സ്​കൂൾ മേശകളിൽ ഇനി കോവിഡ്​ പ്രതിരോധ ഷീൽഡുകൾ

ദോഹ: സ്​കൂൾ വിദ്യാർഥികളുടെ പഠനമേശക്ക്​ മുകളിൽ സ്​ഥാപിക്കാവുന്ന പ്രത്യേക കോവിഡ്​ പ്രതിരോധ പ്ലാസ്​റ്റിക്​ ഷീൽഡുമായി ടെക്​സാസ്​ എ ആൻഡ്​​ എം യൂനിവേഴ്​സിറ്റി.സ്​കൂളുകളുടെ മേശക്ക്​ മുന്നിൽ സ്​ഥാപിക്കാവുന്ന ഭാരം കുറഞ്ഞ, ഉപയോഗിക്കാൻ എളുപ്പമുള്ള തരം ഷീൽഡാണിത്​. വിദ്യാഭ്യാസ മന്ത്രാലയവും പൊതുജനാരോഗ്യ മന്ത്രാലയവും ഷീൽഡിൻെറ പ്രവർത്തനം വിലയിരുത്തും. ഡോ. മുഹമ്മദ്​ ഗാരിബാണ്​ പ്രവർത്തനങ്ങൾക്ക്​ മേൽനോട്ടം വഹിച്ചത്​. യൂനിവേഴ്​സിറ്റിയിലെ ഓഫിസ്​ ഓഫ്​ എൻഗേജ്​മെൻറാണ്​ പദ്ധതിയുടെ സ്​പോൺസർ. വിദ്യാഭ്യാസ മേഖലയിലടക്കം വൻപ്രതിസന്ധിയാണ്​ കോവിഡ്​ സൃഷ്​ടിച്ചിരിക്കുന്നത്​. പ്രതിസന്ധിയു​െട ആദ്യഘട്ടത്തിൽ തന്നെ രാജ്യത്തെ സ്​കൂളുകൾ അടച്ചിരുന്നു.

തുടർന്ന്​ ഓൺലൈനിലൂടെയായിരുന്നു പഠനം. എന്നാൽ, സെപ്​റ്റംബർ ഒന്നുമുതൽ സ്​കൂളുകൾ തുറന്നിരുന്നു. കോവിഡ്​ ഭീഷണി പൂർണമായും ഒഴിവാകാതെ സ്​കൂൾ തുറന്നതിനെതിരെ രക്ഷിതാക്കൾക്ക്​ പ്രതിഷേധമുണ്ടായിരുന്നു.തുറന്ന ചില സ്​കൂളുകളിൽ കോവിഡ്​ സ്​ഥിരീകരിക്കുകയും ചെയ്​തു. ഇതിനെ തുടർന്ന്​ ഒന്നുകിൽ വിദ്യാർഥികൾക്ക്​ പൂർണമായും ഓൺലൈൻ ക്ലാസ്​ മതിയോ എന്നും അല്ലെങ്കിൽ സ്​കൂളിൽ വന്നുള്ള പഠനം മതിയോ എന്നും തിരഞ്ഞെടുക്കാനുള്ള അവകാശം രക്ഷിതാക്കൾക്ക്​ മന്ത്രാലയം നൽകിയിരുന്നു. നേരിട്ട്​ ക്ലാസ്​ മുറികളിലെത്തുന്ന കുട്ടികൾക്ക്​ കോവിഡിൽ നിന്ന്​ പ്രതിരോധം തീർക്കുന്ന ഷീൽഡുകൾ വന്നത്​ ആശ്വാസം പകരുമെന്നാണ്​ പ്രതീക്ഷ.