സൗദി എംബസി ആക്രമണത്തെ  ഖത്തര്‍ അപലപിച്ചു

ദോഹ: ഇറാനിലെ സൗദി എംബസി ആക്രമിച്ച നടപടിയെ ഖത്തര്‍ അപലപിച്ചു. എംബസിക്ക് നേരെ നടന്ന അക്രമം 1961ലെ വിയന്ന കണ്‍വെന്‍ഷന്‍െറ നഗ്നമായ ലംഘനമാണെന്ന് ഖത്തര്‍ വിദേശകാര്യ മന്ത്രാലയം പുറത്തിറക്കിയ പ്രസ്താവനയില്‍ പറഞ്ഞു. നയതന്ത്ര കാര്യാലയങ്ങള്‍ക്ക് ആവശ്യമായ സുരക്ഷ ഒരുക്കാനും കുറ്റക്കാര്‍ക്കെതിരെ നടപടി സ്വീകരിക്കാനും ഇറാന്‍ ഭരണകൂടം മുമ്പോട്ട് വരണമെന്നും ഖത്തര്‍ ആവശ്യപ്പെട്ടു. രാജ്യത്തിന്‍െറ സുരക്ഷയും സുസ്ഥിരതയുമായി ബന്ധപ്പെട്ട എല്ല വിഷയത്തിലും ഖത്തര്‍ സൗദി അറേബ്യയെ പിന്തുണക്കുമെന്നും ഖത്തര്‍ വിദേശ കാര്യ മന്ത്രാലയം പ്രസ്താവനയില്‍ വ്യക്തമാക്കി.