ആഭ്യന്തരമന്ത്രാലയത്തിന്  പുതിയ വെബ്സൈറ്റ് വരുന്നു

ദോഹ: കെട്ടിലും മട്ടിലും പുതുമ നല്‍കി ആഭ്യന്തരമന്ത്രാലയം തങ്ങളുടെ വെബ്സൈറ്റ് പരിഷ്കരിക്കുന്നു. പരിഷ്കരിച്ച വെബ്സൈറ്റ് മന്ത്രാലയത്തിന്‍െറ പുതിയ ആസ്ഥാനത്തിന്‍െറ ഉദ്ഘാടനത്തോടനുബന്ധിച്ച് പുറത്തിറക്കും. 
അടുത്ത മൂന്ന് മാസത്തിനുള്ളില്‍ വാദി സൈലില്‍ പുതിയ ആസ്ഥാന മന്തിരം ഉദ്ഘാടനം ചെയ്യും. ഈയിടെയായി മന്ത്രാലയം ഓണ്‍ലൈന്‍ വഴിയാക്കിയതും ഇനി ഓണ്‍ലൈന്‍ വഴിയാക്കാന്‍ പോകുന്നതുമായ സേവനങ്ങള്‍ പുതിയ വെബ്സൈറ്റില്‍ ലഭ്യമായിരിക്കും. 
250ലധികം സേവനങ്ങളാണ് ആഭ്യന്തരമന്ത്രാലയത്തിന്‍െറ വെബ്സൈറ്റില്‍ നിലവിലുള്ളത്. പരിഷ്കരിച്ച പുതിയവെബ്സൈറ്റ് വരുന്നതോടെ ഉപയോക്താക്കള്‍ക്ക് സേവനങ്ങള്‍ കുറച്ചുകൂടി ലളിതമാകുമെന്നാണ് പ്രതീക്ഷിക്കപ്പെടുന്നത്. പാസ്പോര്‍ട്ട്, ട്രാഫിക്, ബോര്‍ഡര്‍, ക്രിമിനല്‍ ഡിപ്പാര്‍ട്ട്മെന്‍റ് തുടങ്ങി വിവിധ വകുപ്പുകള്‍ ആഭ്യന്തരമന്ത്രാലയത്തിന് കീഴില്‍ പ്രവര്‍ത്തിക്കുന്നുണ്ട്. 
പുതിയ വെബ്സൈറ്റ് വരുന്നതോടെ മറ്റു സര്‍വീസ് സെന്‍ററുകള്‍ ആശ്രയിക്കാതെ തന്നെ സേവനങ്ങള്‍ ഓണ്‍ലൈനായി ചെയ്യാനാകും എന്നതും ആഭ്യന്തരമന്ത്രാലയത്തിന്‍െറ വെബ്സൈറ്റ് സവിശേഷതയില്‍ പെടുന്നു. അതേസമയം, ആഭ്യന്തരമന്ത്രാലയത്തിന്‍െറ പുതിയ ആസ്ഥാന കെട്ടിടം അവസാന മിനുക്ക് പണിയിലാണ്. കഴിഞ്ഞ വര്‍ഷം അവസാനം തുറന്നു കൊടുക്കുമെന്ന് പ്രഖ്യാപിച്ചിരുന്നെങ്കിലും സാങ്കേതിക പ്രശ്നങ്ങളാല്‍ ഉദ്ഘാടനം നീളുകയായിരുന്നു. 
മൂന്ന് മാസത്തിനുള്ളില്‍ ഉദ്ഘാടനം ഉണ്ടാകുമെന്നാണ് പ്രതീക്ഷിക്കുന്നത്.