വൈദ്യുതിയും ജലവും പാഴാക്കരുതെന്ന് കഹ്റമ പ്രസിഡൻറ്

ദോഹ: വൈദ്യുതിയും ജലവും ഉപയോഗിക്കുന്നിടത്ത് മിതത്വം  പാലിക്കണമെന്നും ഭാവി മുന്നിൽക്കണ്ട്​ ഇവ പാഴാക്കുന്നത്  ഒഴിവാക്കണമെന്നും കഹ്റമ പ്രസിഡൻറ് ഇൗസ ബിൻ  ഹിലാൽ അൽ കുവാരി പറഞ്ഞു. രാജ്യത്തെ ജലം, വൈദ്യുതി ദുരുപയോഗം തടയുന്നതിനും  മിതോപയോഗം ശീലമാക്കുന്നതിനുംബോധവത്​കരണം നടത്താനായി ദേശീയടിസ്​ഥാനത്തിൽ  ആരംഭിച്ച തർശീദിന് കാര്യമായ സ്വാധീനം  പൊതുജനങ്ങളിലുണ്ടായിട്ടില്ലെന്നും അദ്ദേഹം കൂട്ടിച്ചേർത്തു.  സുരക്ഷിതമായ ജീവിതം നയിക്കുന്നതിന് വൈദ്യുതിയും  ജലവും പാഴാക്കുന്നത് ഒഴിവാക്കണം. മിതത്വം പാലിക്കണം.  ഇവ നടക്കണമെന്നാണ് തർശീദ്  പദ്ധതിയിലൂടെ ലക്ഷ്യമിടുന്നത്​. ഒരു ചതുരശ്രമീറ്റർ  വെള്ളം ഉൽപാദിപ്പിക്കുന്നതിനുള്ള ചെലവ്​ അന്താരാഷ്​ട്ര വിപണിയിൽ  വാതകത്തി​െൻറ വിലക്ക് തുല്യമാണെന്നും പറഞ്ഞ അദ്ദേഹം  മികച്ച നിലവാരത്തോടെയുള്ള ജീവിതം മുന്നോട്ട്  നയിക്കുന്നതിന് ജലവും വൈദ്യുതിയും സബ്സിഡി  നിരക്കിലാണ് നൽകിക്കൊണ്ടിരിക്കുന്നതെന്നും ചൂണ്ടിക്കാട്ടി. 

ഉപഭോക്താക്കളിൽ അമിതഭാരം ഈടാക്കാതെ  അടിസ്​ഥാനാവശ്യങ്ങൾ പൂർത്തീകരിക്കുന്നതിനുള്ള  സൗകര്യം ചെയ്യുകയാണ് ഇതിലൂടെ ലക്ഷ്യമിടുന്നതെന്നും  അദ്ദേഹം സൂചിപ്പിച്ചു. വൈദ്യുതി, ജല ഉൽപാദന ചെലവ് വളരെ ഭാരിച്ചതാണെന്നും  എന്നാൽ സർക്കാറി​െൻറ പിന്തുണയും ആധുനിക  സാങ്കേതിക വിദ്യയും വില നിയന്ത്രിക്കുന്നതിലും  സന്തുലിതമായി നിലനിർത്തുന്നതിലും നിർണായക പങ്ക്  വഹിച്ചുവെന്നും അദ്ദേഹം പറഞ്ഞു. ഉപഭോഗം  കുറക്കുന്നതിന് തർശീദ് പദ്ധതി ആവശ്യപ്പെടുന്നില്ല.  എന്നാൽ ഇവ പാഴാക്കുന്നത്  അവസാനിപ്പിക്കുകയാണ്​ ലക്ഷ്യം. 

ആവശ്യമില്ലാതെ എ.സി ഉപയോഗിക്കുന്നതും വൈദ്യുത ലൈറ്റുകൾ  അണക്കാതെ നിലനിർത്തുന്നതും രാജ്യത്തിനും ജനങ്ങൾക്കും  നഷ്​ടമാണുണ്ടാക്കുന്നതെന്നും അദ്ദേഹം ചൂണ്ടിക്കാട്ടി. അതേസമയം, ആളോഹരി ഇനത്തിൽ 18 മുതൽ 20 ശതമാനം  വരെ വെള്ളവും വൈദ്യുതിയും സംരക്ഷിക്കുന്നതിൽ തർശീദ്  മുഖ്യപങ്ക് വഹിച്ചുവെന്നും ഈർജ്ജമേഖലയിൽ നിർണായക  നേട്ടമാണിതെന്നും അദ്ദേഹം സൂചിപ്പിച്ചു.