ദോഹ ഫ്ലൈറ്റ് റീജ്യന്​ അന്താരാഷ്​ട്ര അംഗീകാരം

ദോഹ: ദോഹ ഫ്ലൈറ്റ് ഇൻഫർമേഷൻ റീജ്യനും (എഫ്.ഐ.ആർ), ദോഹ സെർച് ആൻഡ് റെസ്​ക്യൂ റീജ്യനും (എസ്.ആർ.ആർ) സ്​ഥാപിക്കുന്നതുമായി ബന്ധപ്പെട്ട ഖത്തർ നിർദേശത്തിന് അന്താരാഷ്​ട്ര സിവിൽ ഏവിയേഷൻ ഓർഗനൈസേഷൻ (ഐ.സി.എ.ഒ) കൗൺസിൽ തത്ത്വത്തിൽ അംഗീകാരം നൽകി. ഇതിൽ ഖത്തറി​െൻറ പരമാധികാരത്തിലുള്ള വ്യോമമേഖലയും ഉൾപ്പെടും. ഐ.സി.എ.ഒ സമിതിയുടെ 223ാമത് സെഷനിലാണ് ഖത്തർ നിർദേശത്തിന് അംഗീകാരം നൽകിയിരിക്കുന്നത്.

ഖത്തറി​െൻറ പരമാധികാരത്തിനു കീഴിലുള്ള വ്യോമമേഖലയിൽ അയൽരാജ്യത്തിന് പ്രാതിനിധ്യം നൽകുന്ന നിലവിലെ തീരുമാനം പിൻവലിക്കണമെന്നും ഖത്തറി​െൻറ നിർദേശത്തിൽ സൂചിപ്പിച്ചിട്ടുണ്ട്. ഷികാഗോ കൺവെൻഷൻ 11ാമത് അനുബന്ധത്തിലെ 2.1.1 ഖണ്ഡിക അടിസ്ഥാനമാക്കിയാണ് ഖത്തറി​െൻറ നിർദേശം.ഷികാഗോ കൺവെൻഷനിലെ ആർട്ടിക്കിൾ ഒന്ന് പ്രകാരം ഖത്തറിന് അതി​െൻറ പരമാധികാര മേഖലയിൽ ദോഹ എഫ്.ഐ.ആർ, എസ്.ആർ.ആർ സ്​ഥാപിക്കുന്നതിനുള്ള അവകാശമുണ്ടെന്ന് സിവിൽ ഏവിയേഷൻ ഓർഗനൈസേഷൻ വിലയിരുത്തി.

മേഖലയിൽ സുരക്ഷിതവും സുസ്ഥിരവുമായ വ്യോമ ഗതാഗത പ്രവർത്തനങ്ങൾ വികസിപ്പിക്കുകയും ആഗോള വ്യോമ ഗതാഗത മേഖല ശക്തിപ്പെടുത്താനുള്ള ഖത്തറി​െൻറ പ്രതിബദ്ധതയുമാണ് ഖത്തർ ലക്ഷ്യമിടുന്നത്.