പ്രവാസി പ്രശ്​നങ്ങൾ: ഡോം ഖത്തർ മലപ്പുറം കലക്​ടർക്ക്​ നിവേദനം നൽകി

ദോഹ: ഖത്തറിലെ മലപ്പുറം ജില്ലക്കാരുടെ കൂട്ടായ്മയായ ഡയസ്പോറ ഓഫ് മലപ്പുറം ഭാരവാഹികൾ മലപ്പുറം ജില്ല കലക്ടർ പി. ഗോപാലകൃഷ്ണനുമായി കൂടിക്കാഴ്ച നടത്തി. പ്രവാസികളുടെ പ്രധാനപ്പെട്ട വിഷയങ്ങൾ കലക്ടറുടെ ശ്രദ്ധയിൽപെടുത്താൻ കഴിഞ്ഞെന്ന് യോഗത്തിൽ പങ്കെടുത്ത ഡോം ഖത്തർ പ്രസിഡൻറ്​ വി.സി. മശ്ഹൂദ്, രക്ഷാധികാരി അച്ചു ഉള്ളാട്ടിൽ എന്നിവർ പറഞ്ഞു. പ്രവാസികൾ അനുഭവിക്കുന്ന പ്രശ്നങ്ങളോട് അനുഭാവപൂർണമായ പ്രതികരണമാണ് ജില്ല കലക്ടർ പ്രകടിപ്പിച്ചത്.

പ്രവാസികൾ അനുഭവിക്കുന്ന പ്രയാസങ്ങൾ ഉൾക്കൊള്ളിച്ചുകൊണ്ടുള്ള നിവേദനം പ്രസിഡൻറ്​ വി.സി. മശ്ഹൂദ് കലക്ടർക്ക് കൈമാറി.നാട്ടിലുള്ള പ്രവാസികൾ ഉൾപ്പെടുന്ന മലപ്പുറം ജില്ലക്കാർ അനുഭവിക്കുന്ന വാക്സിനേഷൻ ലഭ്യതക്കുറവ്, ജോലി നഷ്​ടമായ സംഭവങ്ങൾ, പ്രവാസം മതിയാക്കി നാട്ടിലേക്ക് തിരിച്ചെത്തുന്നവരുടെ പുനരധിവാസം, തൊഴിൽ മേഖലയും വൈദഗ്ധ്യവും അടിസ്ഥാനമാക്കിയുള്ള പ്രവാസികളുടെ വിവരങ്ങൾ ഉൾക്കൊള്ളിച്ചുകൊണ്ടുള്ള പോർട്ടൽ തുടങ്ങിയ വിഷയങ്ങൾ കലക്​ടർക്കു മുമ്പാകെ ബോധിപ്പിച്ചു.