കൾച്ചറൽ ഫോറം റിപാട്രിയേഷൻ വർക്ക്ഷോപ്
text_fieldsദോഹ: കൾച്ചറൽ ഫോറം ഖത്തർ കമ്യൂണിറ്റി സർവിസ് വിഭാഗം റിപാട്രിയേഷൻ വർക്ക്ഷോപ്പും ലീഗൽ വർക്ക്ഷോപ്പും സംഘടിപ്പിച്ചു. കുടുംബം പോറ്റാൻ കടൽകടന്ന് പ്രവാസ ലോകത്ത് എത്തുകയും ജീവിതം കരപറ്റിക്കാനുള്ള പരിശ്രമത്തിനിടയിൽ മരണത്തിന് കീഴടങ്ങുകയും ചെയ്യുന്നവരെ ഉറ്റവർക്ക് അവസാനമായി കാണാൻ നാട്ടിലെത്തിക്കുന്ന പ്രവൃത്തി വിശേഷിപ്പിക്കാൻ വാക്കുകളില്ലാത്തവിധം മഹത്തരമാണെന്ന് ഉദ്ഘാടനം ചെയ്ത ഐ.സി.ബി.എഫ് സെക്രട്ടറി മുഹമ്മദ് കുഞ്ഞി പറഞ്ഞു.
കൾച്ചറൽ ഫോറം വൈസ് പ്രസിഡന്റ് മുഹമ്മദ് റാഫി അധ്യക്ഷത വഹിച്ചു. റിപാട്രിയേഷൻ വിഭാഗം ഹെഡ് ഷെറിൻ മുഹമ്മദ്, ലീഗൽ സർവിസ് വിഭാഗം ഹെഡ് നൗഷാദ് ഒളിയത്ത് എന്നിവർ വിഷയാവതരണം നടത്തി.
ഖത്തറിൽ മരണപ്പെടുന്ന ഇന്ത്യക്കാരുടെ മൃതദേഹം നാട്ടിലെത്തിക്കാനുള്ള നടപടിക്രമങ്ങള്, ബന്ധപ്പെടേണ്ട മന്ത്രാലയങ്ങൾ, ശരിയാക്കേണ്ട രേഖകൾ, വിവിധ തരം കേസുകളുടെ സ്വഭാവം എന്നിവ വിശദീകരിക്കപ്പെട്ടു. നിയമ ബോധവത്കരണത്തിൽ ലേബർ, സിവിൽ നിയമങ്ങളെയും ബന്ധപ്പെടേണ്ട ഔദ്യോഗിക സംവിധാനങ്ങളെയും പരിചയപ്പെടുത്തി.
കൾച്ചറൽ ഫോറം പ്രസിഡന്റ് മുനീഷ് എ.സി ജസസേവന രംഗത്ത് സേവനം അർപ്പിക്കാൻ വേണ്ടി വർക്ക്ഷോപ്പിൽ പങ്കെടുത്ത 70ഓളം പ്രവർത്തകരെ പ്രത്യേകം അഭിനന്ദിച്ചു. കൾച്ചറൽ ഫോറം ജനറൽ സെക്രട്ടറി തസീൻ അമീൻ സ്വാഗതവും കമ്യൂണിറ്റി സർവിസ് വിങ് കൺവീനർ ഫൈസൽ എറണാകുളം നന്ദിയും പറഞ്ഞു. റിപാട്രിയേഷൻ ഫീൽഡ് ഹെഡ് റാസിഖ് കോഴിക്കോട്, റസാഖ് കാരാട്ട്, കൾച്ചറൽ ഫോറം വർക്കിങ് കമ്മിറ്റി അംഗങ്ങളായ റഷീദ് കൊല്ലം, ശരീഫ് ചിറക്കൽ തുടങ്ങിയവർ വർക്ക്ഷോപ്പിന് നേതൃത്വം നൽകി.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.