കതാറയിൽ കളർ ഓഫ് ഡെസേർട്ട് വെർച്വൽ പ്രദർശനം

ദോഹ: കതാറ കൾചറൽ വില്ലേജ് ഫൗണ്ടേഷനുമായി സഹകരിച്ച് മാപ്്സ്​ ഇൻറർനാഷനൽ സംഘടിപ്പിക്കുന്ന ഏഴാമത് കളർ ഓഫ് ഡെസേർട്ട് ചിത്രകലാ പ്രദർശനത്തിന് തുടക്കമായി. കോവിഡ്–19 പശ്ചാത്തലത്തിൽ ഇത്തവണ ഒാൺലൈൻ മാതൃകയിലാണ് പ്രദർശനം.

പ്രമുഖരായ എഴുപത്തഞ്ചോളം കലാകാരന്മാരുടെ സൃഷ്​ടികളാണ് പ്രദർശനത്തിനായി അണി നിരത്തിയിരിക്കുന്നത്. അറേബ്യൻ കുതിര, ഫാൽക്കൺ, പായ്ക്കപ്പലുകൾ, മുത്ത് വാരൽ, പാരമ്പര്യ ഖത്തരി വസ്​ത്രധാരണം തുടങ്ങിയവയാണ് പ്രധാനമായും ഉള്ളത്.ദേശീയ മ്യൂസിയം, ഇസ്​ലാമിക് ആർട്ട് മ്യൂസിയം, സൂഖ് വാഖിഫ്, ദോഹ സ്​കൈലൈൻ, ചരിത്ര പ്രാധാന്യമുള്ള കോട്ടകൾ എന്നിവയും കാൻവാസിൽ പകർത്തിയിട്ടുണ്ട്.

2022 ലോകകപ്പിലേക്കുള്ള ഖത്തറി‍െൻറ യാത്രയാണ് പ്രദർശനത്തി‍െൻറ പ്രമേയം. കോവിഡ്–19 പശ്ചാത്തലത്തിൽ മഹാമാരിക്കെതിരെ ഖത്തറും ഖത്തർ ജനതയും സധൈര്യം നിലയുറപ്പിച്ചതും ചില ചിത്രകാരന്മാർ കാൻവാസിൽ പകർത്തിയിട്ടുണ്ട്. പ്രദർശനം ഡിസംബർ 31 വരെ തുടരും.