താപനില കുറയുന്നു;  വരും ദിവസങ്ങളില്‍ തണുപ്പ് കൂടും

ദോഹ: രാജ്യത്തെ അന്തരീക്ഷ താപനില  വരും ദിവസങ്ങളില്‍ കുറയുമെന്നും അതിനാല്‍ തന്നെ ചില സമയങ്ങളില്‍ കടുത്ത ശൈത്യം അനുഭവപ്പെടാനിടയുണ്ടെന്നും ദേശീയ കാലാവസ്ഥാ വകുപ്പ് വ്യക്തമാക്കി. അതേസമയം, ഇന്ന് വൈകുന്നേരം വരെ ശക്തമായ കാറ്റടിക്കാന്‍ സാധ്യതയുണ്ടെന്നും കഴിഞ്ഞ ദിവസങ്ങളെ അപേക്ഷിച്ച്  അന്തരീക്ഷ താപനിലയില്‍ 4-5 ഡിഗ്രി സെല്‍ഷ്യസ് കുറയുമെന്നാണ് പ്രതീക്ഷിക്കുന്നതെന്നും കാലാവസ്ഥാ വകുപ്പ് അറിയിച്ചു. കൂടിയ താപനില 18നും 21നും ഡിഗ്രി സെല്‍ഷ്യസിനിടയിലായിരിക്കും. ഏറ്റവും കുറഞ്ഞ താപനില 12 ഡിഗ്രി സെല്‍ഷ്യസിനും 14 ഡിഗ്രി സെല്‍ഷ്യസിനും ഇടയിലായിരിക്കും. രാജ്യത്തിന്‍െറ തെക്ക് ഭാഗങ്ങളില്‍ അന്തരീക്ഷ താപനില 10നും താഴേക്ക് പതിക്കാനിടയുണ്ടെന്നും രാജ്യത്തുടനീളം തണുത്ത കാലാവസ്ഥയായിരിക്കുമെന്നും ദേശീയ കാലാവസ്ഥാ വകുപ്പ് വ്യക്തമാക്കി. ഇന്ന് വൈകുന്നേരം വരെ കടലിലും തീരത്തും വേഗമേറിയ വടക്ക് പടിഞ്ഞാറന്‍ കാറ്റ് വീശാന്‍ സാധ്യതയുണ്ടെന്നും കടലില്‍ ഒമ്പതടി ഉയരത്തില്‍ വരെ തിരമാലയടിക്കുമെന്നും കാലാവസ്ഥാ വകുപ്പ് വ്യക്തമാക്കി. 
കടലില്‍ പോകുന്നവരോട് ജാഗ്രത പാലിക്കണമെന്ന് വകുപ്പ് ആവശ്യപ്പെട്ടിട്ടുണ്ട്.