അൽ വജബ ഈസ്​റ്റ് റോഡ്, അടിസ്​ഥാന സൗകര്യ വികസന പദ്ധതികൾക്ക് തുടക്കം

ദോഹ: അൽ വജബ ഈസ്​റ്റിലെ റോഡ്, അടിസ്​ഥാന സൗകര്യ വികസന പദ്ധതിക്ക് (പാക്കേജ് 1) പൊതുമരാമത്ത് വകുപ്പ് അശ്ഗാൽ തുടക്കം കുറിച്ചു. രാജ്യത്തുടനീളം സമഗ്ര അടിസ്​ഥാന സൗകര്യ, റോഡ് ശൃംഖല നെറ്റ്​വർക്കുകൾ സ്​ഥാപിക്കുന്നതിെൻറ ഭാഗമായാണ് പദ്ധതി നടപ്പാക്കുന്നത്.

അൽ വജബയുടെ കിഴക്കൻ മേഖലയിൽ ഉം അൽ ദൊം സ്​ട്രീറ്റിെൻറ പടിഞ്ഞാറ് ഭാഗം മുതൽ റൗദത് അൽ നാസർ സ്​ട്രീറ്റി‍െൻറ വടക്ക് ഭാഗം വരെയുള്ള പ്രദേശത്ത് ആഭ്യന്തര റോഡ് ശൃംഖല മെച്ചപ്പെടുത്തുക, സുരക്ഷ വർധിപ്പിക്കുക, പൗരന്മാരുടെ ആവശ്യമനുസരിച്ചും ഭാവി കണക്കിലെടുത്തും സമഗ്ര അടിസ്​ഥാന സൗകര്യങ്ങളൊരുക്കുക എന്നിവയാണ് പദ്ധതിയിലൂടെ ലക്ഷ്യമിടുന്നത്.

ഭൂമിശാസ്​ത്ര പരമായി മൂന്ന് മേഖലകളാക്കി തിരിച്ചാണ് പദ്ധതി ആസൂത്രണം ചെയ്തിരിക്കുന്നത്. ഓരോ വർഷമെടുത്ത് നടപ്പാക്കുന്ന പദ്ധതി 2023 രണ്ടാം പാദത്തോടെ പൂർത്തിയാകുമെന്ന് അശ്ഗാൽ അറിയിച്ചു. അൽ വജബ ഈസ്​റ്റിലെ 368 സിറ്റിസൺ സബ് ഡിവിഷനുകൾക്ക് ഏറെ സഹായകമാകുന്ന പദ്ധതിയിൽ 17 കിലോമീറ്റർ നീളത്തിൽ റോഡ് ശൃംഖല വികസിപ്പിക്കുകയും ഗതാഗതം സുഗമമാക്കുന്നതിനുള്ള സൗകര്യങ്ങളൊരുക്കുകയും ചെയ്യും. സ്​ട്രീറ്റ് ലൈറ്റിങ്​ സംവിധാനം, ലൈറ്റിങ്​ പോളുകൾ, റോഡുകളിലെ സുരക്ഷ അടയാളങ്ങൾ, സൈൻ ബോർഡുകൾ എന്നിവയും പദ്ധതിയുടെ ഭാഗമായി നിർമിക്കും.

കൂടാതെ 34 കിലോമീറ്റർ ദൈർഘ്യമുള്ള സൈക്കിൾ നടപ്പാതയും 2570 പാർക്കിങ്​ കേന്ദ്രങ്ങളും പദ്ധതിയിലുൾപ്പെടുത്തിയിട്ടുണ്ട്. 14 കിലോമീറ്റർ മലിനജല ശൃംഖല, 16.6 കിലോമീറ്റർ സർഫേസ്​ ആൻഡ് ഗ്രൗണ്ട് വാട്ടർ ഡ്രെയിനേജ് നെറ്റ്​വർക്ക്, 10.7 കിലോമീറ്റർ ട്രീറ്റഡ് വാട്ടർ നെറ്റ്​വർക്ക് എന്നിവയും പദ്ധതിയുടെ ഭാഗമായി നിർമിക്കുന്നുണ്ടെന്ന് അശ്ഗാൽ വെസ്​റ്റേൺ ഏരിയ പ്രോജ്ക്ട്സ്​ എൻജിനീയർ മുഹമ്മദ് അൽ അതീഖ് പറഞ്ഞു. പദ്ധതിക്കാവശ്യമായ 85 ശതമാനം ഉൽപന്നങ്ങളും പ്രാദേശികമായി വികസിപ്പിച്ചെടുത്തതായിരിക്കുമെന്ന് അശ്ഗാൽ വ്യക്തമാക്കി. ഖത്തരി കമ്പനികളുടെയും ഖത്തരി ഫാക്ടറികളിൽ ഉൽപാദിപ്പിക്കപ്പെട്ടതുമായ ഉൽപന്നങ്ങളും കോൺക്രീറ്റ് ഉൽപന്നങ്ങളും പദ്ധതിയിലുൾപ്പെടുത്തും. പ്രാദേശിക ഉൽപന്നങ്ങളെയും ഉൽപാദകരെയും പിന്തുണക്കുന്നതിനുള്ള അശ്ഗാലിെൻറ പ്രതിബദ്ധതയുടെ ഭാഗമായാണിത്.