കോവിഡ്​ പരിശോധന പി.എച്ച്​.സികളിൽ

​ദോഹ: ഖത്തറിലേക്ക്​ തിരികെവരുന്ന വാക്​സിൻ എടുത്ത യാത്രക്കാർക്കുള്ള ആർ.ടി.പി.സി.ആർ പരിശോധനകൾ പ്രാഥമിക ആരോഗ്യ കേന്ദ്രങ്ങളിലേക്ക്​ മാറ്റാൻ തീരുമാനം. വ്യാഴാഴ്​ച ഖത്തറിൽ വിമാനമിറങ്ങിയ സ്വദേശികളും വിദേശികളുമായ യാത്രക്കാരെ വിമാനത്താവളത്തിൽ പരിശോധനക്ക്​ വിധേയരാക്കിയില്ല. ഇവരോട്​, 36 മണിക്കൂറിനുള്ളിൽ പ്രാഥമിക ആരോഗ്യ കേന്ദ്രങ്ങളിൽ എത്തി കോവിഡ്​ പരിശോധനക്ക്​ ഹാജരാവാനാണ്​ നിർദേശം നൽകിയത്​. ഇന്ത്യയുള്‍പ്പെടെ റെഡ് ലിസ്​റ്റ്​ രാജ്യങ്ങളില്‍നിന്ന്​ ഖത്തറിലേക്ക് വരുന്നവര്‍ വാക്​സിൻ സ്വീകരിച്ച യാത്രക്കാരും ദോഹ വിമാനത്താവളത്തില്‍ ആർ.ടി.പി.സി.ആര്‍ ടെസ്​റ്റ്​ നടത്തിയതിനു ശേഷം മാത്രമേ പുറത്തു കടക്കാവൂ എന്നതായിരുന്നു ഇതുവരെയുള്ള നിബന്ധന. ഇതിനായി ടെസ്​റ്റ്​ സൗകര്യം എയര്‍പോര്‍ട്ടിനകത്ത് തന്നെ സജ്ജീകരിച്ചിരുന്നു. എന്നാല്‍ ഇന്നലെയും ഇന്നുമായി ദോഹയിലെത്തുന്നവരോട് അവരുടെ താമസകേന്ദ്രങ്ങളോട്​ അടുത്ത പ്രാഥമികാരോഗ്യകേന്ദ്രങ്ങളിലെത്തി ടെസ്​റ്റ്​ നടത്താന്‍ ആവശ്യപ്പെടുകാണ് ചെയ്യുന്നത്.

ഇതിനായി പ്രത്യേക സ്​റ്റിക്കര്‍ എയര്‍പോര്‍ട്ട് അധികൃതര്‍ യാത്രക്കാരുടെ രേഖകള്‍ക്ക് മേല്‍ പതിപ്പിച്ചുനല്‍കുകയും ചെയ്തു. ദോഹയിലിറങ്ങി 36 മണിക്കൂറിനകം ടെസ്​റ്റ്​ നടത്തണമെന്നാണ് നിര്‍ദേശം. വിമാനത്താവളത്തിലെത്തുന്ന മുഴുവന്‍ യാത്രക്കാരുടെയും വിവരങ്ങള്‍ ഇതി‍െൻറ ഭാഗമായി പി.എച്ച്​.സികളിലേക്ക്​ കൈമാറുന്നുണ്ട്. പെരുന്നാൾ അവധി ദിനമായതിനാല്‍ നിലവില്‍ 18 പ്രാഥമികരോഗ്യ കേന്ദ്രങ്ങളാണ്​ പ്രവർത്തിക്കുന്നത്​. ജൂലൈ 26നു ശേഷം 27 കേന്ദ്രങ്ങളിൽ പരിശോധന സൗകര്യമുണ്ടാകും. 300 ഖത്തർ റിയാലാണ് ടെസ്​റ്റിനുള്ള ഫീസ്. ടെസ്​റ്റ്​ നടത്താത്തവരുടെ പേരുകള്‍ അധികൃതര്‍ക്ക് കൈമാറാനും പി.എച്ച്.സി.സികള്‍ക്ക് നിര്‍ദേശം നല്‍കിയിട്ടുണ്ട്. വാകിസിനേറ്റഡ്​ യാത്രക്കാർക്ക്​ ക്വാറൻറീൻ ഒഴിവാക്കിയതോടെയാണ്​ പരിശോധന നിർബന്ധമാക്കിയത്​.

കോവിഡ്​: പുതിയരോഗികൾ 196

ദോഹ: ഖത്തറിൽ വ്യാഴാഴ്​ച 196 പേർക്ക്​ കൂടി പുതുതായി കോവിഡ്​ രോഗം സ്​ഥിരീകരിച്ചു. ഇവരിൽ 106 പേർക്ക്​ സമ്പർക്കത്തിലൂടെയാണ്​ രോഗബാധയുണ്ടായത്​. 90 പേർ വിദേശത്ത്​ നിന്ന്​ തിരിച്ചെത്തിയവരാണ്​. പുതിയ മരണങ്ങളൊന്നും റിപ്പോർട്ട്​ ചെയ്​തിട്ടില്ല. ബുധനാഴ്​ച 128 പേർക്ക്​ രോഗബാധ സ്​ഥിരീകരിച്ചിരുന്നു. 66 പേർക്ക്​ സമൂഹ വ്യാപനത്തിലൂടെയാണ്​ ​പകർന്നത്​. 62 പേർ വിദേശത്തു നിന്നെത്തിയവരുമാണ്​. വ്യാഴാഴ്​ച 122 പേരാണ്​ രോഗമുക്തി നേടിയത്​. ഇതുവരെ ആകെ 2,22,600 പേർക്കാണ്​ രോഗമുക്​തിയുണ്ടായത്​. നിലവിൽ 1634 പേർക്കാണ്​ ​രോഗബാധയുള്ളത്​. ഇന്നലെ 19,063 പേർ പരിശോധനക്ക്​ വിധേയരായി. നിലവിൽ 62 പേർ വിവിധ ആശുപത്രികളിലായി ചികിത്സയിലുണ്ട്​. ഇതിൽ മൂന്നു പേരെ ഇന്നലെ പ്രവേശിപ്പിച്ചതാണ്​. തീവ്രപരിചരണവിഭാഗത്തിൽ 31 പേരുമുണ്ട്​​. വ്യാഴാഴ്​ച 27,128 ഡോസ്​ വാക്​സിൻ കൂടി കുത്തിവെപ്പ്​ നടത്തി. നിലവിൽ 36.14ലക്ഷം ഡോസ്​ വാക്​സിനാണ്​ കുത്തിവെച്ചത്​.