ഗാന്ധി ജയന്തി ഒരാഴ്​ച നീളുന്ന പരിപാടികളുമായി എംബസി

ദോഹ: ഗാന്ധി ജയന്തിയോടനുബന്ധിച്ച്​ ഒരാഴ്​ച നീളുന്ന പരിപാടികളുമായി ഖത്തർ ഇന്ത്യൻ എംബസി. ഇന്ത്യൻ സ്വാതന്ത്ര്യത്തിൻെറ 75ാം വാർഷികമായ അമൃത്​ മഹോത്സവിൻെറ കൂടി ഭാഗമായാണ്​ ഗാന്ധി ജയന്തി ഒരാഴ്​ച നീളുന്ന പരിപാടി​കളോടെ സമുചിതമായി നടത്താൻ തീരുമാനിച്ചത്​. ഇന്ത്യൻ കൾചറൽ സെൻററുമായി സഹകരിച്ച്​ നടത്തുന്ന പരിപാടികളുടെ ഉദ്​ഘാടനം ഒക്​ടോബർ രണ്ടിന്​ വൈകീട്ട്​ അഞ്ചിന്​​ ഐ.സി.സി അശോക ഹാളിൽ അംബാസഡർ ഡോ. ദീപക്​ മിത്തൽ നിർവഹിക്കും. രണ്ടു​ മുതൽ ഒമ്പതു വരെ പെയിൻറിങ്​ പ്രദർശനം, ഖത്തർ നഗരസഭ- പരിസ്ഥിതി മന്ത്രാലയവുമായി ചേർന്ന്​ ബീച്ച്​ ക്ലീനിങ്​, വൃക്ഷത്തൈ നടീൽ എന്നിവ നടക്കും. മൂന്നിന്​ ഓൾഡ്​ എയർപോർട്ട്​ പാർക്കിലാണ്​ വൃക്ഷങ്ങൾ നടുന്നത്​. ഒന്നിന്​ രാവിലെ 7.30ന്​ ഫറൈഹ കടൽത്തീരത്ത്​ ഇന്ത്യൻ പ്രവാസികളെ പ​ങ്കെടുപ്പിച്ച്​ ശുചീകരണ പ്രവർത്തനങ്ങൾ നടത്തും. അംബാസഡർ ദീപക്​ മിത്തലും ശുചീകരണ പ്രവൃത്തിയിൽ പങ്കാളിയാവും. രണ്ടിന്​ രാത്രി ഏഴിന്​ ഇന്ത്യൻ നർത്തകർ അണിനിരക്കുന്ന ഭാരത്​ ദർശൻ പരിപാടി, മൂന്നിന്​ രാത്രി ധീരദേശാഭിമാനികൾക്കും രക്തസാക്ഷികൾക്കും ആദരവായി വന്ദേമാതരം, അഞ്ചിന്​ രാത്രി ഏഴിന്​ ദേശഭക്തി ഗാനങ്ങളും സംഘ നൃത്തങ്ങളുമായി ഭാരത്​ ഭാഗ്യവിധാത തുടങ്ങി വിവിധ സംസ്ഥാനങ്ങളിൽനിന്നുള്ള കലാകാരന്മാർ അണിനിരക്കുന്ന വ്യത്യസ്​ത പരിപാടിക​േളാടെയാണ്​ ഗാന്ധി ജയന്തി ദിനം ആചരിക്കുന്നത്​.