കാർബൺ ഫ്രീ ലോകകപ്പ്​; നിരത്തിലിറങ്ങുന്നത്​ 3000 ബസുകൾ

ദോഹ: 25 ശതമാനം ഇലക്ട്രിക് ബസുകളുൾപ്പെടെ പരിസ്​ഥിതി സംരക്ഷണത്തിനായുള്ള അന്താരാഷ്ട്ര മാനദണ്ഡങ്ങൾ പാലിച്ചുകൊണ്ടുള്ള 3000 പരിസ്​ഥിതി സൗഹൃദ ബസുകൾ ഫിഫ ലോകകപ്പിന് നിരത്തിലിറക്കുമെന്ന് ഖത്തർ. ഫിഫയുടെ ചരിത്രത്തിലെ പ്രഥമ കാർബൺ ന്യൂട്രൽ ലോകകപ്പെന്ന സംഘാടകരുടെ പ്രതിജ്ഞാബദ്ധത നിറവേറ്റുന്നതിൽ പദ്ധതി പ്രധാന പങ്കുവഹിക്കും.

ലോകകപ്പിനായുള്ള 3000 പരിസ്​ഥിതി സൗഹൃദ ബസുകളിൽ മൂന്നിലൊന്ന് വാഹനങ്ങളും പരീക്ഷണാടിസ്​ഥാനത്തിൽ പ്രവർത്തിപ്പിച്ചതായി സുപ്രീം കമ്മിറ്റി ഫോർ ഡെലിവറി ആൻഡ് ലെഗസി മൊബിലിറ്റി ഡയറക്ടർ ഥാനി അൽ സർറാ പറഞ്ഞു. 3000 ബസുകളിൽ 25 ശതമാനം പൂർണമായും ഇലക്ട്രിക് ബസുകളായിരിക്കും. ബാക്കിയുള്ളവ പരിസ്​ഥിതി സംരക്ഷണം ഉറപ്പുവരുത്തുന്നതിനായുള്ള അന്താരാഷ്ട്ര മാനദണ്ഡങ്ങൾ പാലിച്ചുകൊണ്ടുള്ളവയായിരിക്കുമെന്ന്​ ഥാനി അൽ സർറാ ഖത്തർ റേഡിയോക്ക് നൽകിയ അഭിമുഖത്തിൽ വ്യക്തമാക്കി.

ലോകകപ്പിനായെത്തുന്ന മാധ്യമപ്രവർത്തകർ, ലോകകപ്പുമായി ബന്ധപ്പെട്ട് പ്രവർത്തിക്കുന്നവർ, ആരാധകർ തുടങ്ങി എല്ലാവർക്കും ഈ ബസുകളുടെ സേവനം ലഭ്യമാകും. ടിക്കറ്റ് കൈവശമുള്ള ഫുട്ബാൾ ആരാധകർക്ക് ബസുകളിൽ സ്​റ്റേഡിയത്തിലേക്കും ദോഹയിലെ പ്രധാന കേന്ദ്രങ്ങളിലേക്കും സൗജന്യ സർവിസും ലഭ്യമാകും.

അമീർ കപ്പ് ഫൈനൽ 2021, ഫിഫ അറബ് കപ്പ് തുടങ്ങിയ പ്രധാന ടൂർണമെൻറുകളിൽ ഇലക്ട്രിക് ബസുകൾ പരീക്ഷണാടിസ്​ഥാനത്തിൽ ഉപയോഗിച്ചിരുന്നു. ഖത്തറിന് പുറത്ത് നിർമിച്ച് ഖത്തറിലേക്ക് അയക്കുന്നതിനാൽ ബാച്ചുകളായാണ് ഇവിടെ എത്തുന്നത്. ഈ വർഷം ആദ്യ പാദത്തോടെ എല്ലാ ബസുകളും ഖത്തറിലെത്തും. അൽ സർറാ വിശദീകരിച്ചു.

എട്ട് സീറ്റുകളോട് കൂടിയ ഓട്ടോമാറ്റിക്​ മിനി ബസുകൾ, 20ഉം 36ഉം സീറ്റുകളോട് കൂടിയ വലിയ ബസുകൾ എന്നിവയാണ് നിരത്തിലിറങ്ങുക. ഇവ വിവിധ മേഖലകളിലായി വിന്യസിക്കപ്പെടും. കോർണിഷ് സ്​ട്രീറ്റിന് പുറമേ ബി, സി റിങ് റോഡുകളിലും ബസ്​ സർവിസ്​ നടത്തും. സ്​റ്റേഡിയങ്ങളിലേക്ക് എക്സ്​പ്രസ്​ ബസ്​ പ്രത്യേകം സർവിസ്​ നടത്തും -ഥാനി അൽ സർറാ പറഞ്ഞു.