മുഖ്യമന്ത്രീ, കോവിഡ്​ രോഗികളല്ല ഗൾഫിൽ നിന്ന്​ മടങ്ങുന്നവർ

ദോഹ: പ്രിയപ്പെട്ട കേരള മുഖ്യമന്ത്രീ, ഗൾഫിലുള്ള പ്രവാസികൾ നാട്ടിലേക്ക്​ മടങ്ങുന്നത്​ അവർക്ക്​ കോവിഡ്​ രോഗം ഉള്ളതുകൊണ്ടല്ല. കോവിഡ്​ തീർത്ത പ്രതിസന്ധിയിൽ പിടിച്ചുനിൽക്കാൻ കഴിയാനാകാത്ത, ജോലി പോയ, വിസകാലാവധി തീർന്ന, മറ്റ്​ ആരോഗ്യപ്രശ്​നങ്ങൾ അനുഭവിക്കുന്നവർ മാത്രമാണ്​ ഇപ്പോഴും നാടണയാൻ കാത്തിരിക്കുന്നത്​. അല്ലാതെ ഗൾഫിൽ കോവിഡ്​ പിടിപെടുകയും ആ വൈറസും കൊണ്ട്​ നാടിലെത്തുകയും ചെയ്യുന്നവനല്ല പ്രവാസി. കോവിഡ്​ സ്​ഥിരീകരിക്കപ്പെട്ട ഒരാൾക്ക്​ നിലവിൽ യാത്ര ചെയ്യാനാകാത്ത വിധം ശക്​തമാണ്​ വിവിധ ഗൾഫ്​നാടുകളിലെ സംവിധാനങ്ങൾ. 
അതിനാൽ തന്നെ പ്രവാസി വന്ന്​ കേരളത്തിൽ കോവിഡ്​ പടർത്തുകയാണ്​ എന്ന ഭീതി അങ്ങേക്കും ഭരിക്കുന്ന മറ്റുള്ളവർക്കും നാട്ടുകാർക്കും വേണ്ട. അതിനാൽ വിവിധ സംഘടനകൾ ഏർപ്പെടുത്തുന്ന ചാർ​ട്ടേഡ്​ വിമാനങ്ങളിൽ നാട്ടിലേക്ക്​ വരുന്നവർ​ യാത്രക്ക്​ മുമ്പ്​ കോവിഡ്​ ടെസ്​റ്റ്​ നടത്തി രോഗമി​െല്ലന്ന സർട്ടിഫിക്കറ്റ്​ ഹാജരാക്കണമെന്ന ഉത്തരവ്​ എത്രയും പെ​ട്ടെന്ന്​ പിൻവലിക്കണം. 

കാരണം അത്​ അപ്രായോഗികവും നടക്കാത്ത കാര്യവുമാണ്​. നിലവിൽ ഗൾഫ്​ രാജ്യങ്ങളിൽ കോവിഡ്​ ലക്ഷണങ്ങളില്ലാത്തവർക്ക്​ പരിശോധന നടക്കുന്നില്ല. സർക്കാർ മേഖലയിൽ രോഗലക്ഷണങ്ങൾ ഉള്ള ആളുകൾക്ക്​ മാത്രമാണ്​ ടെസ്​റ്റ്​ നടത്തുന്നത്​. അതിൻെറ ഫലം ലഭിക്കാനാക​ട്ടെ കാലതാമസവുമുണ്ട്​. 
ജൂൺ 20 മുതൽ വിദേശത്തുനിന്ന്​ ചാർ​േട്ടഡ്​ വിമാനങ്ങളിൽ കേരളത്തിലേക്ക്​ എത്തുന്നവർ കോവിഡ്​ പരിശോധന നടത്തി സർട്ടിഫിക്കറ്റ്​ ഹാജരാക്കണമെന്നാണ്​ കേരള സർക്കാർ നിബന്ധന വച്ചിരിക്കുന്നത്​. ഇത്​ നാട്ടിലേക്ക്​ പോകാൻ കാത്തിരിക്കുന്ന പ്രവാസികളുടെ യാത്ര മുടക്കുമെന്നതിൽ സംശയമില്ല.ഗൾഫിൽ നിന്നുള്ള എല്ലാ യാത്രക്കാരും യാത്ര പുറപ്പെടുന്നതിന്​ മുമ്പ്​ 48 മണിക്കൂറിനുള്ളിൽ കോവിഡ്​ ടെസ്​റ്റ്​ നടത്തണമെന്നാണ്​ കേരള സർക്കാർ നിർദേശം​. നെഗറ്റീവ്​ ആയവരെ മാത്രമേ വിമാനത്തിൽ കയറ്റാൻ പാടുള്ളൂ. ടെസ്​റ്റ്​ സർട്ടിഫിക്കറ്റ്​ ഒാരോ യാത്രക്കാരനും കൈയിൽ കരുതണം. ​
നേരത്തെ അനുമതി ലഭിച്ച വിമാനങ്ങൾക്കും ഇത്​ ബാധകമാണ്​. പോസിറ്റീവായ ആൾക്ക്​ അടിയന്തര വൈദ്യ പരിചരണം ആവശ്യമാണെങ്കിൽ എയർ ആംബുലൻസ്​ സേവനം ഉപയോഗപ്പെടുത്താമെന്നും ഉത്തരവിൽ പറയുന്നു. ഗൾഫ്​ രാജ്യങ്ങളിൽനിന്ന്​ എത്തുന്നവരിൽ രോഗബാധ ഉയരുന്നത്​ ചൂണ്ടിക്കാട്ടിയാണ്​ കോവിഡ്​ ടെസ്​റ്റ്​ നിർബന്ധമാക്കി നിർദേശം ഇറക്കിയത്​. 

അതേസമയം, വന്ദേഭാരത്​ ദൗത്യത്തിന്​ കീഴിൽ പോകുന്ന വിമാനങ്ങൾക്ക്​ ഇൗ നിബന്ധന ബാധകവുമല്ല. കേരളത്തിലെ രോഗവ്യാപനമാണ്​ കാരണമെങ്കിൽ വന്ദേഭാരതിൽ വരുന്നവർക്ക്​ മാത്രം രോഗം വരാതിരിക്കുമോ എന്ന ചോദ്യവും പ്രസക്​തമാണ്​. നിലവിൽ രോഗം ഇല്ലാത്ത ആൾക്കും ആഴ്​ചകൾക്ക്​ ശേഷം വൈറസ്​ ബാധ സ്​ഥിരീകരിക്കുന്ന സംഭവം എല്ലായിടത്തുമുണ്ട്​. കേരളത്തിലും ഇത്തരം നിരവധി ഉദാഹരണങ്ങൾ ഉണ്ട്​. ഖത്തറിൽ നിന്ന്​ വിവിധ കമ്പനികൾ ഏർപ്പാടാക്കിയ നിരവധി ചാർ​ട്ടേഡ്​ വിമാനങ്ങൾ നിലവിൽ കേരളത്തിലേക്ക്​ പോയിട്ടുണ്ട്​. 

ഇതിലെ യാത്രക്കാരും മുൻകൂട്ടി കോവിഡ്​ പരിശോധനക്ക്​ വിധേയരായിട്ടില്ല. എന്നാൽ യാത്രക്കാർക്ക്​ ഫേസ്​ മാസ്​കുകൾ അടക്കമുള്ള കർശന പ്രതിരോധ സൗകര്യങ്ങൾ ഏർപ്പെടുത്തിയിരുന്നു. ഖത്തർ എയർവേസിൽ പോയവർക്കാക​ട്ടെ ഇടവിട്ട്​ സീറ്റുകൾ ഒഴിച്ചിട്ടുമായിരുന്നു യാത്ര. എന്നാൽവന്ദേഭാരത്​ വിമാനത്തിൽ പോകുന്നവർക്കാക​ട്ടെ ശരീരോഷ്​മാവ്​ പരിശോധന മാത്രമേയുള്ളൂ. വിദേശ രാജ്യങ്ങളിൽ നിന്ന്​ പ്രവാസികൾ ജൻമ നാട്ടിലേക്ക്​ മടങ്ങുന്നത്​ അവരുടെ അനിവാര്യത കൊണ്ട്​ മാത്രമാണെന്നും ചികിത്​സ​ ഉദ്ദേശിച്ചാണെന്ന രീതിയിലുള്ള പ്രചാരണം അടിസ്ഥാന രഹിതമാണെന്നും​ ഖത്തർ പ്രവാസി കോ ഓഡിനേഷൻ കമ്മിറ്റി ചെയർമാൻ നിസാർ കോച്ചേരി പറയുന്നു.വിദേശ രാജ്യങ്ങളിൽ യാത്രക്കാർക്ക്​ സ്വന്തമായി കോവിഡ്​ ടെസ്​റ്റുകൾ നടത്താൻ പരിമിതിയുണ്ടെന്ന കാര്യം വിസ്​മരിക്കരുത്​. പ്രവാസികൾ ടെസ്​റ്റ്​ നടത്താൻ സന്നദ്ധമാണ്. സർക്കാർ എംബസിയുമായി ബന്ധപ്പെട്ട് അതത്​ രാജ്യങ്ങളിലെ ആരോഗ്യ വകുപ്പ്​ മുഖേന അതിനു വേണ്ട മാർഗരേഖ തയ്യാറാക്കുകയാണ്​ വേണ്ടത്​. ടെസ്​റ്റിന്​ വേണ്ടി വരുന്ന ചെലവ് കേന്ദ്ര സംസ്ഥാന സർക്കാറുകൾ വഹിക്കുകയോ അർഹതപ്പെട്ടവർക്ക് ഐ.സി.ഡബ്ല്യു.എഫ് ഫണ്ടിൽ നിന്നും നൽകുകയോ ചെയ്യണമെന്നും അ​ദ്ദേഹം ആവശ്യപ്പെട്ടു.

ഖത്തറിൽ ആർക്കും സർട്ടിഫിക്കറ്റ്​ നൽകുന്നില്ല, യാത്രാവശ്യത്തിനുള്ള പരിശോധനയും ഇല്ല
നിലവിൽ ഖത്തറിൽ സർക്കാർ മേഖലയിൽ കോവിഡ്​ ലക്ഷണമുള്ളവർക്ക്​ പരിശോധന നടത്താൻ​ വൻസംവിധാനമുണ്ട്​. എന്നാൽ രോഗലക്ഷണങ്ങളില്ലാത്തവർക്ക്​ പരിശോധന നടക്കുന്നില്ല. രാജ്യത്തെ സ്വകാര്യആശുപത്രികളിൽ കോവിഡ്​ പരിശോധനക്കുള്ള അനുമതി ഖത്തർ ആരോഗ്യമന്ത്രാലയം നൽകിയിട്ടുമില്ല. ഇതിനാൽ തന്നെ ഖത്തറിൽ നിന്ന്​ ചാർ​ട്ടേഡ്​ വിമാനത്തിൽ വരുന്നവർക്ക്​ യാത്രക്കുമു​േമ്പ കോവിഡ്​ പരിശോധന നടത്തണമെന്ന നിബന്ധന പൂർണമായും അപ്രായോഗികമാണ്​.രോഗലക്ഷണമുണ്ടായവർക്കോ രോഗികളുമായി സമ്പർക്കമുണ്ടായവർക്കോ കോവിഡ്​ ടെസ്​റ്റ്​ നടത്തു​േമ്പാൾ അതിൻെറ ഫലം ഇന്നതാണ്​ എന്ന്​ കാണിച്ചുകൊണ്ടുള്ള സർട്ടിഫിക്കറ്റ്​ ഖത്തർ ആരോഗ്യമന്ത്രാലയം നൽകുന്നുമില്ല. മൊബൈലിൽ സ​ന്ദേശം വരികയോ ഹമദ്​ മെഡിക്കൽ കോർപറേഷനിൽ നിന്ന്​ ആരോഗ്യപ്രവർത്തകർ പരിശോധനാഫലം അറിയിക്കുകയോ ആണ്​ ചെയ്യുന്നത്​. കോവിഡ്​ ട്രാക്കിങ്​ ആപ്പായ ഇഹ്​തിറാസ്​ വന്നതോടെ മൊബൈലിൽ ഡൗൺലോഡ്​ ചെയ്​ത ആപ്പിൽ പരിശോധനയുടെ ഫലം അറിയാനുമാകും. അല്ലാതെ ഫലം നെഗറ്റീവ്​ ആണോ പോസിറ്റീവ്​ ആണോ എന്ന സർട്ടിഫിക്കറ്റ്​ നൽകുന്നുമില്ല. പൊതുജനാരോഗ്യമന്ത്രാലയത്തിൻെറ നേരിടുള്ള പരിശോധനക്ക്​ പോലും ഇത്തരം സർട്ടിഫിക്കറ്റ്​ നൽകുന്നില്ല.ഏതെങ്കിലും ആളുകൾ​ മറ്റ്​ സ്​ഥലങ്ങളിലേക്ക്​ യാത്രപോകാനായുള്ള ആവശ്യത്തിനായോ മെഡിക്കൽ സർട്ടിഫിക്കറ്റിനായോ വരികയാണെങ്കിൽ കോവിഡ്​ പരിശോധന നടത്തരുതെന്ന്​ പ്രൈമറി ഹെൽത്ത്​ കോർപറേഷൻ ഉത്തരവിറക്കുകയും ചെയ്​തിട്ടുണ്ട്​.

ഇഹ്​തിറാസ്​ ആപ്പ്​ പേ​ാരേ
ഖത്തർ സർക്കാർ ഇപ്പോൾ എല്ലാവർക്കും ഇഹ്​തിറാസ്​ ആപ്പ്​ നിർബന്ധമാകിയിരിക്കുകയാണ്​. പുറത്തിറങ്ങുന്ന എല്ലാവരുടെയും മൊബൈൽ ഫോണിൽ ഇഹ്​തിറാസ്​ ആപ്പ്​ ഡൗൺലോഡ്​ ചെയ്​തിരിക്കണം. ആപ്പിൻെറ ബാർകോഡിൽ കോവിഡിൽ നിന്ന്​ മുക്​തനാണ്​ എന്ന്​ കാണിക്കുന്ന പച്ച വർണം ഉള്ളയാൾക്ക്​ മാത്രമേ ​പുറത്തിറങ്ങാനാകൂ. 

പൊതുആരോഗ്യക്ഷമതാ പരിശോധനയാണ്​ പ്രായോഗികമെന്ന്​​ വിദഗ്​ധർ
ഗൾഫിലെ നിലവിലെ സാഹചര്യത്തിൽ കോവിഡ്​ ടെസ്​റ്റ്​ ഇത്രയും കുറഞ്ഞ സമയത്തിനുള്ളിൽ നടത്തി സർട്ടിഫിക്കറ്റ്​ നേടൽ അസാധ്യമാണ്​. അഥവാ ടെസ്​റ്റിൽ നെഗറ്റീവാണെന്ന്​ തെളിഞ്ഞാലും പിന്നീടും ഏത്​ നിമിഷവും വൈറസ്​ ബാധയേൽക്കാമെന്നും അതിനാൽ പൊതു ആരോഗ്യക്ഷമതാ പരിശോധനയാണ്​ അഭികാമ്യമെന്നും വിദഗ്​ധർ ചൂണ്ടിക്കാട്ടുന്നു. യാത്രയിലുടനീളം എയർപോർട്ടിലും വിമാനത്തിനുള്ളിലും വ്യക്തിഗത സുരക്ഷാവലയമൊരുക്കുന്ന പി.പി.ഇ കിറ്റ്​ ധരിക്കലാണ്​ ഒരുപരിധി വരെ രോഗപകർച്ചയിൽ നിന്ന്​ രക്ഷനേടാനുള്ള പ്രാഥമിക മാർഗം. യാത്രക്ക്​ തൊട്ടുമുമ്പ്​ ഏതെങ്കിലും ലൈസൻസ്​ഡ്​ മെഡിക്കൽ പ്രാക്​ടീഷണറുടെ പൊതു ആരോഗ്യ പരിശോധനക്ക്​വിധേയനാവണമെന്ന നിബന്ധന പ്രായോഗികവും പ്രയോജനകരവുമാണ്​. യാത്രക്ക്​ അനുയോജ്യമായ ആരോഗ്യസ്ഥിതിയു​ണ്ടോ, എന്തെങ്കിലും രോഗലക്ഷണങ്ങളുണ്ടോ എന്നും ഇതിലൂടെ അറിയാനാവുമെന്നും ആരോഗ്യമേഖലയിൽ പ്രവർത്തിക്കുന്നവർ ചൂണ്ടിക്കാട്ടുന്നു.