കോവിഡ്–19 പോരാട്ടം: ഖത്തറിെൻറ നേതൃത്വത്തിൽ അഞ്ചുരാഷ്​ട്ര സംരംഭം

ദോഹ: കോവിഡ്–19നെതിരായ ആഗോള പോരാട്ടത്തിന് പിന്തുണ നൽകുന്നതിന് ഖത്തറടക്കം അഞ്ച് രാജ്യങ്ങളുടെ ഫ്രണ്ട്സ്​ ഓഫ് സോളിഡാരിറ്റി സഖ്യ സംരംഭത്തിന് തുടക്കം കുറിച്ചു. ന്യൂയോർക്കിലെ യു.എൻ ആസ്​ഥാനത്ത് നടന്ന വിർച്വൽ ചടങ്ങിലാണ് സൗഹൃദ ഐക്യദാർഢ്യ സംഘത്തിന് രൂപം നൽകിയത്. ഖത്തറിന് പുറമേ, ദക്ഷിണ കൊറിയ, കാനഡ, ഡെൻമാർക്ക്, സിയറ ലിയോൺ എന്നീ രാഷ്​ ട്രങ്ങളാണ് സംഘത്തിലുള്ളത്.

കോവിഡ്–19നെതിരായ പോരാട്ടത്തിൽ ആഗോള ആരോഗ്യ സുരക്ഷ ഉറപ്പുവരുത്തുന്നതിന് ഫ്രണ്ട്സ്​ ഓഫ് സോളിഡാരിറ്റി ഗ്രൂപ്പിനൊപ്പം ചേർന്ന് പ്രവർത്തിക്കാൻ ഖത്തർ പ്രതിജ്ഞാബദ്ധമാണെന്ന് ഖത്തർ ഉപപ്രധാനമന്ത്രിയും വിദേശകാര്യമന്ത്രിയുമായ ശൈഖ് മുഹമ്മദ് ബിൻ അബ്​ദുറഹ്മാൻ ആൽഥാനി വ്യക്തമാക്കി. കോവിഡ്–19 മഹാമാരിക്കെതിരെ ഒരുമിച്ചിരുന്ന് പ്രവർത്തിക്കേണ്ട സമയം അതിക്രമിച്ചിരിക്കുന്നുവെന്നും പരസ്​പരം സഹകരിച്ചുള്ള പ്രവർത്തനം അനിവാര്യമാണെന്നും അദ്ദേഹം കൂട്ടിച്ചേർത്തു. ആഗോള പ്രാധാന്യമുള്ള ആരോഗ്യ പ്രശ്നങ്ങൾ ഉയർന്നുവരുന്നത് ഈ സംഘം പരിശോധിക്കുമെന്നും അതിനെ മറികടക്കാനുള്ള മാർഗങ്ങൾ പരിശോധിക്കുന്നതോടൊപ്പം യു.എന്നുമായി ചേർന്ന് പ്രത്യേക സ്​ട്രാറ്റജി തയ്യാറാക്കുമെന്നും രൂപീകരണ ചടങ്ങിൽ വിദേശകാര്യമന്ത്രി വിശദീകരിച്ചു.

കോവിഡ്–19നെതിരായ പോരാട്ടത്തിൽ ലോകം പരാജയപ്പെടാൻ പാടില്ലെന്നും ഒറ്റക്കെട്ടായ പോരാട്ടത്തിലൂടെയല്ലാതെ നമ്മൾ ഒരിക്കലും വിജയിക്കാൻ പോകുന്നില്ലെന്നും അദ്ദേഹം ചൂണ്ടിക്കാട്ടി.ദക്ഷിണ കൊറിയ, ഡെൻമാർക്ക്, കാനഡ, സിയറ ലിയോൺ രാജ്യങ്ങളുടെ വിദേശകാര്യ മന്ത്രിമാരും ചടങ്ങിൽ സംബന്ധിച്ചു.