യൂറോപ്യൻ സൗഹൃദം: അയർലൻഡിനെതിരെ തോൽവി

ദോഹ: യൂറോപ്യൻ സൗഹൃദപോരാട്ടത്തിൽ ഖത്തറിന്​ രണ്ടാം അങ്കത്തിലും തോൽവി. അയർലൻഡ്​ മറുപടിയില്ലാത്ത നാല്​ ഗോളിനാണ്​ 2022 ലോകകപ്പ്​ ആതിഥേയരായ ഖത്തറിനെ വീഴ്​ത്തിയത്​. രണ്ടു ദിവസം മുമ്പ്​ പോർചുഗലിനെതിരെ പുറത്തെടുത്ത പോരാട്ടവീര്യം ഇക്കുറി ഖത്തറിന്​ പ്രകടിപ്പിക്കാൻ കഴിഞ്ഞില്ല.

കളിയുടെ നാലാം മിനിറ്റിൽ വെസ്​റ്റ്​ബ്രോംവിച്​ താരം കാളം റോബിൻസൺ ഖത്തർ വലകുലുക്കിയതോടെ കളിയിൽ മറൂൺ പടക്ക്​ താളംപിഴച്ചു.

തുടർന്ന്​ ആക്രമണം ശക്​തമാക്കിയ അയർലൻഡ്​ റോബിൻസണിൻെറ ഹാട്രിക്​ മികവിലാണ്​ ഖത്തറിനെ വീഴ്​ത്തിയത്​. 13ാം മിനിറ്റിൽ പെനാൽറ്റിയിലൂടെയും 53ാം മിനിറ്റിൽ ജെഫ്​ഹെൻഡ്രികിൻെറ ക്രോസിലുടെയും റോബിൻസൺ ഹാട്രിക്​ തികച്ചു.

59ാം മിനിറ്റിൽ ഷാനി ഡഫ്​ കൂടി നേടിയ ഗോളിലൂടെ അയർലൻഡ്​ പട്ടിക തികച്ചു. ക്രിസ്​റ്റ്യാനോ റൊണാൾഡോയും ആന്ദ്രെ സിൽവയും നയിച്ച പോർചുഗൽ മുന്നേറ്റത്തിന്​ മുന്നിൽ ശക്​തമായ പ്രതിരോധ കോട്ടയൊരുക്കി ഗോളുകൾ തടുത്തിട്ട ഖത്തർ,

കഴിഞ്ഞ ദിവസം ആ​ക്രമണത്തിലേക്ക്​ തന്ത്രം മാറ്റിയതോടെ പ്രതിരോധത്തിൽ വീഴ്​ചയായി. നവംബറിലാണ്​ ടീമിൻെറ അടുത്തഘട്ട സൗഹൃദ പോരാട്ടങ്ങൾ.