കേരളത്തിൽ​ സുപ്രീം കമ്മിറ്റിയുടെ കോവിഡ് ദുരിതാശ്വാസം

ദോഹ: ഇന്ത്യയിലെ കോവിഡ്-19 ദുരിതാശ്വാസ പ്രവർത്തനങ്ങൾക്ക് പിന്തുണയുമായി ലോകകപ്പ് പ്രാദേശിക സംഘാടകരായ സുപ്രീം കമ്മിറ്റി ഫോർ ഡെലിവറി ആൻഡ് ലെഗസി. സുപ്രീം കമ്മിറ്റിക്ക് കീഴിലുള്ള ലെഗസി പദ്ധതിയായ ജനറേഷൻ അമേസിങ്ങാണ് ദുരിതാശ്വാസ പ്രവർത്തനങ്ങളുമായി കേരളത്തിൽ രംഗത്തുള്ളത്. ജനറേഷൻ അമേസിങ്​ അഡ്വക്കറ്റുമാരായ സാദിഖ് റഹ്മാൻ, സലീം പുതിയോട്ടിൽ എന്നിവരുടെ നേതൃത്വത്തിലാണ് പദ്ധതി നടപ്പാക്കുന്നത്.

ഭക്ഷ്യവസ്​തുക്കൾ, വസ്​ത്രങ്ങൾ, മറ്റ്​ നിത്യോപയോഗ സാധനങ്ങൾ തുടങ്ങിയവയാണ്​ ഇതിനകം വിതരണം ചെയ്​തിരിക്കുന്നത്​. പ്രാദേശിക സംഘങ്ങളുമായി ചേർന്ന് ദുരിതാശ്വാസ പ്രവർത്തനങ്ങൾ കൂടുതൽ സ്​ഥലങ്ങളിലേക്ക് വ്യാപിപ്പിക്കാൻ ശ്രമിക്കുന്നുണ്ടെന്നും നിരവധി കുടുംബങ്ങൾക്ക് സഹായമെത്തിക്കാൻ സാധിച്ചതായും സാദിഖ് റഹ്മാൻ പറഞ്ഞു. 2015 മുതൽ ജനറേഷൻ അമേസിങ്​ അഡ്വക്കറ്റായി പ്രവർത്തിച്ചുവരുകയാണ് സാദിഖ്.

കേരളത്തിലെ ഗൂസ്​ബെറി ക്ലബുമായി കൈകോർത്താണ് ഇരുവരുടെയും പ്രവർത്തനങ്ങൾ. 2019ൽ കേരളത്തിലുണ്ടായ പ്രളയത്തിലും ഗൂസ്​ബെറി ക്ലബുമായി ചേർന്ന് ജനറേഷൻ അമേസിങ്​ ദുരിതാശ്വാസ പ്രവർത്തനങ്ങൾ നടത്തിയിരുന്നു. ഫുട്ബാളിലൂടെ സാമൂഹിക വികസനമെന്ന ദീർഘകാല ലക്ഷ്യം മുന്നിൽ കണ്ടാണ് സുപ്രീം കമ്മിറ്റി ജനറേഷൻ അമേസിങ്​ പദ്ധതിക്ക്​ രൂപംനൽകിയിരിക്കുന്നത്​. ഇതി‍െൻറ ഭാഗമായി ഇന്ത്യയടക്കമുള്ള ഏഷ്യൻ രാജ്യങ്ങളിലും ആഫ്രിക്കൻ രാജ്യങ്ങളിലും മറ്റു പ്രദേശങ്ങളിലും കളിമൈതാനങ്ങളടക്കം നിർമിച്ചുനൽകിയിട്ടുണ്ട്​. കുട്ടികൾക്കും മുതിർന്നവർക്കും ഫുട്ബാൾ പരിശീലനവും നൽകുന്നു. വിവിധ രാജ്യങ്ങളിൽ നിന്നുള്ള വിഖ്യാതരായ താരങ്ങൾ ജനറേഷൻ അമേസിങ്​ അംബാസഡർമാരായി പ്രവർത്തിക്കുന്നുണ്ട്.