അമിതഭാരമായി ഉയർന്ന വാടക

ദോഹ: കോവിഡ് മഹാമാരിയേൽപ്പിച്ച ആഘാതത്തിൽ നിന്നും പൂർണമായും കരകയാറാതെ വലയുന്ന രാജ്യത്തെ ചെറുകിട വ്യാപാരികൾക്ക് ഉയർന്ന വാടക നിരക്ക് വലിയ ഭാരമാകുന്നതായി പരാതി. ലോകത്ത് വലിയ സാമ്പത്തിക തളർച്ചക്ക് വഴിയൊരുക്കിയ കോവിഡ് കാരണമുണ്ടായ നഷ്​ടത്തിൽ നിന്ന് ചെറുകിട വ്യാപാരികൾ 50 ശതമാനം പോലും മുക്തമായിട്ടില്ലെന്ന റിപ്പോർട്ടുകൾക്കിടയിലാണ് അധിക തലവേദനയായി ഉയർന്ന വാടക നിരക്കും വന്നിരിക്കുന്നത്.

കഴിഞ്ഞ വർഷത്തെ ലോക്ക്ഡൗണും ​​കോവിഡ്​ നിയന്ത്രണങ്ങളുടെ ഭാഗമായി ചില വ്യാപാരങ്ങൾക്കേർപ്പെടുത്തിയ വിലക്കുകളും കാരണം വലിയ നഷ്​ടമാണുണ്ടാക്കിയതും വരുമാനത്തെ വലിയ തോതിൽ അത് ബാധിച്ചുവെന്ന്​ വ്യാപാരികൾ പറയുന്നു. കോവിഡ് നിയന്ത്രണങ്ങൾ ഘട്ടം ഘട്ടമായി പിൻവലിക്കുമ്പോഴും മഹാമാരിയുടെ ആഘാതത്തിൽ നിന്നും കരകയറാനാകാതെ കിതക്കുകയാണെന്ന്​ ചെറുകിട വ്യാപാരികൾ വ്യക്​തമാക്കുന്നു. മലയാളികൾ ഉ​ൾപ്പെടെയുള്ള ആയിരക്കണക്കിന്​ വ്യാപാരികൾക്കാണ്​ താങ്ങനാവാത്ത വാടകയുടെ ഭാരം പേറുന്നത്​.

ബാർബർ ഷോപ്പുകൾ, ഹാർഡ്​വെയർ സ്​ഥാപനങ്ങൾ, ടീ സ്്റ്റാളുകൾ, റെസ്​റ്റോറൻറുകൾ, പലചരക്ക് സ്​ഥാപനങ്ങൾ, കഫ്​റ്റീരിയ തുടങ്ങിയ മേഖലകളാണ്​ ഏറ്റവും കൂടുതൽ ദുരിതം പേറുന്നത്. 2020ൽ ഏറെ പ്രയാസപ്പെട്ട ഈ വിഭാഗങ്ങൾ ഇപ്പോൾ, കോവിഡ്​ നിയന്ത്രണങ്ങളിൽ ഇളവുകൾ നൽകപ്പെടുകയും, രാജ്യത്തെ വ്യാപാര-വ്യവസായ മേഖല പഴയ താളത്തിലേക്ക്​ തിരിച്ചെത്തുകയും ചെയ്​തതോടെ തിരിച്ചുവരവിൻെറ പാതയിലാണിപ്പോൾ.

അതേമസയം, പ്രതിസന്ധി കാലത്ത്​ ചില കെട്ടിട ഉടമകൾ മൂന്നുമാസം വരെ വാടകയിൽ ഇളവു നൽകിയതായി കച്ചവടക്കാരെ ഉദ്ധരിച്ച്​ 'ഗൾഫ്​ ടൈംസ്'​ റിപ്പോർട്ട്​ ചെയ്​തു. ഐൻഖാലിദിൽ 22,000 റിയാൽ വാടക നൽകിയ ഹോട്ടൽ വ്യാപാരി നഷ്​ടത്തിലായതോടെ, കഴിഞ്ഞ വർഷാവസാനം കടതന്നെ പൂട്ടിയാണ്​ രക്ഷപ്പെട്ടത്​. കടഅടച്ചിട്ട കാലത്തും വാടക ഇളവില്ലാതെ തന്നെ ഈടാക്കിയതായി മതാർഖദീമിൽ ദീർഘകാലമായി ബാർബർഷോപ്പ്​ നടത്തുന്ന വ്യക്​തി പറയുന്നു. മൂന്നാം ഘട്ട ഇളവുകൾ പ്രഖ്യാപിച്ചതോടെയാണ്​ ഇവർ കട തുറക്കാൻ ആരംഭിച്ചത്​. ആൾതിരക്കേറിയ പ്രധാന ബിസിനസ്​ കേന്ദ്രങ്ങളിലൊന്നായ നജ്​മയിൽ നിന്നുള്ള കച്ചവടക്കാരും ഇതേ പരാതികൾ ഉന്നയിക്കുന്നു. പൊതുവിൽ മാർക്കറ്റ്​ ഇടിഞ്ഞിട്ടും വാടക ഇനത്തിൽ കുറവിനോ, ഇളവിനോ കെട്ടിട ഉടമകൾ തയ്യാറാകുന്നില്ലെന്നാണ്​ പരാതി. മാത്രമല്ല, പുതുതായി സ്​ഥാപനങ്ങൾ തുറക്കാൻ ആഗ്രഹിക്കുന്നവരിൽ നിന്നും 23,000 റിയാൽ വരെ വാടകയും ആവശ്യപ്പെടുന്നതായി കച്ചവടക്കാർ ആക്ഷേപമുന്നയിക്കുന്നു. ഇൻഡസ്​ട്രിയൽ ഏരിയയിൽ വാഹന സർവീസ്​ ഗാരേജ്​ നടത്തുന്നയാൾക്കുമുണ്ട്​ വാടകയുടെ അമിതഭാരത്തെ കുറിച്ച്​ ആശങ്ക പങ്കുവെക്കാൻ. സെമി ഓപൺ സ്​പേസ്​ ഗാരേജിനായി എല്ലാ മാസവും 30,000 റിയാൽ വാടക നൽകാൻ പ്രയാസപ്പെടുന്നതായി അദ്ദേഹം പറയുന്നു. ബ്രിട്ടൻ ആസ്​​ഥാനമായ 'മണി ഡോട്​ കോ ഡോട്​ യുകെ'യുടെ പഠനം പ്രകാരം ഖത്തറി​െല ഒരാളുടെ വരുമാനത്തിൽ 43.7 ശതമാനവും വാടകക്കായി നൽകുന്നുവെന്നാണ്​ കണ്ടെത്തുന്നത്​. കോവിഡിനെ തുടർന്നുണ്ടായ സാമ്പത്തിക ആഘാതങ്ങളെ മറികടക്കുന്നതിനായി സർക്കാർ തലത്തിൽ നിരവധി ഇടപെടലുകളും ഇളവുകളുമാണ്​ ജനങ്ങൾക്കായി പ്രഖ്യാപിച്ചത്​. സ്വകാര്യ സ്​ ഥാപനങ്ങൾക്കായി ഖത്തർ സർക്കാർ 7500 കോടി റിയാലാണ് പ്രഖ്യാപിച്ചത്. ബാങ്കുകൾക്ക് ലോൺ തിരിച്ചടവുകൾ നീട്ടി വെക്കാൻ ഖത്തർ സെൻട്രൽ ബാങ്ക്​ രാജ്യത്തെ ബാങ്കുകൾക്കും ധാനകാര്യ സ്​ഥാപനങ്ങൾക്കും നിർദേശം നൽകിയിരുന്നു. സ്​റ്റോക്​ എക്​സ്​ചേഞ്ചിൽ 1000 കോടി റിയാലാണ്​ സർക്കാർ ഫണ്ട്​ വർധിപ്പിച്ചത്​.