാമം

ദോഹ: ഇന്ത്യ ഉൾപ്പെടെ ആറ്​ രാജ്യങ്ങളിൽനിന്ന്​ ഖത്തറിലേക്ക്​ വരുന്ന യാത്രക്കാർക്ക്​ ക്വാറൻറീൻ നിർബന്ധമാക്കിയതിന്​ പിന്നാലെ ​ഹോട്ടലുകളും മികൈനീസും കിട്ടാനില്ലാത്ത അവസ്​ഥ. രണ്ട്​, 10 ദിവസങ്ങളിലേക്കാണ്​ പുതിയ യാത്രാനയ പ്രകാരം ക്വാറൻറീൻ നിർബന്ധമായത്​. ഡിസ്​കവർ ഖത്തറിൽ നിലവിലെ സ്​റ്റാറ്റസ്​ അനുസരിച്ച്​ ആഗസ്​റ്റ്​ 22വരെ 10 ദിവസ ഹോട്ടൽ ക്വാറൻറീനുള്ള ഹോട്ടല്‍ മുറികള്‍ വെബ്‌സൈറ്റില്‍ ലഭ്യമല്ല. എന്നാൽ, രണ്ടു ദിവസ ക്വാറൻറീനായുള്ള ഹോട്ടലുകൾക്ക്​ പ്രയാസവുമില്ല.

അതേസമയം, കഴിഞ്ഞ ദിവസങ്ങളിൽ കൂടുതൽ ഹോട്ടലുകളെ ലിസ്​റ്റിൽ ഉൾപ്പെടുത്തി പരിഹാരത്തിനും ഡിസ്​കവർ ഖത്തർ ശ്രമിക്കുന്നുണ്ട്​.മണിക്കൂറുകൾക്കുള്ളിൽതന്നെ ഇതുസംബന്ധിച്ച അപ്​ഡേഷനും വെബ്​സൈറ്റിൽ ലഭ്യമാവുന്നതായാണ്​ വിവരം​.

വരുംദിവസങ്ങളിൽ കൂടുതൽ ഹോട്ടലുകൾ ഡിസ്​കവർ ഖത്തർ ഏറ്റെടുക്കുന്നതോടെ പ്രശ്​നങ്ങൾക്ക്​ പരിഹാരമാവുമെന്ന്​ ട്രാവൽ-ടൂറിസം മേഖലയിലുള്ളവർ പറയുന്നു.

അവധി കഴിഞ്ഞ്​ മടങ്ങാനിരിക്കുന്ന യാത്രക്കാർക്കാണ്​ ക്വാറൻറീൻ ഹോട്ടലുകളുടെ അപര്യാപ്​തത തിരിച്ചടിയാവുന്നത്​. ജൂ​ൈല​ 12 മുതൽ ക്വാറൻറീൻ ഒഴിവാക്കിയ യാത്രാനയത്തിന്​ പിന്നാലെ, പെരുന്നാളും സ്​കൂൾ അവധിയും കണക്കാക്കി നാട്ടിലേക്ക്​ മടങ്ങിയ മലയാളികൾ ഉൾപ്പെടെയുള്ളവർ തിരിച്ചുവരവ്​ തുടങ്ങിയപ്പോഴാണ്​ ആഗസ്​റ്റ്​ രണ്ട്​ മുതൽ ആ​രോഗ്യമന്ത്രാലയം ഹോട്ടൽ ക്വാറൻറീൻ നിർബന്ധമാക്കിയത്​. ഖത്തറിൽനിന്ന്​ രണ്ട്​ ഡോസ്​ വാക്​സിൻ സ്വീകരിച്ചവർക്ക്​ രണ്ടു ദിവസമാണ്​ ഹോട്ടൽ ക്വാറൻറീൻ. ഇവർക്ക്​ രണ്ടാം ദിവസം ആർ.ടി.പി.സി.ആർ ​പരിശോധനക്കു​ശേഷം വീടുകളിലേക്ക്​ മടങ്ങാം.

മറ്റു രാജ്യങ്ങളില്‍നിന്ന് അംഗീകൃത വാക്‌സിനെടുത്തവര്‍ക്ക് 10 ദിവസത്തെ ഹോട്ടല്‍ ക്വാറൻറീനാണ്​ ഏര്‍പ്പെടുത്തിയിരിക്കുന്നത്. ഓൺ അറൈവൽ, സന്ദർശക വിസകൾക്കെല്ലാം 10 ദിവസ ക്വാറൻറീൻ നിർബന്ധമായതോടെ മുൻകാലങ്ങളേക്കാൾ ആവശ്യക്കാർ കൂടി.

പുതിയ അധ്യയനവർഷത്തിൽ സ്​കൂളുകൾ തുറക്കാൻ ഒരുങ്ങുന്നതിനാൽ കുടുംബങ്ങൾ ഒന്നിച്ചാണ്​​ തിരികെയാത്ര. ഇവർക്കെല്ലാം ​ക്വാറൻറീൻ നിർബന്ധമായതിനാൽ ബുക്കിങ്ങും സജീവമാണ്​.

രണ്ടു ദിവസ ഹോട്ടലുകൾ കിട്ടാൻ പ്രയാസമില്ലെങ്കിലും 10 ദിവസ മുറികൾക്ക്​ കടുത്ത ക്ഷാമം നേരിടുന്നുണ്ട്​. ആഗസ്​റ്റ്​ അവസാന വാരത്തിലാണ്​ നിലവിൽ മുറികൾ ലഭ്യമാവുന്നതായി കാണുന്നത്​. ചെലവ്​ ചുരുങ്ങിയ ക്വാറൻറീൻ കേന്ദ്രമായ മികൈനീസ്​ ആഗസ്​റ്റിൽ ബുക്കിങ് ഫുള്ളാണ്​. തിങ്കളാഴ്​ചയിലെ സ്​റ്റാറ്റസ്​ പ്രകാരം സെപ്​റ്റംബർ എട്ട്​ മുതലാണ്​ ഇവിടെ​ ബുക്കിങ്​ ഒഴിവുള്ളത്​. 1377 റിയാലാണ്​ 10 ദിവസ മികൈനീസ്​ ക്വാറൻറീൻെറ തുക.

അതേമസയം, രണ്ടു ദിവസം ഹോട്ടൽ ക്വാറൻറീന്​ 1100 മുതൽ 1800 റിയാൽ വരെയാണ്​ ഈടാക്കുന്നത്​. 10 ദിവസ ഹോട്ടൽ ക്വാറൻറീന്​ 4700 മുതൽ 6000 റിയാൽ വരെയാണ്​ ​െചലവ്​.

ഖത്തര്‍ മുഖേനെ യു.എ.ഇ, ഒമാൻ എന്നിവിടങ്ങളിലേക്ക്​ പോവുന്ന പ്രവാസികൾ ഓൺ അറൈവൽ വിസയിലും എത്തുന്നുണ്ട്​. യു.എ.ഇയിലേക്ക്​ ഇന്ത്യയിൽനിന്ന്​ നേരിട്ട്​ വിമാനയാത്ര തുടങ്ങിയതിനാൽ, കഴിഞ്ഞ ഒരാഴ്​ചയായി ദുബൈ യാത്രക്കാർ കുറവാണ്​​. എങ്കിലും ഇന്ത്യ, ശ്രീലങ്ക, പാകിസ്​താൻ, ഫിലിപ്പീൻസ്​ തുടങ്ങിയ രാജ്യങ്ങളിൽനിന്ന്​ ഖത്തറിലേക്കുള്ള ഒഴുക്കിന്​ തടസ്സമില്ല. സന്ദർശക വിസയിൽ, മറ്റു രാജ്യങ്ങളിൽനിന്നെത്തുന്നവരും ഹോട്ടലുകൾ തിരഞ്ഞെടുക്കുന്നത്​ ഈ മേഖലയിൽ തിരക്ക്​ കൂടാൻ കാരണമായി.

ഹോട്ടൽ ഉറപ്പിച്ചശേഷം ടിക്കറ്റ്​

അവധി കഴിഞ്ഞ്​ ഖത്തറിലേക്ക്​ വരാനൊരുങ്ങുന്ന പ്രവാസികൾ ഹോട്ടൽ ക്വാറൻറീൻ ഉറപ്പിച്ചശേഷം വിമാന ടിക്കറ്റ്​ നോക്കുന്നതാവും സുരക്ഷിതം. ഹോട്ടൽ മുറികൾക്ക്​ ക്ഷാമം നേരിടുന്നതിനാൽ ഈ ജാഗ്രത നല്ലതാണ്​. ഹോട്ടൽ ബുക്ക്​ ചെയ്യു​േമ്പാൾ യാത്ര​െചയ്യുന്ന വിമാനത്തിൻെറ വിവരങ്ങൾ നൽകണമെന്നുണ്ട്​.

എന്നാൽ, ഇത്​ എഡിറ്റ്​ ചെയ്യാനും പിന്നീട്​ ഇ–മെയിലിലൂടെ തിരുത്താനും ഡിസ്​കവർ ഖത്തർ അനുവദിക്കുന്നുണ്ട്​. വിമാന ടിക്കറ്റ്​ എടുത്ത ശേഷം, ഹോട്ടൽ ക്വാറൻറീൻ ലഭ്യമല്ലാത്തതിനാൽ യാത്ര പ്രയാസപ്പെടുന്നവർക്ക്​ ഈ സൗകര്യം ഉപയോഗിക്കുന്നതാണ്​ ഉചിത​ം.