രണ്ടാം ദിനം മറെ മടങ്ങി

ദോഹ: ആദ്യ റൗണ്ടിലെ മിന്നും വിജയത്തിന്‍റെ തിളക്കം മായുംമുമ്പേ സൂപ്പർ താരം ആൻഡി മറെക്ക്​ ദോഹയിൽ നിന്നും മടക്കടിക്കറ്റും. ഖത്തർ എക്സോൺ ഓപൺ ടെന്നിസ്​ ചാമ്പ്യൻഷിപ്പിന്‍റെ രണ്ടാം റൗണ്ടിൽ സ്പാനിഷ്​ താരം റോബർടോ ബൗറ്റിസ്റ്റക്ക്​ മുന്നിൽ നേരിട്ടുള്ള സെറ്റുകളിൽ കീഴടങ്ങിയായിരുന്നു ബ്രിട്ടീഷ്​ താരത്തിന്‍റെ മടക്കം. സ്​കോർ 6-0, 6-1.

ചൊവ്വാഴ്ച ജപ്പാന്‍റെ ​ടാരോ ഡാനിയേലിനെ വീഴ്ത്തിയ മറെക്ക്​, സ്പാനിഷ്​ എതിരാളിക്ക്​ മുന്നിൽ ഒരു പോയന്‍റ്​ മാത്രമേ സ്വന്തമാക്കാനായുള്ളൂ. ഏകപക്ഷീയമായി മാറിയ കളിയിൽ മുൻഗ്രാൻഡ്​സ്ലാം ചാമ്പ്യൻ ഏറെ നിരാശപ്പെടുത്തി.

മൂന്നുവർഷം മുമ്പ്​ ആസ്​ട്രേലിയൻ ഓപണിലായിരുന്നു മറെയും -ബൗറ്റിസ്റ്റക്കും അവസാനമായി ഏറ്റുമുട്ടിയത്​.

അന്ന്​ അഞ്ചു സെറ്റ്​ നീണ്ട മത്സരത്തിനൊടുവിലായിരുന്നു ബൗറ്റിസ്റ്റ മറെയെ വീഴ്ത്തിയത്​. പക്ഷേ, ആ മാരത്തൺ ദൗത്യമൊന്നും ദോഹയിൽ വേണ്ടിവന്നില്ല. ഒരു മണിക്കൂർ കൊണ്ടുതന്നെ കളി അവസാനിച്ച്​, ക്വാർട്ടറിൽ പ്രവേശിച്ചു.

ബുധനാഴ്ചയിലെ മറ്റൊരു മത്സരത്തിൽ നാലാം സീഡുകാരൻ മരിൻ സിലിച്ച്​ ക്വാർട്ടറിൽ കടന്നു. നെതർലൻഡ്​സിന്‍റെ വാൻ ഡെ സാൻചപിനെ 6-3, 7-5 സ്​കോറിന്​ തോൽപിച്ചായിരുന്നു മുന്നേറ്റം.

നികോളസ്​ ബാസിലാഷ്​വിലി, ഒന്നാം സീഡുകാരൻ ഡെനിസ്​ ഷപോവലോവ്​, ഇറ്റലിയുടെ മർടോൺ ഫുക്​സോവിച്​ എന്നിവരും ക്വാർട്ടറിൽ കടന്നു. ബെൽജിയം താരം ഡേവിഡ്​ ഗോഫിൻ ചൊവ്വാഴ്ച ആദ്യ റൗണ്ടിൽ പുറത്തായിരുന്നു.