ബിലാലിൻെറ ജീവിതം ​പ്രേക്ഷകരിലേക്ക്​

ദോഹ: ഒമ്പതു വർഷം മുമ്പ്​ ഖത്തറിലെ പ്രവാസ സമൂഹത്തിൽ കാഴ്​ചയുടെ പുതുവിപ്ലവം കുറിച്ച 'നക്ഷത്രങ്ങൾ കരയാറില്ല' ഡോക്യു ഡ്രാമയുടെ ഓൺലൈൻ പുനരാവിഷ്​കാരത്തിനുള്ള ഒരുക്കമെല്ലാം പൂർത്തിയായതായി സംഘാടകർ വാർത്തസമ്മേളനത്തിൽ അറിയിച്ചു. തനിമ ഖത്തറും യൂത്ത്​ ഫോറം ഖത്തറും സംയുക്തമായി അവതരിപ്പിക്കുന്ന ഡോക്യു ഡ്രാമ ജൂലൈ 21 വൈകീട്ട്​ ഏഴിന്​ ഫേസ്​ബുക്ക്​​, യൂട്യൂബ്​ പ്ലാറ്റ്​ഫോമുകളിലൂടെ തത്സമയം സംപ്രേഷണം ചെയ്യും.

ഉസ്മാൻ മാരാത്ത് രചനയും രംഗഭാഷ്യവുമൊരുക്കിയ 'നക്ഷത്രങ്ങൾ കരയാറില്ല' 2012 മേയ് മാസത്തിലാണ് ആദ്യമായി അരങ്ങിലെത്തിയത്. ബിലാൽ ഇബ്നു റവാഹിൻെറ ജീവിതം പറയുന്ന ​ഡോക്യു-ഡ്രാമ ഖത്തറിലും കേരളത്തിലും ഒാരോ വേദികളിലായി അവതരിപ്പിച്ചപ്പോൾ വൻ സ്വീകാര്യത ലഭിച്ച​ു. ദുബൈ ഉൾപ്പെടെ വിവിധ രാജ്യങ്ങളിൽനിന്നും ക്ഷണമു​ണ്ടായെങ്കിലും അരങ്ങിലെത്തിക്കാനുള്ള ​െചലവും അധ്വാനവും കൂടുതൽ വേദികളിലേക്കുള്ള യാത്ര മുടക്കി. അതിനൊരു പോംവഴിയെന്നനിലയിലാണ്​ ഇപ്പോൾ പുതിയ കാലത്തിൻെറ മാധ്യമമായ സോഷ്യൽ മീഡിയയി​ലേക്ക്​ കൂടുമാറുന്നത്​.

മൂന്നു വേദികളിലായി അറേബ്യൻ പാരമ്പര്യത്തിൻെറയും അടിമത്തത്തിനെതിരായ അതിജീവനത്തിൻെറയും രംഗങ്ങൾ പകർത്തിയ ഡോക്യു ഡ്രാമയിൽ ദോഹയിലെ പ്രവാസി മലയാളികളായ അമ്പതിലധികം കലാകാരന്മാരാണ് അഭിനയിച്ചത്. കൂടാതെ, നാടക സംഗീത സിനിമ പ്രവർത്തകരും അവതരണത്തിന് മിഴിവേകുന്നതിൽ കൈകോർത്തു. ഒമ്പതു വർഷം മുമ്പത്തെ രംഗദൃശ്യങ്ങളോടൊപ്പം പുതിയരംഗങ്ങൾ കൂട്ടിച്ചേർത്തുകൊണ്ടാണ്​​ സ്​ക്രീനിലെത്തുന്നതെന്ന്​ ഡയറക്​ടർ ഉസ്​മാൻ മാരാത്ത്​ പറഞ്ഞു. ഇസ്​ലാമിക ചരി​ത്രങ്ങളുടെയും മാനവികതയുടെ സന്ദേശവും പുതിയ തലമുറയിലെത്തിക്കാനുള്ള വഴികൂടിയാണ്​ ഓൺലൈൻ പ്ലാറ്റ്​ഫോമുകളിലൂടെ പ്രതീക്ഷിക്കുന്നതെന്ന്​ അ​ദ്ദേഹം പറഞ്ഞു.

റേഡിയോ എഫ്.എം 98.6 മീഡിയ പാർട്ണർ ആവുന്ന പരിപാടി സിറ്റി എക്സ്ചേഞ്ച്, ഓട്ടോ ഫാസ്​റ്റ്​ ട്രാക്ക്, ബ്രാഡ്മാ ഗ്രൂപ്, അയാം സർവിസസ്, സ്കെച് അഡ്വവർടൈസ്മെൻറ്​ എന്നിവർ ചേർന്നാണ് സ്പോൺസർ ചെയ്യുന്നത്. യൂത്ത് ഫോറം പ്രസിഡൻറ്​ എസ്. എസ്. മുസ്തഫ, തനിമ ഖത്തർ സെക്രട്ടറി യൂസുഫ് പുലാപ്പറ്റ, റേഡിയോ എഫ്.എം 98.6 സി.ഇ.ഒ അൻവർ ഹുസൈൻ, യൂത്ത് ഫോറം കലാ സാംസ്കാരിക വിഭാഗം കൺവീനർ ഡോ. സൽമാൻ എന്നിവർ പത്രസമ്മേളനത്തിൽ പങ്കെടുത്തു.