തുര്‍ക്കിയുമായി ഖത്തര്‍ സൈനിക സഹകരണം ശക്തമാക്കും

ദോഹ: തുര്‍ക്കി പ്രധാനമന്ത്രി ഡോ. അഹമ്മദ് ദാവൂദ് ഒഗ്ലുവിന്‍െറ സന്ദര്‍ശനവേളയില്‍ സൈനിക സഹകരണത്തിന് ഖത്തറും തുര്‍ക്കിയും തമ്മില്‍ കരാറില്‍ ഒപ്പുവെച്ചു. തുര്‍ക്കി പ്രധാനമന്ത്രിയുടെയും ഖത്തര്‍ പ്രധാനമന്ത്രിയും ആഭ്യന്തര മന്ത്രിയുമായ ശൈഖ് അബ്ദുല്ല ബിന്‍ നാസര്‍ ബിന്‍ ഖലീഫ ആല്‍ഥാനിയുടെയും സാന്നിധ്യത്തില്‍ ഖത്തര്‍ പ്രതിരോധ മന്ത്രി ഡോ. ഖാലിദ് ബിന്‍ മുഹമ്മദ് അല്‍ത്വിയ്യയും തുര്‍ക്കി പ്രതിരോധ മന്ത്രിയും കരാറില്‍ ഒപ്പിടല്‍.
ഒൗദ്യോഗിക സന്ദര്‍ശനത്തിനായി ദോഹയിലത്തെിയ ദാവൂദ് ഒഗ്ലുവുമായി പ്രധാനമന്ത്രി ശൈഖ് അബ്ദുല്ല ബിന്‍ നാസര്‍ ബിന്‍ ഖലീഫ ആല്‍ഥാനി ചര്‍ച്ച നടത്തി. തുര്‍ക്കി പ്രധാനമന്ത്രിയെ സ്വാഗതം ചെയ്ത ഖത്തര്‍ ആഭ്യന്തരമന്ത്രി, ഇരുരാജ്യങ്ങളും തമ്മിലുള്ള ആഴത്തിലുള്ള ബന്ധത്തെ പ്രശംസിക്കുകയും നയതന്ത്രബന്ധം കൂടുതല്‍ ശക്തമാക്കുമെന്നും സാമ്പത്തികം, സുരക്ഷ, സാംസ്കാരിക, രാഷ്ട്രീയ രംഗങ്ങളില്‍ കൂടുതല്‍ സഹകരണം ശക്തമാക്കുമെന്നും വ്യക്തമാക്കി. ഈരംഗങ്ങളിലെല്ലാം കാലങ്ങളായി ശക്തമായ ബന്ധമാണ് നിലനില്‍ക്കുന്നത്. ഖത്തറും തുര്‍ക്കിയും തമ്മില്‍ ഒപ്പുവെച്ച സുരക്ഷാ കരാര്‍ ഇരുരാജ്യങ്ങളെയും കൂടുതല്‍ അടുപ്പിക്കുമെന്നും ഇരുജനതകളുടെയും ഉയര്‍ച്ചക്കും പുരോഗതിക്കും അത് വഴിവെക്കുമെന്നും പ്രധാനമന്ത്രി ശൈഖ് അബ്ദുല്ല ബിന്‍ നാസര്‍ ബിന്‍ ഖലീഫ ആല്‍ഥാനി ചൂണ്ടിക്കാട്ടി.