അമീർ കപ്പ്​ ഫൈനൽ: തുമാമ നിറഞ്ഞുകവിയും

ദോഹ: ആരാധകർ കാത്തിരിക്കുന്ന അമീർ കപ്പ്​ ഫൈനലിലേക്ക്​ തുമാമ സ്​റ്റേഡിയം സജ്ജമായി കഴിഞ്ഞു. ലോകകപ്പ്​ വേദിയുടെ ഉദ്​ഘാടനം കൂടിയാവുന്ന കളിയുത്സവത്തിൽ തുമാമ സ്​റ്റേഡിയം നിറഞ്ഞുകവിയും.

സ്​റ്റേഡിയത്തിൻെറ ആകെ ശേഷിയായ 40,000 സീറ്റുകളിലേക്ക്​ കാണികൾക്ക്​ പ്രവേശനം നൽകുമെന്ന്​ സംഘാടകർ അറിയിച്ചു. 22ന്​ രാത്രി ഏഴിനാണ്​ മത്സരത്തിൻെറ കിക്കോഫ്​. 2022 ലോകകപ്പിനായി ഒരുക്കിയ വേദികളിൽ ആറാമത്തെ കളിയിടം കൂടിയാണ്​ തുമാമ. അൽസദ്ദും അൽ റയ്യാനും തമ്മിലാണ്​ ഫൈനൽ പോരാട്ടം. ചൊവ്വാഴ്​ച നടന്ന വാർത്തസമ്മേളനത്തിൽ അമീർ കപ്പ്​ സംഘാടക സമിതി അംഗങ്ങൾ മത്സര സംബന്ധിയായ നടപടി ക്രമങ്ങളും ട്രാഫിക്​-ഗതാഗത സംവിധാനങ്ങളും വിശദീകരിച്ചു. കോവിഡ് വാക്സിനേഷന്‍ പൂര്‍ത്തീകരിച്ചവര്‍ക്കും കോവിഡ് വന്ന് ഭേദമായവര്‍ക്കും മാത്രമായിരിക്കും സ്​റ്റേഡിയത്തിലേക്ക്​ പ്രവേശനം. മത്സരത്തിന് ടിക്കറ്റെടുത്തവര്‍ പ്രത്യേക ഫാന്‍ ഐഡി കൂടി സ്വന്തമാക്കിയാൽ മാത്രമേ പ്രവേശനം ലഭിക്കൂ. ദോഹ ക്യു.എൻ.സി.സിയില്‍ ഫാന്‍ ഐഡി വിതരണം ആരംഭിച്ചിട്ടുണ്ട്. രാവിലെ ഏഴു മുതല്‍ രാത്രി 11 വരെ വിതരണമുണ്ടാകും. 12 വയസ്സിനു താഴെയുള്ള കുട്ടികള്‍ക്ക് റാപ്പിഡ് ആൻറിജന്‍ ടെസ്​റ്റ്​​ നടത്തി കോവിഡ് നെഗറ്റിവാണെന്ന് തെളിയിക്കണം. ഏഴിനു മത്സരം ആരംഭിക്കുന്നതി​െൻറ മൂന്നു മണിക്കൂര്‍ മു​േമ്പ സ്​റ്റേഡിയത്തിലേക്ക് കാണികളെ പ്രവേശിപ്പിക്കും. മത്സരത്തിന്​ അര മണിക്കൂര്‍ മു​േമ്പ സ്​റ്റേഡിയത്തി​െൻറ പ്രകാശന ചടങ്ങുകള്‍ തുടങ്ങും. മാസ്ക് അണിഞ്ഞ്​ മാത്രമേ കാണികൾക്ക്​ സ്​റ്റേഡിയത്തിൽ ഇരിക്കാൻ കഴിയൂ. മത്സരത്തിനുള്ള ഗതാഗത സൗകര്യമൊരുക്കുന്നതിനായി തൊട്ടുമുമ്പുള്ള ദിവസങ്ങളില്‍ വിവിധ റോഡുകള്‍ അടച്ചിടും. സ്​റ്റേഡിയത്തിന് സമീപമുള്ള റോഡുകള്‍ രണ്ടു തവണകളിലായാണ് അടച്ചിടുക.

ദോഹയിലെ പ്രധാന ഇൻറര്‍സെക്​ഷനുകളിലെല്ലാം സ്​റ്റേഡിയത്തിലേക്ക് വഴി കാണിക്കുന്നതിനുള്ള സംവിധാനമൊരുക്കും. എല്ലാ മെട്രോ സ്​റ്റേഷനുകളിലും ഈ സംവിധാനമുണ്ടാകും. ഫാൻ ഐഡി ഉപയോഗിച്ച്​ മത്സരദിനത്തിൽ ദോഹ മെട്രോയിൽ സൗജന്യമായി യാത്ര നടത്താൻ കഴിയും.