​​​പ്രമുഖ ചൈനീസ്​ കലാകാരൻ യൂ ഹാൻയൂവിെൻറ ചിത്രപ്രദർശനം കതാറയിൽ

ദോഹ: ചിത്രരചനയെ കൂട്ടുപിടിച്ച് ആത്മീയതയുടെ വിശിഷ്​ടമായ ആവിഷ്കാരത്തിലൂടെ ശ്രദ്ധേയമാകുകയാണ് കതാറയിൽ ഇന്നലെ ആരംഭിച്ച ദേശത്തി​​െൻറ ആത്മീയതയും വിശുദ്ധതയും എന്ന തലക്കെട്ടിലുള്ള ചിത്രപ്രദർശനം. അറിയപ്പെട്ട ചൈനീസ്​ ചിത്രകാരനായ യൂ ഹാൻയൂവി​​െൻറ ചിത്രങ്ങളുടെ പ്രദർശനത്തിനാണ് ഇന്നലെ തുടക്കം കുറിച്ചിരിക്കുന്നത്. പരമ്പരാഗതമായ ചൈനീസ്​ മഷി ഉപയോഗിച്ച് വരച്ച 33 ചിത്രങ്ങളാണ് പ്രദർശനത്തിലുള്ളത്. ക്ലാസിക് കാവ്യങ്ങളുടെ നാല് ചൈനീസ്​ കാലിഗ്രഫി പോസ്​റ്റുകളും ഇതോടൊപ്പം ചേർത്തിട്ടുണ്ട്. ടിബറ്റിനെ കേന്ദ്രീകരിച്ചുള്ള ചിത്രങ്ങളുടെ കൂട്ടത്തിൽ ഹിമപർവതങ്ങളും മേഖലയുടെ ഹിമപിണ്ഡങ്ങളും ഉൾപ്പെടുന്നു. 

ചിത്രകാരൻ യൂ ഹാൻയുവി​​െൻറ പൂർവികരും സമകാലികരും ശീലിച്ചുപോന്ന പാരമ്പര്യരീതി തന്നെയാണ് ചിത്രകലയിൽ ഇദ്ദേഹവും സ്വീകരിച്ചിരിക്കുന്നത്. ടിബറ്റി​​െൻറ സൂര്യോദയ–അസ്​തമന ചിത്രങ്ങൾ കാൻവാസിൽ പകർത്തുന്നതിന് സ്വർണപൊടികളുടെ പാളികളാണ് ഉപയോഗിച്ചിരിക്കുന്നത്. 
ലോകത്തിൽ തന്നെ ഭംഗിയേറിയ സൂര്യോദയ–അസ്​തമനത്തിന് പേര് കേട്ട നാടാണ് ടിബറ്റ്. 

കാലികമായ കലാരചനയിൽ ലോകത്തെ മുൻനിര കലാകാരന്മാർക്ക് തങ്ങളുടെ സൃഷ്​ടികൾ പൊതുജനങ്ങൾക്ക് മുന്നിൽ പ്രദർശിപ്പിക്കുന്നതിന് അവസരം നൽകുന്ന കതാറ കൾച്ചറൽ വില്ലേജി​​െൻറ സന്നദ്ധതയെ അഭിനന്ദിച്ച അദ്ദേഹം പ്രത്യക നന്ദിയും രേഖപ്പെടുത്തി. ഹൂബൈ ഫൈൻ ആർട്സ്​ അക്കാദമിയിലെ ചൈനീസ്​ പെയിൻറിംഗ് വകുപ്പിൽ നിന്നും ബിരുദമെടുത്ത അദ്ദേഹം, ചൈന ഫെഡറേഷൻ ഓഫ് ലിറ്റററി ആർട്ട് സർക്കിളിലെ ഒറിജിനൽ പെയിൻറിംഗ്, കാലിഗ്രഫിയുടെ ഡീൻ ആയി പ്രവർത്തിച്ചിട്ടുണ്ട്. പരമ്പരാഗതമായ ചൈനീസ്​ മഷി ഉപയോഗിച്ചുള്ള ചിത്രരചനക്ക് പ്രശസ്​തനായ യൂ ഹാൻയു, നിരവധി സ്വർണ മെഡലുകളും അവാർഡുകളും കരസ്​ഥമാക്കിയിട്ടുണ്ട്.