ഖത്തറിന്​ പാൽ ചുരത്താൻ വിമാനം കയറി പശുക്കളെത്തി

ദോഹ: ആദ്യമായാണ്​ രാജ്യത്ത്​ ഇത്തരമൊരു പരീക്ഷണം.  പാലിനായി പശുക്കളെ വളർത്തുന്നത്​ സാധാരണമാണെങ്കിലും അവയെ വിമാനം കയറ്റി രാജ്യത്തെത്തിക്കുകയെന്ന നവീനമായ  ആശയത്തിന്​ തുടക്കമിട്ടത്​ ദോഹയിലെ പവർ  ഇൻറർനാഷണൽ ഹോൾഡിങ്​ കമ്പനി ചെയർമാനും  പ്രസിഡൻറുമായ സിറിയൻ വ്യവസായി മൗതാസ്​ അൽഖയ്യാത്ത് ആണ്​. ​ആദ്യം ആശ്​ചര്യത്തോടെയാണ്​ ജനങ്ങൾ കേട്ടതെങ്കിലും അദ്ദേഹം അത്​ യാഥാർഥ്യമാക്കാനുള്ള ശ്രമങ്ങൾ  തുടങ്ങുകയായിരുന്നു. 
ഇപ്പോഴിതാ, അത്​ സംഭവിച്ചിരിക്കുന്നു. 165 യൂറോപ്യൻ  സങ്കരയിനം പശുക്കളുമായി ജർമനിയിൽനിന്നും ബുഡാപെസ്​റ്റ്​  വഴിയെത്തിയ വിമാനം ചൊവ്വാഴ്​ച രാത്രിയോടെ ദോഹയിൽ  ലാൻഡ്​ ചെയ്​തു. അൽഖോറിലെ ഉമ്മു അൽ ഹവായ  മേഖലയിലുള്ള ബലദ്​ന ഫാമിലേക്കാണ്​ അവയെ  കൊണ്ടുപോയത്​. ബലദ്​നയുടെ നീളൻ ട്രക്ക​ുകളിലായിരുന്നു  പശുക്ക​ളുടെ യാത്ര. ഉടൻ പാൽ നൽകാൻ പാകത്തിലുള്ള പശുക്കളെയാണ്​  എത്തിച്ചിരിക്കുന്നതെന്ന്​​ പവർ ഇൻറർനാഷണൽ  ഹോൾഡിങ്​ കമ്പനി വക്​താവ്​ അറിയിച്ചു. ആകെ 4,000  പശുക്കളെയാണ്​ കൊണ്ടുവരുന്നത്​. മൂന്നു ദിവസം കൂടു​​​ േമ്പാഴാണ്​ പശുക്കളുമായി വിമാനമെത്തുക. 60 വിമാന  സർവിസുകളെങ്കിലും ഇതിന്​ വേണ്ടിവരുമെന്നാണ്​ കരുതുന്നത്​.  അടുത്ത ഘട്ടത്തിൽ ആസ്​ട്രേലിയ, അമേരിക്ക  എന്നിവിടങ്ങളിൽനിന്നുള്ള പശുക്കളാണ്​ എത്തുക.  ഖത്തറിലേക്ക്​ പാലും അനുബന്ധ ഉൽപന്നങ്ങളും  പ്രധാനമായും വന്നിരുന്നത്​ സൗദി  അറേബ്യയിൽനിന്നായിരുന്നു. ജൂൺ അഞ്ചിന്​ ഉപരോധം  പ്രഖ്യാപിച്ചതോടെ ഇവക്ക്​ ക്ഷാമമുണ്ടാവുമെന്ന്​  തിരിച്ചറിഞ്ഞാണ്​ മൗതാസ്​ അൽഖയ്യാത്ത് പുതിയ  സംരംഭവുമായി ഇറങ്ങിയത്​. മുഴുവൻ  പശുക്കളുമെത്തുന്നതോടെ രാജ്യത്തി​​െൻറ 30 ശതമാനം പാൽ  ആവശ്യം നിറവേറ്റപ്പെടുമെന്നാണ്​ പ്രതീക്ഷിക്കുന്നതെന്ന്​  അദ്ദേഹം പറഞ്ഞു. പ്രധാനമായും നിർമാണമേഖലയിൽ കേന്ദ്രീകരിക്കുന്ന  അൽഖയ്യാത്ത്​, കാർഷിക മേഖലയിലേക്കും ശ്രദ്ധ  തിരിക്കുന്നതി​​െൻറ ഭാഗമായി നേരത്തേ തന്നെ ഡയറി  ഫാമുകളുടെ നടത്തിപ്പ്​ ആരംഭിച്ചിരുന്നു. അൽ​ ഖോറിൽ 70  ഫുട്​ബാൾ മൈതാനങ്ങളുടെ വലിപ്പത്തിലുള്ള സ്​ഥലത്താണ്​  ഫാം ഒരുക്കിയിരിക്കുന്നത്​. നേരത്തേ കപ്പൽ വഴി പശുക്കളെ  കൊണ്ടുവരാനാണ്​ പദ്ധതിയിട്ടിരുന്നതെങ്കിലും ഉപരോധം  വന്നതോടെ വേഗത്തിൽ ലഭ്യമാക്കാൻ പശുക്കളുടെ യാത്ര  വിമാനം വഴിയാക്കുകയായിരുന്നു.