പരിസ്ഥിതി ബോധവത്​കരണവ​ുമായി കതാറയിൽ പ്രദർശനം

ദോഹ: കടൽ പരിസ്​ഥിതിക്ക് ദോഷകരമാകുന്ന പ്ലാസ്​റ്റിക് മാലിന്യങ്ങളുമായി ബന്ധപ്പെട്ട ബോധവത്​കരണം മുന്നോട്ടുവെച്ചും പരിസ്​ഥിതി സംരക്ഷണത്തി​െൻറ പ്രാധാന്യം വ്യക്തമാക്കുന്ന സന്ദേശമുയർത്തിയും കതാറയിൽ 'പ്ലാസ്​റ്റിക് സീസ്​: ഇക്കോ-ഫേബൽസ്​ ഒാൺ ഷോ' പ്രദർശനത്തിന് തുടക്കമായി. ഖത്തരി കലാകാരിയായ ഫാത്തിമ മുഹമ്മദും ഇറ്റാലിയൻ കലാകാരിയായ എലിസെബത്ത വരിനും സംയുക്തമായാണ് പ്രദർശനം സംഘടിപ്പിക്കുന്നത്. കതാറയിൽ നടന്ന പ്രദർശനത്തി​െൻറ ഉദ്ഘാടനച്ചടങ്ങിൽ ഖത്തറിലെ ഇറ്റാലിയൻ അംബാസഡർ അലെസാേന്ദ്ര പ്രുണാസ്​, ദോഹയിലെ യുനെസ്​കോ റീജനൽ ഓഫിസ്​ മേധാവി അന്ന പൗളിനി, ദേശീയ സാംക്രമികരോഗ മുന്നൊരുക്കസമിതി അധ്യക്ഷനും എച്ച്.എം.സി പകർച്ചവ്യാധി രോഗ​വിഭാഗം മേധാവിയുമായ ഡോ. അബ്​ദുല്ലത്തീഫ് അൽ ഖാൽ, വിവിധ രാജ്യങ്ങളുടെ അംബാസഡർമാർ തുടങ്ങിയവർ പങ്കെടുത്തു.

ഇറ്റാലിയൻ എംബസിയുടെ സഹകരണത്തോടെ കതാറയിലെ 19ാം നമ്പർ കെട്ടിടത്തിലാണ് പ്രദർശനം. സമുദ്രങ്ങളെയും പരിസ്​ഥിതിയെയും സംരക്ഷിക്കുന്നതി​െൻറ പ്രാധാന്യവും കടലിലെ പ്ലാസ്​റ്റിക് മാലിന്യങ്ങളുടെ അപകടവും വ്യക്തമാക്കുന്ന വൈജ്ഞാനിക, ബോധവത്​കരണ പ്രദർശനത്തിനാണ് കതാറയിൽ തുടക്കംകുറിച്ചിരിക്കുന്നതെന്ന് കതാറ ജനറൽ മാനേജർ പ്രഫ. ഡോ. ഖാലിദ് ബിൻ ഇബ്റാഹിം അൽ സുലൈതി പറഞ്ഞു. പ്ലാസ്​റ്റിക് മാലിന്യങ്ങളുടെ പുനഃചംക്രമണം സംബന്ധിച്ച് പ്രദർശനം ഏറെ മുന്നിട്ടുനിൽക്കുന്നുവെന്നും കലയിലൂടെയും ക്രിയാത്മക പ്രവർത്തനങ്ങളിലൂടെയും പരിസ്​ഥിതിയുമായി ബന്ധപ്പെട്ട പ്രവർത്തനങ്ങളെ കതാറ ഏറെ താൽപര്യത്തോടെയാണ് വീക്ഷിക്കുന്നതെന്നും ഡോ. അൽ സുലൈതി വ്യക്തമാക്കി.

പരിസ്​ഥിതിയുടെ നാശവും കാലാവസ്​ഥാ വ്യതിയാനവും നിരവധി സമൂഹങ്ങളുട നിലനിൽപിന് ഭീഷണിയാണെന്നും ഇനിയും സമയം മുന്നോട്ടുപോകുന്നതിന് മുമ്പായി ഈ വിഷയങ്ങളെ അന്താരാഷ്​ട്ര സമൂഹം ഗൗരവത്തിൽ അഭിമുഖീകരിച്ച് നടപടികൾ കൈക്കൊള്ളണമെന്നും ഇറ്റാലിയൻ അംബാസഡർ അലെസാേന്ദ്രാ പ്രുണാസ്​ പറഞ്ഞു. പ്രദർശനത്തിന് എല്ലാ പിന്തുണയും നൽകിയ കതാറ കൾചറൽ വില്ലേജ് ഫൗണ്ടേഷ​െൻറ ശ്രമങ്ങളെ അഭിനന്ദിക്കുന്നുവെന്നും പ്രദർശനം അതി​െൻറ സന്ദേശംകൊണ്ട് ഏറെ മികച്ചതാണെന്നും അദ്ദേഹം വ്യക്തമാക്കി. ലോകജനത നേരിടുന്ന പ്രധാനപ്പെട്ട രണ്ടു പ്രശ്നങ്ങളെ ഉയർത്തിക്കാട്ടുന്ന രണ്ട് കലാകാരികളുടെ പ്രദർശനമാണിതെന്ന് ഡോ. അബ്​ദുല്ലതീഫ് അൽ ഖാൽ പറഞ്ഞു.