വരുന്നു, മേഖലയിലെ ഏറ്റവും വലിയ സൗരോർജ ചാർജിങ്​ സ്​റ്റേഷൻ

ദോഹ: രാജ്യത്തിൻെറ ഗതാഗത മേഖല പതിയെ ഹരിതവത്​കരണത്തിലേക്ക്​ നീങ്ങുകയാണ്​. ഇന്ധനം ഉപയോഗിച്ച്​ ഓട​ുന്ന വാഹനങ്ങൾക്കു​ പകരം സൗരോർജത്താൽ പ്രവർത്തിക്കുന്ന വാഹനങ്ങൾ വ്യാപകമാക്കാനാണ്​ ഗതാഗത വാർത്ത വിനിമയ മന്ത്രാലയം ലക്ഷ്യമിടുന്നത്​. ദേശീയ വിഷൻ 2030 ൻെറ ഭാഗമായി ക്ലീൻ എനർജിയിലേക്കുള്ള പരിവർത്തനം ലക്ഷ്യമിട്ടാണ്​ വിവിധ പദ്ധതികൾ. ഇതിൻെറ ഭാഗമായി നിരവധി വൈദ്യുത ചാർജിങ്​ സ്​റ്റേഷനുകൾ നിലവിൽ വന്നുകഴിഞ്ഞു. പലതി​െൻറയും നിർമാണം പുരോഗമിക്കുന്നു. ഇനിയിതാ, മേഖലയിലെ ഏറ്റവും വലിയ സൗരോർജ വൈദ്യുത ചാർജിങ്​ സ്​റ്റേഷൻ ഖത്തറിൽ നിർമിക്കുകയാണ്​ പൊതുമരാമത്ത് അതോറിറ്റി അശ്ഗാൽ. പണി അതിവേഗം പുരോഗമിക്കുകയാണ്​.

നിർമാണം അവസാനിക്കുന്നതോടെ പൂർണമായും സൗരോർജത്തിൽ പ്രവർത്തിക്കുന്ന മേഖലയിലെ ഏറ്റവും വലിയ വൈദ്യുത ചാർജിങ്​ സ്​റ്റേഷൻ ഖത്തറിലാകും. പൊതു ബസ്​ ഗതാഗതം കൂടുതൽ കാര്യക്ഷമമാക്കുന്നതിൻെറ ഭാഗമായും ലോകകപ്പിനോടനുബന്ധിച്ച പൊതുഗതാഗതം ശക്തിപ്പെടുത്തുന്നതിൻെറയും ഭാഗമായി 14 പുതിയ ബസ്​ സ്​റ്റേഷനുകളുടെ നിർമാണത്തിന് 2.4 ബില്യൻ റിയാലിൻെറ നിർമാണപ്രവർത്തനങ്ങൾക്ക് അശ്ഗാൽ കരാർ നൽകിയിരുന്നു. ലുസൈൽ, അൽ വക്റ, അൽ സുഡാൻ, എജുക്കേഷൻ സിറ്റി, ഇൻഡസ്​ട്രിയൽ ഏരിയ എന്നിവിടങ്ങളിലെ ടെർമിനലുകളുടെ നിർമാണം 68 ശതമാനം പൂർത്തിയായതായി ഗതാഗത മന്ത്രാലയം നേരത്തേ അറിയിച്ചിരുന്നു. ഈ വർഷം മൂന്നാം പാദത്തോടെ പദ്ധതി.

പ്രതിദിനഉൽപാദനം നാല് മെഗാവാട്ട് വൈദ്യുതി

പ്രതിദിനം നാല് മെഗാവാട്ട് വൈദ്യുതി ഉൽപാദിപ്പിക്കാൻ ശേഷിയുള്ള 10720 സൗരോർജ പാനലുകളാണ് സ്​റ്റേഷനിൽ സ്​ഥാപിക്കുക. അത്യാധുനിക നിലവാരത്തോടെയും സവിശേഷതകളോടെയുമാണ് സ്​റ്റേഷൻ നിർമിക്കുന്നത്. 150 കിലോവാട്ട് ശേഷിയിൽ ബസുകൾക്ക് ചാർജ് ചെയ്യുന്നതിനായി 217 ഡബിൾ ഗൺ ഇലക്ട്രിക് ചാർജിങ്​ ഉപകരണങ്ങളാണ് സ്​റ്റേഷനിലുണ്ടാകുക. കൂടാതെ 300 കിലോവാട്ട് ശേഷിയിൽ വേഗത്തിൽ ചാർജ് ചെയ്യുന്നതിനായി അഞ്ച് വൈദ്യുത ചാർജിങ്​ പോയൻറുകളും ഇവിടെ സ്​ഥാപിക്കും. സ്​റ്റേഷനിൽ 474 ബസ്​ സ്​റ്റോപ്പുകളുമുണ്ടാകും. വൈദ്യുത ചാർജിങ്​ സ്​റ്റേഷനുകളുടെ നിർമാണവുമായി ബന്ധപ്പെട്ട് 653 ഇലക്ട്രിക് ചാർജറുകൾ സ്​ഥാപിക്കുന്നതിനുള്ള നിർമാണ പ്രവർത്തനങ്ങൾക്ക് അശ്ഗാൽ തുടക്കം കുറിച്ചു. ദോഹക്ക് അകത്തും പുറത്തുമായി 41 ചാർജിങ്​ സ്​റ്റേഷനുകളിലായി 713 ഇൻവെർട്ടറുകൾ അശ്ഗാൽ സ്​ഥാപിക്കും.