കോഴിക്കോട്​ സ്വദേശി ഖത്തറിൽ കടലിൽ മുങ്ങിമരിച്ചു

ദോഹ: കോഴിക്കോട്​ കുറ്റിക്കാട്ടൂർ സ്വദേശി​യായ യുവാവ്​ ഖത്തറിൽ മുങ്ങിമരിച്ചു. പരിയങ്ങാട്​ തടയിൽ അസീസിന്‍റെ മകൻ അൻസിൽ (29) ആണ്​ അൽ വക്​റയിലെ കടലിൽ മുങ്ങി മരിച്ചത്​. അബൂഹമൂറിലെ വില്ലാ മാർട്ട്​ ജീവനക്കാരനായ അൻസിൽ തിങ്കളാഴ്ച ​ജോലി കഴിഞ്ഞ്​ താമസ സ്ഥലത്തേക്ക്​ പോയതായിരുന്നു. പിന്നീട്​, കാണാതായതിനെ തുടർന്ന്​ സുഹൃത്തുക്കളും സഹപ്രവർത്തകരും അന്വേഷണം നടത്തുന്നതിനിടയിലാണ്​ ഹമദ്​ മെഡിക്കൽ കോർപറേഷനിൽ മൃതദേഹം കണ്ടെത്തിയത്​. ​

അൽ വക്​റ കടലിൽ അപകടത്തിൽ പെട്ടതിനു പിന്നാലെ, ചൊവ്വാഴ്ച രാവിലെ കണ്ടെത്തിയ മൃതദേഹം ആളെ തിരിച്ചറിയാതെ ആശുപത്രി മോർച്ചറിയിലേക്ക്​ മാറ്റുകയയായിരുന്നു. ഇതിനിടയിലാണ്​ സുഹൃത്തുക്കളും കെ.എം.സി.സി പ്രവർത്തകരും നടത്തിയ അന്വേഷണത്തിൽ ഹമദ്​ ആശുപത്രി മോർച്ചറിയിലെ മൃതദേഹം അൻസിലിന്‍റേതാണെന്ന്​ തിരിച്ചറിഞ്ഞത്​.

തുടർ നടപടികൾ പൂർത്തിയാക്കിയ ശേഷം, വ്യാഴാഴ്​ച വൈകുന്നേരം ഖത്തർ എയർ വേസ്​ വിമാനത്തിൽ മൃതദേഹം നാട്ടിലേക്ക്​ കൊണ്ടുപോകും. ഫാത്തിമ ഷബാനയാണ്​​ അൻസിലിന്‍റെ ഭാര്യ. മകൾ ആയിഷ റെന. മാതാവ്​: അസ്​മ. സഹോദരൻ: അഫ്​സൽ