അമേരിക്കൻ സർവീസിന് 10 വർഷം; മുന്തിരി വർണമണിഞ്ഞ് എംപയർ സ്​റ്റേറ്റ് ബിൽഡിംഗ്

ദോഹ:  അമേരിക്കയിലേക്ക് ദോഹയിൽ നിന്നും സർവീസ്​ ആരംഭിച്ചിട്ട് ഒരു പതിറ്റാണ്ട് പിന്നിടുമ്പോൾ ഖത്തർ എയർവെയ്സിന് ആദരവുമായി ന്യൂയോർക്കിലെ എംപയർ സ്​റ്റേറ്റ് ബിൽഡിംഗ്. ഖത്തറി​​െൻറ പതാകയെ പ്രതിനിധീകരിക്കുന്ന മുന്തിരി വർണവും വെള്ളയും പുതച്ചാണ് എംപയർ സ്​റ്റേറ്റ് ബിൽഡിംഗ് തങ്ങളുടെ ആദരവ് പൂർണമാക്കിയത്. അതേസമയം, അമേരിക്കയിൽ നിന്നും 100ലധികം സ്​ഥലങ്ങളിലേക്കുള്ള നിരക്കിൽ പ്രത്യേക ഓഫർ നൽകിയാണ് ഖത്തർ എയർവെയ്സ്​ തങ്ങളുടെ 10ാം വാർഷികം ആഘോഷിച്ചത്. 

കൂടാതെ ഖത്തർ എയർവെയ്സി​​െൻറ സ്​ഥിരം യാത്രാക്കാരുടെ പ്രിവിലേജ് ക്ലബ് അംഗങ്ങൾക്ക് ക്യൂമൈൽ ബോണസും ഇതോടൊപ്പം നൽകിയിട്ടുണ്ട്. 
ലോകത്തിലെ പ്രധാന അംബരചുംബി കെട്ടിടമായ ന്യൂയോർക്കിലെ എംപയർ സ്​റ്റേറ്റ് കെട്ടിടം തങ്ങൾക്കുള്ള ആദരസൂചകമായി ഖത്തറി​​െൻറ നിറങ്ങൾ പതിപ്പിച്ചത് ഖത്തർ എയർവേയ്സിനുള്ള അംഗീകാരമാണെന്നും അമേരിക്കയിൽ നിന്നുള്ള പ്രത്യക്ഷമായ പിന്തുണ വ്യക്തമാക്കുന്നതാണിതെന്നും ഖത്തർ എയർവേയ്സ്​ സി.ഇ.ഒ അക്ബർ അൽ ബാകിർ പറഞ്ഞു. 

തുടർച്ചയായി അമേരിക്കയിലേക്ക് ഇതിൽ അഭിമാനിക്കുന്നുവെന്നും കൂടുതൽ വർഷങ്ങൾ സർവീസ്​ നടത്താനാണ് ആഗ്രഹിക്കുന്നതെന്നും അദ്ദേഹം സൂചിപ്പിച്ചു.
ലാസ്​ വെഗാസ്​, സാൻ ഫ്രാൻസിസ്​കോ നഗരങ്ങളിലേക്ക് കൂടി സർവീസ്​ ആരംഭിക്കുകയാണ് ഖത്തർ എയർവേയ്സ്​ പദ്ധതിയെന്നും അദ്ദേഹം ചൂണ്ടിക്കാട്ടി. 
2007 ജൂൺ 28നാണ് ദോഹയിൽ നിന്നും ന്യൂയോർക്കിലേക്ക് ഖത്തർ എയർവേയ്സ്​ ആദ്യ സർവീസ്​ ആരംഭിക്കുന്നത്. തുടർന്നുള്ള മാസത്തിൽ വാഷിംഗ്ടണിലേക്കും സർവീസ്​ ആരംഭിക്കാൻ ഖത്തർ എയർവേയ്സിനായി. 2016ൽ ലോസ്​ ആഞ്ചലസ്​, ബോസ്​റ്റൺ, അറ്റ്​ലാൻറ എന്നിവിടങ്ങളിലേക്കാണ് ഖത്തർ എയർവേയ്സ്​ സർവീസുകൾ ആരംഭിച്ചത്. ഇതുവരെ 10 അമേരിക്കൻ നഗരങ്ങളിലേക്കാണ് കമ്പനി സർവീസ്​ നടത്തുന്നത്.