ആവേശം അണപൊട്ടി; ആഘോഷം മുറികളിൽ

ദോഹ: അലകടലായി തെരുവുകൾ നിറയേണ്ട ആഘോഷങ്ങളെ തടയണകെട്ടി പിടിച്ചുനിർത്തിയാണ്​ ഞായറാഴ്​ച പകൽ ഖത്തറിലെ ഫുട്​ബാൾ ആരാധകർ കൊണ്ടാടിയത്​. റിയോഡെ ജനീറോയിലെ മാറക്കാനയുടെ കളിമുറ്റത്ത്​ ലയണൽ മെസ്സിയും കൂട്ടുകാരും കോപ അമേരിക്കയിൽ മുത്തമിട്ടപ്പോൾ, അർജൻറീനക്ക്​ ഏറെ ആരാധകരുള്ള ഖത്തറിൻെറ മണ്ണിൽ ആഘോഷനൃത്തങ്ങളൊന്നുമില്ല. എങ്കിലും, സമൂഹമാധ്യമങ്ങളെ അവർ തങ്ങളുടെ നൃത്തവേദിയാക്കി മാറ്റി. ഫേസ്​ബുക്കിലും ഇൻസ്​റ്റഗ്രാമിലും, പിന്നെ വാട്​സ്​ആപ്​ ഗ്രൂപ്പുകളിലും പോസ്​റ്ററുകളും സന്ദേശങ്ങളുംകൊണ്ടു​ നിറഞ്ഞു. ​

കോവിഡ്​ സാഹചര്യത്തിൽ സംഘം ചേരുന്നതിനും മറ്റും കടുത്ത നിയന്ത്രണങ്ങളുള്ളതിനാൽ, സ്വന്തം മുറികളിൽ കൂട്ടുകാർക്കൊപ്പം അർജൻറീനയുടെ വെള്ളയും ആകാശ നീലയും കലർന്ന ജഴ്​സിയും, ബ്രസീലിൻെറ മഞ്ഞക്കുപ്പായവും അണിഞ്ഞ്​ ​പന്തയം വെച്ചും, വീറും വാശിയുമായും കളികണ്ടു. കളിയുടെ 22ാം മിനിറ്റിൽ എയ്​ഞ്ചൽ ഡി മരിയയുടെ ഗോളിൽ അർജൻറീന മുന്നിലെത്തിയപ്പോൾതന്നെ ആഘോഷങ്ങൾക്ക്​ കിക്കോഫ്​ കുറിച്ചിരുന്നു. ഒടുവിൽ ഫുൾടൈമിൽ അർജൻറീനയുടെ കിരീടധാരണ​േത്താടെ കോപ അമേരിക്കക്ക്​ ലോങ്​ വിസിൽ മുഴങ്ങിയപ്പോൾ താമസസ്ഥലങ്ങളിൽതന്നെ ആഘോഷമായി.

കേക്ക്​ മുറിച്ചും ലഡു വിതരണം ചെയ്​തും ആർപ്പുവിളിച്ചും ഞായറാഴ്​ച പകലിനെ അവർ അവിസ്​മരണീയമാക്കി. ​രാത്രിയിലെ യൂറോകപ്പ് ഇറ്റലി- ഇംഗ്ലണ്ട്​ യൂറോകപ്പ്​​ ഫൈനൽ കൂടിയായതോടെ ​ഞായർ ശരിക്കുമൊരു സൂപ്പർ സൺഡേ ആയി മാറി. അർജൻറീനയും ബ്രസീലും ഉൾപ്പെടുന്ന ലാറ്റിനമേരിക്കൻ ഫുട്​ബാളിന്​ ഏറെ പ്രിയമുള്ള മണ്ണാണ്​ മധ്യേഷ്യ. 2022 ലോകകപ്പിൻെറ വേദി​െയന്ന നിലയിൽ ഖത്തർ ഏറെ ആവേശത്തോടെയാണ്​ വൻകരയുടെ മേളക്കായി കാത്തിരുന്നത്​.

'ഫുട്​ബാൾ കാണുന്ന കാലം മുതൽ കാത്തിരുന്നതായിരുന്നു ഈ നിമിഷം. പ്രിയപ്പെട്ട താരം ലയണൽ മെസ്സിയുടെ ഒരു രാജ്യാന്തര കിരീടം. നാട്ടിലായിരുന്നെങ്കിൽ ഈ ജയം റോഡ്​ നീളെ ആഘോഷമാക്കാമായിരുന്നു. കൂട്ടുകാരെല്ലാം നാട്ടിൽ ആഘോഷം പൊടിപൊടിക്കുകയാണ്​. ഓരോ ലോകകപ്പും കോപ അമേരിക്കയും അവസാനിക്കു​േമ്പാഴും നിരാശപ്പെടുന്ന അർജൻറീന ആരാധകൻ എന്ന നിലയിൽ ജീവിതത്തിൽ ഏറ്റവും വലിയ നഷ്​ടമാണ്​ ഈ കിരീട വിജയം ആഘോഷിക്കാൻ കഴിയാതെ പോയത്​്. എങ്കിലും ​ദോഹയിലെ മുറിയിൽ ഞങ്ങൾ കേക്ക്​ മുറിച്ച്​ അതിൻെറ സങ്കടം തീർത്തും' -കടുത്ത അർജൻറീന ആരാധകനായ വടകര സ്വദേശി സമീറിൻെറ വാക്കുകൾ ഇങ്ങനെ.