ഖത്തറിലെ പ്രവാസി സമ്മാൻ ജേതാവ്​ ഹസൻ ചൗ​ഗ്ലെ അന്തരിച്ചു

ദോഹ: ഖത്തറിലെ മുതിർന്ന ഇന്ത്യൻ ബിസിനസുകാരനും പ്രവാസി ഭാരതീയ സമ്മാൻ ജേതാവുമായിരുന്ന ഹസന്‍ ചൗ​ഗ്ലെ എന്ന ഹസന്‍ അബ്ദുല്‍ കരീം ചൗഗ്ലേ (74) നിര്യാതനായി. സ്വദേശമായ മഹാരാഷ്​ട്രയിലെ രത്​നഗിരിയിലായിരുന്നു അന്ത്യം. 1977ൽ ഖത്തറിൽ പ്രവാസിയായെത്തി ബിസിനസുകാരനും സംഘാടകനും സാമൂഹ്യ പ്രവർത്തകനുമായി പ്രവാസി ഇന്ത്യക്കാർക്കിടയിലെ നിറസാന്നിധ്യമായി മാറിയ ജീവിതം പൂർത്തിയാക്കിയാണ്​ ചൗ​ഗ്ലെ ഓർമയാവുന്നത്​. ഒരു വർഷം മുമ്പാണ്​ ഖത്തറിൽ നിന്നും നാട്ടിലേക്ക്​ മടങ്ങിയത്​.

ഇന്ത്യൻ എംബസി ​അപെക്​സ്​ സംഘടനകളായ ഇന്ത്യൻ കൾചറൽ സെൻറർ (ഐ.സി.സി), ഇന്ത്യന്‍ കമ്യൂണിറ്റി ബെനവലൻറ്​ ഫോറം (ഐ.സി.ബി.എഫ്​), ഇന്ത്യന്‍ ബിസിനസ് ആൻറ്​ പ്രൊഫഷണല്‍ നെറ്റ്‌വര്‍ക്ക് എന്നിവയുടെ നേതൃസ്ഥാനത്ത് പ്രവര്‍ത്തിച്ചിരുന്നു. പ്രമുഖ ഇന്ത്യൻ സ്​കൂളായ ഡി.പി.എസ് എം.ഐ.എസ്, സാവിത്രി ഫൂലെ യൂണിവേഴ്സിറ്റി ഖത്തർ ക്യാമ്പസ് എന്നിവ സ്​ഥാപിക്കുന്നതിൽ നിർണായക സാന്നിധ്യമായി.

2012ല്‍ ജയ്പൂരില്‍ നടന്ന പ്രവാസി ഭാരതീയ ദിവസില്‍ രാഷ്ട്രപതി പ്രതിഭ പാട്ടീലില്‍ നിന്നും സാമൂഹ്യ പ്രവർത്തന രംഗത്തെ മികവിന്​ പ്രവാസി ഭാരതീയ സമ്മാന്‍ പുരസ്​കാരം ഏറ്റുവാങ്ങി. 2011, 12, 13 വര്‍ഷങ്ങളിലെ 100 ശക്തരായ ഇന്ത്യന്‍ ബിസിനസുകാരില്‍ ഒരാളായി അറേബ്യന്‍ ബിസിനസ് തെരഞ്ഞെടുത്തിരുന്നു.

മഹാരാഷ്ട്രയിലെ രത്‌നഗിരിയില്‍ ജനിച്ച ഹസന്‍ ചൗ​ഗ്ലെ 1977ലാണ് ഖത്തറിലെത്തിയത്. മാന്‍വിര്‍ എന്‍ജിനിയറിങ്ങില്‍ ടെക്‌നിക്കല്‍ സൂപ്പര്‍വൈസറായി ഖത്തറില്‍ ജീവിതം ആരംഭിച്ച ഇദ്ദേഹം നേരത്തെ മുംബൈയില്‍ ലാര്‍സന്‍ ആൻറ്​ ടൂബ്രോയിലും പ്രവര്‍ത്തിച്ചിരുന്നു.

മൗലാനാ ആസാദ് നാഷണല്‍ ഉര്‍ദു യൂനിവേഴ്‌സിറ്റി, ഹൈദരബാദ് ആൻറ്​ ജാമിഅ ഉര്‍ദു, അലിഗഡ്, നോര്‍ത്ത് ഇന്ത്യന്‍ അസോസിയേഷന്‍, അന്‍ജുമാന്‍ മുഹിബ്ബാനെ ഉര്‍ദു ഹിന്ദ്, കോകാന്‍ സോഷ്യല്‍ ഫോറം, ഹല്‍ഖെ അല്‍ബാബെ കോകന്‍ തുടങ്ങി നിരവധി സംഘടനകളില്‍ പ്രവര്‍ത്തിച്ചു.