വിയോജിപ്പുകൾ മറന്ന് ലോകം ഒരുമിക്കണമെന്ന്​ അമീർ

കോവിഡ്–19 സൃഷ്​ടിച്ച പ്രതിസന്ധികളിലൂടെ മുന്നോട്ട് പോകു​േമ്പാൾ വിയോജിപ്പുകൾ മറന്ന് ലോകം ഒരുമിക്കണമെന്നാണ്​ അമീർ ശൈഖ് തമീം ബിൻ ഹമദ് ആൽഥാനി ആഹ്വാനം ചെയ്​തത്​. റമദാൻ സമാരംഭത്തോടനുബന്ധിച്ച് രാജ്യത്തെ അഭിസംബോധന ചെയ്യുകയായിരുന്നു അദ്ദേഹം.

രോഗ പ്രതിരോധ പ്രവർത്തനങ്ങളിൽ ഒന്നാം കക്ഷി രാജ്യവും അതി​െൻറ ഏജൻസികളുമാണ്. പൗരന്മാരും താമസക്കാരുമുൾപ്പെടുന്ന ജനതയാണ് രണ്ടാം കക്ഷി. രോഗ വ്യാപനം തടയുന്നതിൽ അവരുടെ പങ്ക് നിസ്​തുലമാണ്. സർക്കാർ സംവിധാനങ്ങളുടെ നിർദേശങ്ങളും നിയന്ത്രണങ്ങളും പാലിക്കേണ്ടത് അവരുടെ കടമയാണ്. വളരെ അത്യാവശ്യങ്ങൾക്കല്ലാതെ പുറത്തിറങ്ങരുത്​. വീട്ടിൽ സുരക്ഷിതമായിരിക്കണം. ഓരോരുത്തരുടെയും അശ്രദ്ധ അവരെ മാത്രമല്ല, സമൂഹത്തെ ഒന്നടങ്കമാണ് ബാധിക്കുകയെന്നത് ഓരോ വ്യക്തിയും ഓർത്തിരിക്കണമെന്നും അമീർ പറഞ്ഞു. ആ വാക്കുകൾ എല്ലാവരും പാലിക്കുകയായിരുന്നു പിന്നീട്​.

തുടക്കം മുതലേ ജാഗ്രത, പൂർണ അടച്ചുപൂട്ടലില്ലാതെ രോഗനിയന്ത്രണം

ചൈനയടക്കം വിവിധ രാജ്യങ്ങളിൽ കൊറോണ വൈറസ്​ സ്​ഥീകരിക്കപ്പെട്ടപ്പോൾ തന്നെ ഖത്തറിൽ ജാഗ്രത കൈക്കൊണ്ടിരുന്നു. ആദ്യഘട്ടത്തിൽ ഇറാനിൽ നിന്ന്​ രാജ്യത്തേക്ക്​ തിരിച്ചെത്തിച്ച ഖത്തർ പൗരൻമാരിലാണ്​ കോവിഡ്​ ആദ്യമായി റിപ്പോർട്ട്​ ചെയ്​തത്​. കോവിഡ്​​ പടരുന്ന സാഹചര്യത്തിൽ ചൈനയിലേക്കുള്ള എല്ലാ വിമാനങ്ങളും ഫെബ്രുവരി മൂന്ന് മുതൽ റദ്ദാക്കിയതായി ഖത്തർ എയർവേയ്സ്​ അറിയിച്ചു. തുടക്കത്തിൽ 300 ടൺ സഹായസാധനങ്ങളുമായി ഖത്തറിൻെറ അഞ്ച്​ വിമാനങ്ങളാണ്​ ചൈനയിലേക്ക്​ പറന്നത്​.

മാർച്ച്​ മാസത്തിൽ ഖത്തറിൽ മൂന്നുപ്രവാസികൾക്ക്​ കൂടി കോവിഡ്​ രോഗം സ്​ഥിരീകരിച്ചു. തുടർന്നാണ്​ സമൂഹവ്യാപനമുണ്ടായത്​. രാജ്യത്ത്​ ആദ്യമായി ബംഗ്ലാദേശ്​ സ്വദേശിയായ 57കാരനാണ്​ കോവിഡ്​ ബാധിച്ച്​ മരിച്ചത്​. നിലവിൽ ഖത്തറിൽ നിന്ന്​ ഇന്ത്യയിലേക്കോ തിരിച്ചോ സാധാരണ യാത്രാവിമാനങ്ങളില്ല. എന്നാൽ ഇരുരാജ്യങ്ങളും തമ്മിലുള്ള എയർ ബബ്​ൾ ധാരണപ്രകാരം പ്രത്യേക വിമാനസർവീസുകൾ നടക്കുന്നുണ്ട്​.ലോകത്ത്​ കോവിഡിൽ ഏറ്റവും കുറഞ്ഞ മരണനിരക്ക്​ ഖത്തറിലാണ്​. ഖത്തറിനൊപ്പം തന്നെ വലുപ്പമുള്ള സിംഗപ്പൂരും കുറഞ്ഞ മരണനിരക്കിൽ ലോകത്ത് മുന്നിലുണ്ട്. മരണനിരക്ക് 0.1 ശതമാനത്തിലും താഴെയാണ് ഈ കുഞ്ഞു രാജ്യങ്ങളിൽ.