പെരുന്നാൾ നമസ്​കാരം രാവിലെ 5.15ന്​; ഈദ് ആശംസയുമായി ഖത്തർ അമീർ

ദോഹ: ബലി പെരുന്നാളിനോടനുബന്ധിച്ച് അമീർ ശൈഖ് തമീം ബിൻ ഹമദ് ആൽഥാനി അറബ്, ഇസ്​ലാമിക രാഷ്​ട്ര നേതാക്കൾക്കും ഭരണാധികാരികൾക്കും ആശംസയറിയിച്ചു. വിവിധ രാഷ്​ട്രനേതാക്കളിൽ നിന്നുള്ള ഈദ് ആശംസ അമീർ സ്വീകരിക്കുകയും ചെയ്തു.

അൽവജ്​ബ പാലസിൽ വെള്ളിയാഴ്​ച രാവിലെ നടക്കുന്ന പെരുന്നാൾ നമസ്​കാരത്തിൽ അമീർ പ​ങ്കെടുക്കും. രാജകുടുംബാംഗങ്ങളും പ്രാർഥനയിൽ പങ്കുചേരും. അമീരി ദിവാൻ എല്ലാവർക്കും ഈദ്​ ആശംസ നേർന്നു. വെള്ളിയാഴ്​ച രാവിലെ 5.15നാണ്​ തെരഞ്ഞെടുത്ത പള്ളികളിലും ഈദ്​ഗാഹുകളിലുമായി പെരുന്നാൾ നമസ്​കാരം.