ഡോക്​ടർമാരുടെ സമൂഹമാധ്യമ ഉപയോഗത്തിന്​ പെരുമാറ്റച്ചട്ടം

ദോഹ: ​രാജ്യത്തെ ഡോക്​ടർമാർ, ആശുപത്രികൾ എന്നിവരുടെ സമൂഹമാധ്യമ ഉപയോഗത്തിൽ മാർഗ നിർദേശങ്ങളുമായി പൊതുജനാരോഗ്യ മന്ത്രാലയം. ഡോക്​ടർമാരുടെ സമൂഹമാധ്യമ ഉപയോഗം വിലക്കുന്നില്ലെങ്കിലും ഉപയോഗിക്കു​േമ്പാൾ സ്വീകരിക്കേണ്ട നിർദേശങ്ങളാണ്​ മന്ത്രാലയം പുറത്തുവിട്ടത്​. ഡോക്​ടർമാർക്കും ക്ലിനിക്കുകൾക്കും ആരോഗ്യരംഗവുമായി ബന്ധപ്പെട്ട കാര്യങ്ങളും അവരുടെ ​പ്രവർത്തന മേഖലയിലെ വിവരങ്ങളും പങ്കുവെക്കാം. എന്നാൽ, ഖത്തറിൽ നിരോധിക്കപ്പെട്ട മെഡിക്കൽ ഉപകരണങ്ങളോ മറ്റോ സംബന്ധിച്ച്​ വിവരങ്ങൾ പങ്കുവെക്കാനോ രോഗികളുടെ വിവരങ്ങൾ പരസ്യമാക്കാനോപാടില്ല. നോൺ ​െമഡിക്കൽ ഉൽപന്നങ്ങളുടെയും സേവനങ്ങളുടെയും പരസ്യവും വിലക്കുന്നുണ്ട്​. അടിയന്തര പ്രാധാന്യത്തോടെ പുറത്തിറക്കിയ പുതിയ നിർദേശങ്ങൾ വ്യാഴാഴ്​ച മുതൽ പ്രാബല്യത്തിൽ വന്നതായി മന്ത്രാലയം അറിയിച്ചു.

ഡോക്​ടർമാർ സമൂഹമാധ്യമ പ്ലാറ്റ്​ഫോമുകളിലൂടെ പങ്കുവെക്കുന്ന വിവരങ്ങൾ വസ്​തുനിഷ്​ഠവും കൃത്യതയുമുള്ളതായിരിക്കണമെന്നത്​ പരിഗണിച്ചാണ്​ മന്ത്രാലയം പെരുമാറ്റച്ചട്ടം നിർദേശിക്കുന്നത്​.

പ്രധാന​പ്പെട്ട നിർദേശങ്ങൾ

ഇസ്​ലാമിക സംസ്​കാരത്തെയും പാരമ്പര്യത്തെയും ഹനിക്കും വിധമുള്ള ചിത്രങ്ങൾ, വിഡിയോ, മറ്റ്​ എഴുത്തുകൾ എന്നിവയുള്ള പരസ്യങ്ങൾ പങ്കുവെക്കാൻ പാടില്ല

മെഡിക്കൽ പ്രഫഷ​െൻറ അന്തസ്സും ധാർമികതയും ലംഘിക്കുന്നവിധത്തിലുള്ള പോസ്​റ്റുകൾ പങ്കുവെക്കരുത്​

ആരോഗ്യ പ്രവർത്തകരുടെ സോഷ്യൽ മീഡിയ പ്ലാറ്റ്​ഫോമിൽ അവരുടെ ലൈസൻസ്​, സ്​പെഷലൈസേഷൻ, അക്കാദമിക്​ യോഗ്യത, രജിസ്​ട്രേഷൻ എന്നിവ വ്യക്തമാക്കണം

പൊതുജനാരോഗ്യ മന്ത്രാലയത്തി​െൻറ രജിസ്​ട്രേഷൻ വിശദാംശങ്ങൾ വ്യക്തമാക്കണം

മന്ത്രാലയത്തി​െൻറയോ ബന്ധപ്പെട്ട വകുപ്പി​െൻറയോ അംഗീകാരമോ അനുമതിയോ ഉള്ള ​സേവനങ്ങളും ഉൽപന്നങ്ങളും മാത്രമേ പരസ്യപ്പെടുത്താൻ പാടുളളൂ. അതേസമയം, മെഡിക്കൽ ഇതരസേവനങ്ങൾ പരസ്യപ്പെടുത്താനോ പങ്കുവെക്കാനോ പാടില്ല.

വാണിജ്യതാൽപര്യങ്ങളുടെ അടിസ്ഥാനത്തിൽ ഒരു തരത്തിലുള്ള മരുന്ന്​, മറ്റ്​ മെഡിക്കൽ ഉൽപന്നങ്ങൾ എന്നിവക്ക്​ പ്രചാരണം നൽകാൻ പാടില്ല

ഡോക്​ടറുടെയോ ക്ലിനിക്കി​െൻറയോ സൗകര്യങ്ങൾ പരസ്യപ്പെടുത്തുന്നതിനായി രോഗിയുടെ ചികിത്സാ സമയത്തെ വിഡിയോ ഷൂട്ട്​, ലൈവ്​ വിഡിയോ എന്നിവ പാടില്ല