ഖത്തർ വഴി യു.എ.ഇയിൽ വരാം, ആശങ്കയില്ലാതെ...

ഖത്തർ വഴി യു.എ.ഇയിലേക്ക്​ യാത്രക്കാർ എത്തിത്തുടങ്ങി. അർമേനിയ, ഉസ്​ബെകിസ്​താൻ വഴി യാത്ര ചെയ്​തവർക്ക്​ പുതിയ വഴിയാണ്​ ഇതോടെ തുറന്നത്​. ഖത്തർ വഴി യു.എ.ഇയിൽ എത്തിയ ആദ്യ മലയാളി സംഘത്തിൽപെട്ട കോഴിക്കോട്​ ഗോവിന്ദപുരം സ്വദേശിയും അഡ്​നോക്​ ജീവനക്കാരനുമായ വി.പി രാകേഷ്​ അനുഭവം വിവരിക്കുന്നു...

കോഴിക്കോടുനിന്ന്​ 11,300 രൂപ

ഖത്തർ വഴി യാത്രാസാധ്യത തെളിഞ്ഞപ്പോൾ തന്നെ ഞാനും സുഹൃത്ത്​ മുക്കം താണിക്കണ്ടി ജസീറും സ്വന്തം നിലയിൽ ടിക്കറ്റ്​ ബുക്ക്​ ചെയ്​തിരുന്നു. കോഴിക്കോടുനിന്ന്​ 11,300 രൂപ ആയിരുന്നു ടിക്കറ്റ്​ നിരക്ക്​ (ഇപ്പോൾ 30,000 രൂപ കടന്നു). ഹോട്ടൽ ബുക്ക്​ ചെയ്​തത്​ സ്വന്തം നിലയിലാണ്​. ക്വാറൻറീൻ നിർബന്ധമായതിനാൽ 'ഡിസ്​കവർ ഖത്തർ' സൈറ്റ്​ വഴിയാണ്​ ബുക്ക്​ ചെയ്​തത്​.

ഹോട്ടലിൽ​ ചെലവായത്​ 6400 റിയാൽ

ഞങ്ങൾക്ക്​ രണ്ട്​ പേർക്കും ചേർന്ന്​ 6400 റിയാലാണ് പത്ത്​ ദിവസത്തേക്ക്​ ഹോട്ടലിൽ​ ചെലവായത്​. മൂന്ന്​ നേരം ഭക്ഷണം, പി.സി.ആർ ​പരിശോധന അടക്കമായിരുന്നു ഹോട്ടൽ പാക്കേജ്​. 5000 റിയാലി​െൻറ പേരിൽ ചിലരെ മടക്കിയയച്ചു എന്ന്​ പിന്നീട്​ അറിഞ്ഞെങ്കിലും ഞങ്ങളോട്​ വിമാനത്താവളത്തിൽ ഇക്കാര്യം ആരും ചോദിച്ചില്ല. പിന്നീട്​ വന്ന സുഹൃത്തുക്കളോടും ഇക്കാര്യം ആവശ്യപ്പെട്ടിട്ടില്ല. എന്നാൽ, ഡൽഹി വിമാനത്താവളം വഴി വന്ന ചിലരോട്​ ഇന്ത്യയി​േലക്കുള്ള റി​ട്ടേൺ ടിക്കറ്റ്​ ആവശ്യപ്പെട്ടതായി അറിയുന്നു. ഞങ്ങളുടെ റി​ട്ടേൺ ടിക്കറ്റായി പരിഗണിച്ചത്​ അബൂദബിയിലേക്കുള്ള ടിക്കറ്റായിരുന്നു.

അബൂദബിക്ക്​ യാ​ത്ര ചെയ്യുന്നതിന്​ 72 മണിക്കൂർ മുൻപ്​ മറ്റൊരു പി.സി.ആർ പരിശോധന ആവശ്യമുണ്ടായിരുന്നു. ഇത്​ സ്വന്തം നിലയിൽ ചെയ്യണം. പലയിടത്തും പല നിരക്കായിരുന്നു. 200, 220, 260, 300 റിയാൽ എന്നിങ്ങനെയാണ്​ നിരക്ക്​. 200 റിയാൽ മുടക്കിയാണ്​ ഞങ്ങൾ ടെസ്​റ്റ്​ ചെയ്​തത്​. വിമാനത്താവളത്തിൽ പി.സി.ആർ പരിശോധന ഫലം മാത്രമാണ്​ ആവശ്യപ്പെട്ടത്​.

അബൂദബിയിലേക്ക്​ 410 ദിർഹം

ആഗസ്​റ്റ്​ ഒന്നിന്​ രാവിലെ അബൂദബിയിൽ എത്തി. 410 ദിർഹമായിരുന്നു അബൂദബിയിലേക്ക്​ നിരക്ക്​. ഇവിടെയും കാര്യമായ പരിശോധന ഉണ്ടായിരുന്നില്ല. എന്നാൽ, ഓൺ അറൈവലുകാർക്കുള്ള എം.ഒ.എച്ചി​െൻറ ​േഫാം പൂരിപ്പിച്ചത്​ ആവശ്യപ്പെട്ടു. ഇതേക്കുറിച്ച്​ അറിവില്ലെന്ന്​ പറഞ്ഞപ്പോൾ അവർ തന്നെ ഫോം നൽകി. താമസിക്കുന്ന വിലാസവും ഫോൺ നമ്പറും പാസ്​പോർട്ട്​ കോപ്പിയുമാണ്​ അതിൽ നൽകേണ്ടത്​. പി.സി.ആർ പരിശോധന പൂർത്തിയാക്കി റിസ്​റ്റ്​ ബാൻഡ്​​ നൽകി. ഗ്രീൻ പട്ടികയിൽ ഉൾപെടാത്ത രാജ്യം വഴി എത്തിയതിനാൽ ഏഴ്​ ദിവസം ക്വാറൻറീൻ വേണമെന്ന്​ അറിയിച്ചു.

ആറാം ദിവസം പരിശോധന നടത്തി നെഗറ്റീവായാൽ ഏഴാം ദിവസം പുറത്തിറങ്ങാമെന്നും അവർ പറഞ്ഞു. ഇപ്പോൾ ഹോം ക്വാറൻറീനിൽ കഴിയുകയാണ്​. ഖത്തർ വഴി വരുന്നവർ ആശങ്കപ്പെടേണ്ട കാര്യവുമില്ല. സുരക്ഷിത യാത്രയാണ്​ ഖത്തറും യു.എ.ഇയും വാഗ്​ദാനം ചെയ്യുന്നത്​.