ഖത്തർ ലോകകപ്പ്​: നാലാമത്​ സ്​റ്റേഡിയം അൽറയ്യാൻ ഡിസംബർ 18ന്​ തുറക്കും

ദോഹ: ഖത്തർ ലോകകപ്പിനുള്ള നാലാമത്​ സ്​​േറ്റഡിയം ദേശീയദിനമായ ഡിസംബർ 18ന്​ തുറക്കും. അൽറയ്യാൻ സ്​ റ്റേഡിയമാണ്​ അമീർ കപ്പിൻെറ ഫൈനൽ മൽസരം നടത്തി ഉദ്​ഘാടനം ചെയ്യുകയെന്ന്​ സുപ്രീംകമ്മിറ്റി ഫോർ ഡെലിവറി ആൻറ്​ ലെഗസിയും ഖത്തർ ഫുട്​ബാൾ അസോസിയേഷനും അറിയിച്ചു​. ഫൈനലിൽ അൽ അറബി ക്ലബ്​ അൽസദ്ദ്​ ക്ലബിനെയാണ്​ നേരിടുക.

കോവിഡിനിടയിലും 2022 ലോകകപ്പിൻെറ ഒരുക്കങ്ങൾ ഖത്തറിൽ പുരോഗമിക്കുകയാണ്​. നേരത്തേ ഖലീഫ ഇൻറർനാഷനൽ സ്​റ്റേഡിയം, അൽ ജനൂബ്​ സ്​റ്റേഡിയം, എജുക്കേഷൻ സിറ്റി സ്​റ്റേഡിയം എന്നിവ ഉദ്​ഘാടനം ചെയ്​ തിരുന്നു. 40,000 പേർക്കിരിക്കാവുന്നതാണ്​ അൽറയ്യാൻ സ്​റ്റേഡയം. ടൂർണമെൻറിന്​ ശേഷം ഇരിപ്പിടങ്ങൾ പകുതിയായി കുറച്ച്​ മറ്റ്​ രാജ്യങ്ങളിലെ കായിക ആവശ്യങ്ങൾക്കായി നൽകും. 20 കിലോമീറ്റർ ദൂരം ദോഹയിൽ നിന്ന്​. ദോഹ മെട്രോയിൽ കയറി അൽറിഫ സ്​റ്റേഷനിൽ ഇറങ്ങിയാൽ സ്​റ്റേഡിയത്തിലേക്ക്​ നടന്നെത്താൻ സാധിക്കും. മെട്രോയുടെ ഗ്രീൻലൈനിലാണ്​ അൽറിഫ സ്​റ്റേഷൻ ഉള്ളത്​. ഗൾഫ്​​ ആദ്യമായി ആതിഥേയത്വം വഹിക്കുന്ന ഫിഫ ലോകകപ്പിന്​ 2022 നവംബർ 21നാണ്​ കിക്കോഫ്​.

ഖ​ലീ​ഫ സ്​​റ്റേ​ഡി​യം, റാ​സ്​ അ​ബൂ അ​ബൂ​ദ്, ലു​സൈ​ൽ, അൽ ​െബയ്ത്, അ​ൽ ജനൂബ്​, അൽ തുമാമ , അൽറയ്യാൻ, എജുക്കേഷൻ സിറ്റി എന്നീ എട്ട്​ സ്​റ്റേഡിയങ്ങളിലായാണ്​ ഖത്തർ ലോകകപ്പ്​ നടക്കുക.

ഒരുക്കങ്ങൾ അതിവേഗം

ലോകകപ്പിെൻറ ചരിത്രത്തിലെ ഏറ്റവും നൂതന പതിപ്പിനായിരിക്കും ഖത്തറും മിഡിലീസ്​റ്റും 2022ൽ സാക്ഷ്യം വഹിക്കുക. ഓരോ സ്​റ്റേഡിയവും തമ്മിൽ അത്യാധുനിക ഗതാഗത സംവിധാനങ്ങൾ വഴി ബന്ധിപ്പിച്ചിരിക്കുന്നു. ഫുട്ബോൾ േപ്രമികൾക്കും താരങ്ങൾക്കും ഓഫീഷ്യലുകൾക്കും സ്​റ്റേഡിയങ്ങളിൽ നിന്നും സ്​റ്റേഡിയങ്ങളിലേക്കുള്ള യാത്രാ സമയം വളരെ കുറവായിരിക്കും. ഇത് താരങ്ങളുടെ മാനസികാരോഗ്യം വർധിപ്പിക്കുന്നതിൽ സുപ്രധാന പങ്ക് വഹിക്കും. മുൻ ലോകകപ്പുകളിൽ സ്​റ്റേഡിയങ്ങളിൽ നിന്നും സ്​റ്റേഡിയങ്ങളിലേക്ക് മണിക്കൂറുകളുടെ വിമാന യാത്രകളാണുണ്ടായിരുന്നത്​. ഖത്തറിൽ രണ്ട് സ്​റ്റേഡിയങ്ങൾ തമ്മിലുള്ള ഏറ്റവും കൂടിയ ദൂരം 75 കിലോമീറ്റർ മാത്രമാണ്. അൽഖോറിലെ അൽ ബെയ്ത് സ്​റ്റേഡിയവും വക്റയിലെ അൽ ജനൂബ് സ്​റ്റേഡിയവും തമ്മിലാണ് ഏറ്റവും ദൂരം കൂടിയത്. എജ്യുക്കേഷൻ സിറ്റി സ്​റ്റേഡിയവും റയ്യാൻ സ്​റ്റേഡിയവും തമ്മിലുള്ള ദൂരമാകട്ടെ, അഞ്ച് കിലോമീറ്റർ മാത്രം.

കഴിഞ്ഞ ജൂലൈ മാസത്തിലാണ് ഖത്തർ ലോകകപ്പി​െൻറ മാച്ച് ഷെഡ്യൂൾ ഫിഫ പുറത്ത് വിട്ടത്. 60000 പേർക്ക് ഒരേ സമയം ഇരിപ്പിടമൊരുക്കുന്ന അൽ ബെയ്ത് സ്​റ്റേഡിയമായിരിക്കും ഉദ്ഘാടന മത്സരത്തിന് വേദിയാകുക. ഡിസംബർ 18ന് ഖത്തർ ദേശീയദിനത്തിൽ ലുസൈൽ സ്​റ്റേഡിയത്തിൽ കലാശപ്പോരാട്ടവും നടക്കും.

2022 ലോകകപ്പ് ഷെഡ്യൂൾ ഇങ്ങനെ

• കിക്ക് ഓഫ്: നവം 21, ദോഹ സമയം ഉച്ചക്ക്​ ഒന്ന്​ അല്‍ ബെയ്ത്ത് സ്​റ്റേഡിയം
  
• ഗ്രൂപ്പ് മത്സരങ്ങള്‍: നവംബർ 21 മുതല്‍ ഡിസംബർ രണ്ട്​ വരെ, സമയം ഉച്ചക്ക്​ ഒന്ന്​, വൈകുന്നേരം നാല്​, ഏഴ്​, പത്ത്​ (മുഴുവന്‍ സ്റ്റേഡിയങ്ങളിലുമായി)
• പ്രീ ക്വാര്‍ട്ടർ: ഡിസംബർ മൂന്നു മുതല്‍ ഡിസം ആറ്​ വരെ, സമയം വൈകുന്നേരം ആറ്​, 10 (മുഴുവന്‍ സ്റ്റേഡിയങ്ങളിലുമായി)
• ക്വാര്‍ട്ടര്‍ ഫൈനല്‍: ഡിസംബര്‍ ഒമ്പത്​ മുതൽ പത്തുവരെ: സമയം വൈകുന്നേരം ആറ്​, പത്ത്​ (അല്‍ ബെയ്​ത്ത്, അല്‍ തുമാമ, ലുസൈല്‍, എജ്യൂക്കേഷന്‍ സിറ്റി)
• സെമി ഫൈനൽ: ഡിസംബർ 13മുതൽ 14 വരെ, രാത്രി പത്ത്​ (അല്‍ ബെയ്ത്ത്, ലുസൈല്‍)
• ലൂസേഴ്സ് ഫൈനൽ: ഡിസംബർ 17, വൈകുന്നേരം ആറ്​ (ഖലീഫ സ്​റ്റേഡിയം)
• ഫൈനല്‍: ഡിസംബര്‍ 18ന്. വൈകുന്നേരം ആറ്​ (ലുസൈല്‍ സ്റ്റേഡിയം)