44 പരിശീലന സ്ഥാപനങ്ങൾക്ക്​ പ്രവർത്തനം പുനരാരംഭിക്കാം

ദോഹ: വിദ്യാഭ്യാസ മേഖലയിലെ 44 വിവിധ പരിശീലന സ്ഥാപനങ്ങൾക്ക്​ പ്രവർത്തനം പുനരാരംഭിക്കാൻ വിദ്യാഭ്യാസ ഉന്നത വിദ്യാഭ്യാസ മന്ത്രാലയം അനുമതി നൽകി. വിവിധ ട്യൂഷൻ കേന്ദ്രങ്ങൾ, കമ്പ്യൂട്ടർ കേന്ദ്രങ്ങൾ, മറ്റ്​ പരിശീലന സ്ഥാപനങ്ങൾ തുടങ്ങിയവക്കാണ്​ 2020-21 അധ്യയന വർഷത്തിൽ വീണ്ടും തുറന്നുപ്രവർത്തിക്കാൻ അനുമതി നൽകിയിരിക്കുന്നത്​. കോവിഡ്​ പശ്ചാത്തലത്തിൽ വിദ്യാഭ്യാസ മേഖലയിൽ ഉണ്ടായിരുന്ന നിയന്ത്രണങ്ങൾ ഘട്ടംഘട്ടമായി നീക്കുന്നതിൻെറ ഭാഗമായാണിത്​. 19 ട്യൂഷൻ കേന്ദ്രങ്ങൾ, ഭിന്നശേഷിക്കാർക്കുള്ള 12 പരിശീലന വിദ്യാഭ്യാസ സ്ഥാപനങ്ങൾ, ആറ്​ അഡ്​മിനിസ്​ട്രേറ്റിവ്​ പരിശീലന കേന്ദ്രങ്ങൾ, നാല്​ കമ്പ്യൂട്ടർ പരിശീലന കേന്ദ്രങ്ങൾ, ഭാഷ പരിശീലനം നൽകുന്ന രണ്ടു​ കേന്ദ്രങ്ങൾ, മറ്റ്​ വിദ്യാഭ്യാസ പരിശീലനങ്ങൾ നൽകുന്ന ഒരു കേന്ദ്രം എന്നിവക്കാണ്​ തുറന്നുപ്രവർത്തിക്കാൻ അനുമതി​. ഇവ ഏതൊക്കെ എന്നതടക്കമുള്ള വിവരങ്ങൾ മന്ത്രാലയത്തിൻെറ വെബ്​സൈറ്റിൽ ലഭ്യമാണ്​.

അൽമഷാഫ്​, ഗറാഫ അൽറയ്യാൻ, അൽഗറാഫ, അൽ കർതിയാത്ത്​, ഉംലഖ്​ബ, അൽ ലഖ്​ത, മദീന ഖലീഫ, സലത്ത അൽജദീദ്​​, മഅ്​മൂറ, മദീന ഖലീഫ അൽ ജനൂബിയ, അൽ വാബ്​, നുഐജ, അൽ റയ്യാൻ അൽജദീദ്​, ഐൻ ഖാലിദ്​, അൽ ഖീസ, മുഐദർ എന്നീ മേഖലകളിൽ 19 ട്യൂഷൻ സെൻററുകളാണ്​ പ്രവർത്തിക്കുന്നത്​. ഭിന്നശേഷിക്കാർക്കുള്ള പരി​ശീലനവും വിദ്യാഭ്യാസവും നൽകുന്ന 12 കേന്ദ്രങ്ങളാണുള്ളത്​. അൽദുഹൈൽ, അൽ മഅ്​മൂറ, മദീന ഖലീഫ അൽ ജബൂബിയ, അൽ മർകിയ, അൽ ദഫ്​ന, ഉംലഖ്​ബ, അൽകർതിയാത്ത്​, അൽതുമാമ, അൽവാബ്​, അൽഅസീസിയ എന്നിവിടങ്ങളിലാണ്​ ഇവയുള്ളത്​.

അഡ്​മിനിസ്​ട്രേറ്റിവ്​ പരിശീലനത്തിനുള്ള ആറ്​ കേന്ദ്രങ്ങൾ അൽവക്​റ, അൽ മിർഖബ്​ അൽജദീദ്​, ബിൻഉംറാൻ, അൽലഖ്​ത, നുഐജ എന്നിവിടങ്ങളിൽ പ്രവർത്തിക്കുന്നുണ്ട്​.

നാല്​ കമ്പ്യൂട്ടർ സെൻററുകൾ മതാർ ഖദീം, അൽവാബ്​, മഅ്​മൂറ, മുശൈരിബ്​ എന്നിവിടങ്ങളിലുണ്ട്​. ഭാഷ പരിശീലനം നൽകുന്ന രണ്ടു​ കേന്ദ്രങ്ങൾ അൽ അസീസിയ, അൽവക്​റ എന്നിവിടങ്ങളിലുമുണ്ട്​. അബൂഹമൂറിൽ എജുക്കേഷനൽ പരി​ശീലന കേന്ദ്രവും ഉണ്ട്​. വിദ്യാഭ്യാസ പരിശീലന മേഖലകളിൽ സ്വകാര്യ സ്ഥാപനങ്ങൾ വഹിക്കുന്ന പങ്ക്​ സുപ്രധാനമാണെന്ന്​ മന്ത്രാലയം പറയുന്നു. ഉന്നത നിലവാരത്തിലുള്ള സേവനങ്ങൾ വിദ്യാർഥികൾക്ക്​ നൽകാനായി ഇത്തരം സ്ഥാപനങ്ങൾക്ക്​ കർശനമായ ചട്ടങ്ങളാണ്​ മന്ത്രാലയം ഏർപ്പെടുത്തിയിട്ടുള്ളത്​. വിദ്യാഭ്യാസ ഉന്നത വിദ്യാഭ്യാസ മന്ത്രാലയത്തിൻെറ എജുക്കേഷൻ സെ​േ​ൻറഴ്​സ്​ വകുപ്പിന്​ കീഴിലാണ്​ ഇത്തരം സ്ഥാപനങ്ങൾ പ്രവർത്തിക്കുന്നത്​. ഈ മേഖലയിൽ സ്ഥാപനം നടത്തുന്നവർക്ക്​ മികച്ച സൗകര്യങ്ങളും അവസരങ്ങളുമാണ്​ മന്ത്രാലയം നൽകുന്നത്​.

കോവിഡ്​ പ്രതിരോധപ്രവർത്തനങ്ങളുടെ ഭാഗമായി അടച്ചിട്ട രാജ്യത്തെ സ്​കൂളുകൾ കഴിഞ്ഞ സെപ്​റ്റംബർ ഒന്നുമുതലാണ്​ തുറന്നുപ്രവർത്തിക്കാൻ തുടങ്ങിയത്​. എന്നാൽ, ആദ്യ ആഴ്​ചകളിൽതന്നെ ചിലയിടങ്ങളിൽ കോവിഡ്​ സ്ഥിരീകരിച്ചതോടെ ആ സ്​കൂളുകളുടെ ഭാഗങ്ങൾ പൂട്ടിയിരുന്നു. തുടർന്ന്​ ആവശ്യമുള്ളവർക്ക്​ ഓൺലൈൻ ക്ലാസും അല്ലാത്തവർക്ക്​ നേരിട്ടുള്ള ക്ലാസും തിരഞ്ഞെടുക്കാനുള്ള അവസരവും നൽകുന്ന സംവിധാനം നിലവിൽവന്നു. എന്നാൽ, പിന്നീട്​ എല്ലാ സ്​കൂളുകളിലും റൊ​ട്ടേഷനൽ ഹാജർ സംവിധാനം നിലവിൽ വന്നു. ഇത്​ പ്രകാരമാണ്​ ഇപ്പോൾ സ്​കൂളുകൾ പ്രവർത്തിക്കുന്നത്​. ആഴ്​ച അടിസ്ഥാനമാക്കി വിദ്യാർഥികളുടെ ഹാജർ രേഖപ്പെടുത്തുന്ന സംവിധാനമാണിത്​. വിദ്യാർഥികളുടെ ഹാജർ നിർബന്ധമാണ്​. ഒരാഴ്​ച ഒരുവിഭാഗം വിദ്യാർഥികളാണ്​ സ്​കൂളിൽ നേരി​ട്ടെത്തേണ്ടത്​.

അടുത്ത ആഴ്​ച അടുത്ത ഗ്രൂപ് വിദ്യാർഥികളും എത്തണം. ​ഏത്​ ആഴ്​ചയാണോ നേരി​ട്ട്​ കുട്ടികൾക്ക്​ സ്​കൂളിൽ എത്തേണ്ടതില്ലാത്തത്​ ആ ദിവസങ്ങളിൽ അവർക്ക്​ ഓൺലൈൻ ക്ലാസുകളും തുടരും. സ്​കൂളുകളിൽ കുട്ടികൾ എത്തുന്ന കാര്യത്തിൽ രക്ഷിതാക്കൾക്ക്​ ആശങ്ക വേണ്ടെന്ന്​ നാഷനൽ ഹെൽത്ത് സ്​ട്രാറ്റജിക് ഗ്രൂപ് ചെയർമാനും എച്ച്.എം.സി ഇൻഫെക്​ഷ്യസ്​ ഡിസീസ്​ മേധാവിയുമായ ഡോ. അബ്​ദുല്ലത്തീഫ് അൽ ഖാൽ നേരത്തേ തന്നെ അറിയിച്ചിരുന്നു. മുമ്പ്​ ചില കുട്ടികൾക്ക്​ കോവിഡ്​ സ്ഥിരീകരി​ച്ചെങ്കിലും ഇവർക്ക്​ വൈറസ് ​ബാധയേറ്റത്​ സ്​കൂളിൽനിന്നല്ല, പുറത്തുനിന്നാണെന്ന്​ ക​െണ്ടത്തിയിട്ടുണ്ട്​. അതിനാൽ തന്നെ സ്​കൂളുകളിൽനിന്നുള്ള കോവിഡ് ​ബാധയുടെ നിരക്ക്​ ഏ​െറ കുറവാണ്​. സ്​കൂളുകളിൽനിന്ന്​ രോഗവ്യാപനമുണ്ടാകുമെന്ന്​ ആശങ്കപ്പെടേണ്ട കാര്യമില്ല. ആരോഗ്യ മന്ത്രാലയത്തിൻെറ പ്രത്യേക സംഘം സ്​കൂളുകളിൽ കൃത്യമായ പരിശോധനക്കെത്തും. കോവിഡ്​ പ്രതിരോധ നടപടികൾ പാലിക്കുന്നുണ്ടോ എന്ന്​ കൃത്യമായ നിരീക്ഷണവും നടക്കുന്നുണ്ട്​. സ്​കൂൾ വിദ്യാർഥികളു​െട മൊത്തം കോവിഡ്​ പോസിറ്റിവ്​ നിരക്ക്​ ഒരു ശതമാനത്തിൽ താഴെ മാത്രമാണ്​.