ശാസ്​ത്ര, സാങ്കേതിക മേഖലകളിലെ നിക്ഷേപം നിർണായകമായി

ദോഹ: കോവിഡ് –19നെ നിയന്ത്രിക്കുന്നതിലും പ്രതിരോധിക്കുന്നതിലും ശാസ്​ത്ര, സാങ്കേതിക മേഖലകളിലെ ഖത്തറി​​െൻറ നിക്ഷേപം വലിയ പങ്കുവഹിച്ചുവെന്ന് ഖത്തർ ഐക്യരാഷ്​ട്രസഭയിൽ വ്യക്തമാക്കി. ദേശീയതലത്തിൽ എല്ലാ രംഗത്തും സുസ്​ഥിര വികസനം ലക്ഷ്യംവെച്ചുള്ള മഹത്തായ പദ്ധതിയാണ് ഖത്തർ ദേശീയ മാർഗരേഖ 2030 എന്നും ഖത്തർ ചൂണ്ടിക്കാട്ടി. 

ന്യൂയോർക്കിൽ ഐക്യരാഷ്​ട്രസഭയുടെ ആസ്​ഥാനത്ത് സുസ്​ഥിര വികസനവുമായി ബന്ധപ്പെട്ട് നടന്ന പൊതു ചർച്ചയിൽ ഖത്തർ സ്​ഥിരം പ്രതിനിധി അംബാസഡർ ശൈഖ ഉൽയാ അഹ്​​മദ് ബിൻ സൈഫ് ആൽ ഥാനിയാണ് ഇക്കാര്യം വ്യക്തമാക്കിയത്. ശാസ്​ത്ര സാങ്കേതിക, നൂതന മേഖലകളിലെ ഖത്തറി​​െൻറ വലിയ നിക്ഷേപ പദ്ധതികൾ രാജ്യത്ത് കോവിഡ് –19നെ നിയന്ത്രിക്കുന്നതിനും നിർണായക ചുവടുവെപ്പുകൾ സ്വീകരിക്കുന്നതിനും പ്രാപ്തമാക്കിയിട്ടുണ്ട്​. വികസന പദ്ധതികൾ സാക്ഷാത്കരിക്കുന്നതിനാവശ്യമായ അടിയന്തര നടപടികൾ ഖത്തർ കൈക്കൊണ്ടിട്ടുണ്ടെന്നും അവർ കൂട്ടിച്ചേർത്തു. 

കോവിഡ് –19 മഹാമാരി ആരംഭിച്ചത് മുതൽ വിദ്യാഭ്യാസ രംഗത്ത് തടസ്സങ്ങളില്ലാതെത്തന്നെ ഒാൺലൈൻ വിദ്യാഭ്യാസത്തിലൂടെ അത് തുടരാൻ ഖത്തറിനെ സഹായിച്ചതും അതിനായി ഇലക്േട്രാണിക് മാധ്യമങ്ങൾ തയാറാക്കിയതും ഈ രംഗത്തെ ഖത്തറി​​െൻറ മുന്നേറ്റങ്ങളാണെന്നും അവർ വ്യക്തമാക്കി. കോവിഡ് –19നെതിരായ പോരാട്ടം ദേശീയ തലത്തിൽ ഒതുക്കാതെ അന്താരാഷ്​ട്ര തലത്തിലും ഖത്തർ തുടരുന്നുണ്ട്​. ലോകാരോഗ്യ സംഘടനക്ക് ഖത്തറി​​െൻറ 10 മില്യൺ ഡോളർ വാഗ്ദാനവും വാക്സിൻ കണ്ടെത്തുന്നതിനായി 20 മില്യൺ ഡോളർ വാഗ്ദാനവും ഇതിൽ പ്രധാനപ്പെട്ടതാണെന്നും ശൈഖ ആൽ ഥാനി ചൂണ്ടിക്കാട്ടി.