പ്രായപൂർത്തിയായ പകുതിയിലധികവും കോവിഡ്​ കുത്തിവെപ്പെടുത്തു

ദോഹ: ദേശീയ കോവിഡ്-19 വാക്സിനേഷൻ േപ്രാഗ്രാം നിർണായക നാഴികക്കല്ല് പിന്നിട്ടതായി പൊതുജനാരോഗ്യ മന്ത്രാലയം. രാജ്യത്തെ പ്രായപൂർത്തിയായ 50.1 ശതമാനം ആളുകളും ഒരു ഡോസ്​ വാക്സിനെങ്കിലും സ്വീകരിച്ചതായും സുപ്രധാന ചുവടുവെപ്പാണിതെന്നും ആരോഗ്യ മന്ത്രാലയം വ്യക്തമാക്കി.

കോവിഡ്-19 വാക്സിനേഷൻ ആരംഭിച്ചതു മുതൽ ഇതുവരെയായി 19,11,663 ഡോസ്​ വാക്സിൻ നൽകി. ഇതുവരെയായി പ്രായപൂർത്തിയായ 11,37,843ലധികംപേർ ഒരു ഡോസ്​ വാക്സിൻ എങ്കിലും സ്വീകരിച്ചു. ഇവരിൽ 7,38,335 പേർ (32.7 ശതമാനം) രണ്ട് ഡോസ്​ വാക്സിൻ സ്വീകരിച്ചിട്ടുമുണ്ട്​.

ഖത്തറിെൻറ വാക്സിനേഷൻ പരിപാടി ദ്രുതഗതിയിലാണ് മുന്നേറിക്കൊണ്ടിരിക്കുന്നത്. വാക്സിനേഷൻ ആരംഭിച്ചത് മുതൽ കുത്തിവെപ്പ്​ എടുക്കാൻ ആളുകൾ വൻതോതിലാണ്​ തയാറായത്​. വാക്സിനെടുക്കേണ്ടവരുടെ എണ്ണം വർധിക്കുന്നതിനനുസരിച്ച് അധിക വാക്സിനേഷൻ കേന്ദ്രങ്ങളും രണ്ടാം ഡോസ്​ എടുക്കുന്നതിന് ൈഡ്രവ് ത്രൂ കേന്ദ്രങ്ങളും മന്ത്രാലയം ആരംഭിച്ചു. കഴിഞ്ഞ ഒരാഴ്ച മാത്രം രണ്ടു ലക്ഷത്തിലധികം ഡോസ്​ വാക്സിൻ വിതരണം ചെയ്തു.

കോവിഡ്-19 ഭീഷണി ഏറ്റവും കൂടുതൽ നേരിടുന്ന 60 വയസ്സിന് മുകളിലുള്ളവരിൽ 10ൽ ഒമ്പതു പേരും ചുരുങ്ങിയത് ഒരു ഡോസ്​ വാക്സിൻ സ്വീകരിച്ചിട്ടുണ്ട്. ജനസംഖ്യാടിസ്​ഥാനത്തിൽ ഏറ്റവും കൂടുതൽ ആളുകൾ വാക്സിൻ സ്വീകരിച്ച രാജ്യങ്ങളിൽ ഖത്തർ ആദ്യ പത്തിനുള്ളിലുണ്ട്.

പൂർണമായും വാക്സിനെടുത്തവർക്ക് കോവിഡിൽ നിന്ന്​ ആരോഗ്യ സുരക്ഷ ഉറപ്പുവരുത്താൻ സാധിക്കുമെന്നതിന് കൃത്യമായ തെളിവുണ്ട്​. പൂർണമായും വാക്സിനെടുത്തവരിൽ ഒരു ശതമാനം പേരെ മാത്രമാണ് പിന്നീട്​ തീവ്ര പരിചരണ വിഭാഗത്തിൽ പ്രവേശിപ്പിക്കപ്പെട്ടത്​.

രാജ്യത്തെ പ്രധാന മേഖലകളിലെ ജീവനക്കാർക്ക് കോവിഡ്-19 വാക്സിൻ നൽകുന്ന പ്രക്രിയ ഊർജിതമാക്കുന്നതിന് പൊതുജനാരോഗ്യ മന്ത്രാലയം ഷെഡ്യൂളിങ്​ യൂനിറ്റ് രൂപവത്​കരിച്ചത്​ ഏറെ പ്രയോജനകരമാണ്​. മേയ് 28 മുതൽ കോവിഡ് നിയന്ത്രണങ്ങളിൽ ഇളവ് വരുത്തുമ്പോൾ ബാർബർ ഷോപ്പുകൾ, റെസ്​റ്റാറൻറുകൾ, ജിം, ഹെൽത്​ക്ലബുകൾ, കായികപരിശീലനകേന്ദ്രങ്ങൾ എന്നിവിടങ്ങളിലെ ജീവനക്കാർ വാക്സിനെടുത്തിരിക്കണമെന്ന നിർദേശത്തെ തുടർന്നാണിത്.

എല്ലാ വ്യാപാര മേഖലകളിൽ നിന്നുള്ള തൊഴിലാളികളുടെയും ജീവനക്കാരുടെയും വാക്സിനേഷൻ പ്രക്രിയ പൂർത്തിയാക്കുന്നത് ഷെഡ്യൂളിങ്​ യൂനിറ്റായിരിക്കും. ഉപഭോക്താക്കളുമായി നേരിട്ട് ഇടപഴകുന്ന സേവന മേഖലയിലെ ജീവനക്കാർക്കും തൊഴിലാളികൾക്കുമായിരിക്കും വാക്സിനേഷനിൽ മുൻഗണന.

ബാർബർ ഷോപ്പ്, ഹെയർഡ്രസർ സലൂൺ, റെസ്​റ്റാറൻറുകൾ, റീട്ടെയിൽ ഷോപ്പ്, സൂപ്പർ മാർക്കറ്റ്, ഹോട്ടലുകൾ, മറ്റു ഹോസ്​പിറ്റാലിറ്റി തുടങ്ങിയ മേഖലകളിൽ ജോലിയെടുക്കുന്നവർക്കായിരിക്കും മുൻഗണന. വ്യാപാര, വാണിജ്യ മേഖലകളിലെ തൊഴിലാളികൾക്കും ജീവനക്കാർക്കും വാക്സിനേഷൻ അപ്പോയിൻറ്മെൻറ് എടുക്കുന്നതിന് VCIA@hamad.qa എന്ന അഡ്രസിൽ ബന്ധപ്പെടണം. ഇതിനകം തന്നെ ആയിരത്തിലധികം ജീവനക്കാർ വിവിധ സമയങ്ങളിലായി വാക്സിൻ സ്വീകരിച്ചിട്ടുണ്ട്.